კომენტარი: ივანიშვილი ცდილობს, იყოს ერთადერთი ბატონ-პატრონი, რომ მის გარდა მისვლა არავისთან შეგეძლოს

ნიკა სიმონიშვილის კომენტარი

სოლიდარობის გამო ადამიანებს პრობლემები შეუქმნეს: დააყადაღეს, შეუვარდნენ სახლებში – ბიძინა ივანიშვილი ცდილობს, იყოს ერთადერთი ბატონ-პატრონი, რომ მის გარდა მისვლა არავისთან შეგეძლოს – ამის შესახებ იურისტმა ნიკა სიმონიშვილმა გადაცემა “პოლიტიკურ სივრცეში” განაცხადა, რითაც გამოეხმაურა “ქართული ოცნების” მთავრობის მიერ ფონდების დაყადაღებას და ამ ფონდების ხელმძღვანელი პირების სახლებში ჩატარებულ კოორდინირებულ ჩხრეკებს.

28 აპრილს სხვადასხვა ფონდების ხელმძღვანელი პირების სახლებში პროკურატურამ კოორდინირებული ჩხრეკა ჩაატარა. ჩხრეკა ჩატარდა ნანუკა ჟორჟოლიანის, მარიამ ბაჯელიძის, გუგა ხელაიას და ალეკო ცქიტიშვილის სახლებში. ოთხივე პირთან პროკურატურის თანამშრომლები მოსამართლის განჩინების საფუძველზე შევიდნენ.

მანამდე საქართველოში დააყადაღეს ფონდები, რომლებიც აქციის დაჯარიმებულ მონაწილეებს და პოლიტპატიმრების ოჯახებს ეხმარებოდნენ – დააყადაღეს ნანუკას ფონდი და მასთან ერთად ნიკა გილაურისა და თბილისის ადამიანის უფლებათა სახლის ფონდები.

ნიკა სიმონიშვილი: “უნდა დავინახოთ “ქართული ოცნების” მთავარი სამიზნე. მე ვფიქრობ, რომ მთავარი სამიზნე, ყველაზე მნიშვნელოვანი ამოცანა, რაც “ქართული ოცნების” წინაშე დგას, არის ის, რომ რუსთაველის გამზირზე აქციები გააჩეროს.

რუსთაველს ოთხასი კაცი გადაკეტავს თუ ოთხი კაცი, ამას არსებითი მნიშვნელობა არ აქვს, ეს არის სიმბოლო, რომ პროტესტი გრძელდება, პროტესტი არის უწყვეტი და ეს პროტესტი არის იმის განმაპირობებელი, რომ ესენი [“ქართული ოცნება”] ლეგიტიმაციას ვერ მოიპოვებენ საერთაშორისო დონეზე, ამიტომ რაღაცნაირად უნდა გააჩერონ პროტესტი – თუ საერთაშორისო საზოგადოება ხედავს, რომ ჩვენ უბრალოდ გავჩუმდით, შევეგუეთ ამ ყველაფერს, პროტესტი არ არის, ე.ი. “შევირგეთ ყველაფერი“ და, შესაბამისად, იმ ხალხმა რატომ უნდა გაიგიჟოს თავი, რატომ უნდა დაასანქცირონ ან “ქართული ოცნების” წევრები, ან დამატებითი პრობლემები მათ რატომ უნდა შეუქმნან, თუ ჩვენ ხმას არ ვიღებთ, ამიტომ ეს არის პროტესტის გაგრძელების სიმბოლო.

იაგო კაჭკაჭიშვილი: პროტესტი მოლოდინის რეჟიმშია – ნებისმიერი გამღიზიანებლის შემთხვევაში შეიძლება ისევ იხუვლოს

“სალომე ზურაბიშვილის პოლიტიკური აქტიურობა შესუსტდა, შენელდა”

პარლამენტში რასაც აკეთებენ, ისინი იმის მეტს არაფერს არ აკეთებენ გარდა იმისა, რომ ნებისმიერი განსხვავებული აზრი, რომელიც მათ ლეგიტიმაციას უპირისპირდება, ჩაახშონ, ოღონდ ისე, მთლად ზედმეტიც არ მოუვიდეთ. როცა გზის გადაკეტვის დროს პოლიციის ჩაყენება დაიწყეს, რომელიც გზას არ აკეტვინებდა, უფრო მეტი ადამიანი გამოვიდა. მიხვდნენ, რომ აქ ცოტა უნდა მოეშვათ პირიქით და იმას ამბობენ, რომ მაშინ, როდესაც გზის გადაკეტვის საშუალებას გაძლევენ, მერე უკვე ბევრი ადამიანი აღარ გამოვა – ამ მიდგომით წავიდნენ და მერე უკვე ამბობენ, რომ რამდენიმე ადამიანი კეტავს და ეს სერიოზული აღარ არის. აქ უკვე ფრუსტრაციის მომენტი შემოაქვთ, რომ მერე კიდევ უფრო ნაკლებად გავიდნენ რუსთაველზე ადამიანები. რასაც აკეთებენ, ეს არის პროტესტის ჩახშობა.

მთელი ეს პროტესტი დგას ერთმანეთის მიმართ სოლიდარობაზე და სოლიდარობა არის ის, რაც იჭერს ამ პროტესტს და რაც ჩვენ გვაგრძელებინებს ამ ბრძოლას. სოლიდარობის აქტი იყო თუნდაც ეს საქველმოქმედო ფონდები და რა გააკეთეს, წავიდნენ, დააყადაღეს, შეუვარდნენ სახლებში; სოლიდარობის აქტი იყო თუნდაც ის, რაც მზია ამაღლობელთან მიმართებით ვნახეთ თუ სხვა კიდევ ბევრ დაჩაგრულ, ნაწამებ ადამიანთან დაკავშირებით და რა გააკეთეს – სოლიდარობის გამო ადამიანებს პრობლემები შეუქმნეს.

ბიძინა ივანიშვილი ცდილობს იმას, რომ ის იყოს ერთადერთი ბატონ-პატრონი, სადმე მის გარდა მისვლა არავისთან არ შეგეძლოს და, შესაბამისად, თუ ეს სოლიდარობა არ იარსებებს და ვერავისთან ვერ მიგესვლება, გვერდში ვერავინ ვერ დაგიდგება, რა თქმა უნდა, ყველაფერზე ხელს ჩაიქნევ.”