ყარაბაღი, ბრძოლა გრძელდება: 24 ოქტომბერი

გამოაქვეყნეს რუკაზე, ინფოგრაფიკის სახით, მოცემულია ადგილები, რომელიც აზერბაიჯანის ხელისუფლების ოფიციალური განცხადებით, აზერბაიჯანის არმიის კონტროლქვეშ გადავიდა.

თავდაცვის სამინისტროს წარმომადგენლის, არცრუნ ოვანისიანის თქმით, საბრძოლო მოქმედებები გრძელდება, მიმდინარეობს ლოკალური ბრძოლები, შესაბამისად, რუკა აქტიურად იცვლება.

საღამოს ტრადიციული ბრიფინგისას, ოვანისიანმა ასევე განაცხადა, რომ საბრძოლო მოქმედებები დილიდან ფრონტის ყველა მიმართულებაზე დაიწყო. აზერბაიჯანის შეიარაღებული ძალები დღის განმავლობაში, სამხრეთიდან უტევდნენ ბერძორს (ლაჩინს), მაგრამ უკუაგდეს.

ჩრდილოეთით, შუადღის შემდეგ, აქტიური საარტილერიო სროლები მიმდინარეობდა. თავდაცვის სამინისტროს წარმომადგენლის განცხადებით, შაბათს, აზერბაიჯანის შეიარაღებული ძალების კიდევ ერთი სადაზვერვო-დივერსიული ჯგუფი გაანეიტრალეს, რომელიც ცენტრალური მიმართულებით მოქმედებდა. საუბარია მარტუნიდან სამხრეთით და ჰადრუთიდან ჩრდილოეთით არსებულ ტერიტორიაზე, მონაკვეთზე, რომელიც ტყესა და დასახლებულ პუნქტებს ესაზღვრება.

აზერბაიჯანში, აშშ-ის საელჩოს ვებგვერდზე, გაფრთხილება გამოქვეყნდა, ბაქოში, პოტენციური ტერორისტული თავდასხმებისა და აშშ-ისა და უცხო ქვეყნის მოქალაქეების გატაცების საფრთხის შესახებ.

აშშ-ის მოქალაქეებს ურჩევენ, თავი შორს დაიჭირონ ისეთი სასტუმროებისგან, როგორიც არის J.W. Marriott Absheron და ასევე, სხვა პოტენციურად სახიფათო ადგილებისგან.

ზოგრაბ მნაცაკანიანი ატლანტიკურ საბჭოში გამოვიდა სიტყვით. მან ყარაბაღის კონფლიქტის დარეგულირების თემაზე, ვაშინგტონში გამართულ მოლაპარაკებებს ძალიან პროდუქტიული უწოდა და წარმოადგინა გუშინ, აშშ-ის სახელმწიფო მდივანსა და სხვა ოფიციალურ პირებთან გამართული მოლაპარაკებების ზოგიერთი დეტალი.

სომეხი მინისტრის თქმით:

მოლაპარაკებებისას განიხილეს მთიან ყარაბაღში ცეცხლის დაუყოვნებლივ შეწყვეტის შესაძლებლობა;

განიხილეს მთიან ყარაბაღში, სამშვიდობო ძალების გაგზავნის შესაძლებლობა;

მხარეები შეთანხმდნენ, რომ კონფლიქტის მშვიდობიანი დარეგულირება შესაძლებელია ერთადერთი საერთაშორისო მანდატის ფარგლებში – ეუთოს მინსკის ჯგუფის თანათავმჯდომარეობით.

კონფლიქტის მოსაგვარებლად აშშ-ის ძალისხმევა კონსოლიდირებულია ეუთოს მინსკის ჯგუფის ორი დანარჩენი თანათავმჯდომარე ქვეყნის – რუსეთისა და საფრანგეთის ძალისხმევასთან;

შუამავლებს ერთნაირი მოსაზრება აქვთ მთიანი ყარაბაღის კონფლიქტის დარეგულირების საკითხთან დაკავშირებით.

ამას გარდა, სომხეთის საგარეო საქმეთა მინისტრმა განაცხადა, რომ სამხედრო კონფლიქტის შედეგად, 90 ათასი ადამიანი გახდა დევნილი. საბრძოლო მოქმედებების დაწყებიდან, მუდმივი ცეცხლის ქვეშ არის მთიანი ყარაბაღის მშვიდობიანი მოსახლეობა, დაინგრა ათასობით სამოქალაქო ინფრასტრუქტურული ობიექტი.

