ომიკრონი საქართველოში თანდათან დომინანტი ხდება - 256 ახალი შემთხვევა

ომიკრონი საქართველოში

6 იანვრის მდგომარეობით, ჯამში საქართველოში ლაბორატორიულად დადასტურდა კორონავირუსის ომიკრონ-შტამის 600 შემთხვევა.

ერთი დღით ადრე, 5 იანვარს კი ომიკრონით 335 ადამიანი იყო ინფიცირებული. ანუ, ერთ დღეში 265 ახალი შემთხვევა გამოვლინდა.

კორონავირუსის ახალი შტამი – ომიკრონი, რომელიც 2021 წლის ნოემბრის შუა რიცხვებში სამხრეთ აფრიკაში აღმოაჩინეს, უკვე 20 დეკემბერს საქართველოში იყო.

ეს შტამი უფრო სწრაფად ვრცელდება, თუმცა, წინასწარი მონაცემებით, შედარებით მსუბუქი სიმპტომები აქვს.

დაავადებათა კონტროლის ეროვნული ცენტრის თავმჯდომარის, ამირან გამყრელიძის თქმით, საქართველოში იწყება ინფიცირების აღმავალი ტალღა, რომლის გამომწვევი ომიკრონი იქნება.

2022 წლის 7 იანვრისთვის საქართველოში 45 პროცენტია აცრილი ორი დოზით. 1 დეკემბრიდან ქვეყანაში “მწვანე პასპორტი” მოქმედებს – მხოლოდ ორი დოზით აცრილებს აქვთ უფლება შევიდნენ რესტორანში, კაფეში და სხვა გასართობ დაწესებულებებში.

_____________

7 იანვარს საქართველოში სულ კორონავირუსით ინფიცირების 4234 ახალი შემთხვევა დაფიქსირდა, გარდაიცვალა კიდევ 46 პაციენტი.

ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 953 410-ია. ვირუსს ჯამში 14 128 ადამიანი ემსხვერპლა.