არტაკ ბეგლარიანმა განაცხადა, რომ არიან უგზოუკვლოდ დაკარგულებიც:

„აზერბაიჯანის დივერსიული ჯგუფების ჰადრუთში შემოღწევისა და სამოქალაქო პირების მკვლელობის ამსახველი ვიდეორგოლების გამოქვეყნების, ასევე, უგზოუკვლოდ დაკარგულთა შესახებ არსებული ინფორმაციის გათვალისწინებით, დიდი რისკია, რომ შეიძლება, სხვა მსგავსი შემთხვევებიც იყოს. სამოქალაქო პირები შეიძლება დაღუპულიყვნენ და წამების მსხვერპლი ან სხვა ომის დანაშაულის მსხვერპლნი გამხდარიყვნენ“.

მთიანი ყარაბაღის ომბუდსმენის აპარატის დათვლით, საბრძოლო მოქმედებების დაწყებიდან, აზერბაიჯანის მხრიდან განხორციელებული დაბომბვის შედეგად, დაზიანდა 1500 უძრავი ქონება, 1500 ინფრასტრუქტურული, საჯარო ან საწარმოოს ობიექტი და 1100 ავტომობილი

აზერბაიჯანის გენერალური პროკურატურის პრესსამსახურის მიერ გავრცელებული ინფორმაციის თანახმად, სომხეთის შეიარაღებული ძალების მხრიდან, ტერტერის რაიონის დაბომბვის შედეგად, დაიღუპა 16 წლის ორხან ისმაილზადე.

„მოწინააღმდეგე დასახლებულ პუნქტებს ბომბავს ტერტერისა და ბარდის რაიონების ტერიტორიაზე“

ყარაბაღში, ბრძოლების დაწყებიდან 28-ე დღე

• ვაშინგტონში, აშშ-ის სახელმწიფო მდივანი აზერბაიჯანისა და სომხეთის საგარეო საქმეთა მინისტრებს შეხვდა (ცალ-ცალკე). გაკეთდა განცხადებები კონფლიქტის მშვიდობიანი გზით დარეგულირების აუცილებლობის შესახებ. დეტალებისა და შედეგების შესახებ ჯერჯერობით ინფორმაცია არ ვრცელდება.

• Human Rights Watch-ის განცხადებით, აქვს მტკიცებულებები, რომ აზერბაიჯანი ყარაბაღის მშვიდობიანი დასახლებების წინააღმდეგ, აკრძალულ, კასეტურ საბრძოლო მასალას იყენებს.

• აზერბაიჯანის პრეზიდენტმა აზერბაიჯანის არმიის მიერ, ყარაბაღის მოსაზღვრე ხოჯავენდის, ჯებრაილის, ზანგილანისა და გუბადლის რაიონებში, 13 დასახლებულ პუნქტზე (1990-იანი წლების დასაწყისის ომის შემდეგ სომხური ძალების კონტროლქვეშ იყო) კონტროლის დამყარების შესახებ განაცხადა.

• სომხეთის თავდაცვის სამინისტრომ განაცხადა, რომ მთელი 23 ოქტომბრის განმავლობაში, აზერბაიჯანელი სამხედროები ბომბავდნენ მარდაკერტსა და მის მიმდებარე სოფლებს, ასევე, ლაჩინს: „მოწინააღმდეგე მოვიგერიეთ და ლაჩინიდან სამხრეთით წასვლა ვაიძულეთ“.

• ყარაბაღის პრეზიდენტმა რუსეთის პრეზიდენტს თხოვნით მიმართა, „საბრძოლო მოქმედებების შესაჩერებლად ყველაფერი გააკეთოს, რაც შესაძლებელია“.

• ყარაბაღის ერთიანმა საინფორმაციო ცენტრმა განაცხადა, რომ 23 ოქტომბრის საღამოს, აზერბაიჯანელმა სამხედროებმა ქალაქი მარტუნი დაბომბეს. ეს ინფორმაცია აზერბაიჯანის თავდაცვის სამინისტრომ უარყო.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 23 ოქტომბერი, 2020