რუსი ოპოზიციონერი ნავალნი რუსეთში ბრუნდება. იქ მას ციხე ემუქრება

რუსმა ოპოზიციონერმა ალექსეი ნავალნიმ, რომელიც მოწამვლის შემდეგ გადარჩა და მკურნალობას გერმანიაში გადიოდა, განაცხადა, რომ  მოსკოვში 17 იანვარს დაბრუნდება.

”კითხვა” დავბრუნდე თუ არა” ჩემს წინაშე არასდროს მდგარა. იმიტომ, რომ ჩემი ნებით არ წამოვსულვარ. მე გერმანიაში რეანიმაციაში მოვხვდი ერთი მიზეზის გამო – ჩემი მოკვლა უნდოდათ”, – დაწერა პოლიტიკოსმა სოციალურ ქსელებში.

აგვისტოდან ნავალნი გერმანიაში იმყოფება, სადაც იგი რუსეთის ქალაქ ომსკიდან გადაიყვანეს. რამდენიმე ლაბორატორიამ დაადგინა, რომ ნავალნი “ნოვიჩოკის” ჯგუფის ქიმიური მომწამვლელი საშუალებით მოიწამლა. ბერლინის კლინიკა “Charite” – ში მკურნალობის შემდეგ ნავალნი გერმანიაში რეაბილიტაციას გადიოდა.

ნავალნიმ მკვლელობის მცდელობაში რუსეთის ხელისუფლება დაადანაშაულა, საერთაშორისო საგამოძიებო ჯგუფმა კი მოწამვლაში სავარაუდო მონაწილე პირების ვინაობა დაადგინა, რომლებიც რუსეთის ფედერალური უშიშროების სამსახურის თანამშრომლები აღმოჩნდნენ.

• რუსი ოპოზიციონერი ალექსეი ნავალნი თავის არშემდგარ მკვლელს ესაუბრა
• როგორ შექმნა მთავარმა რუსმა ოპოზიციონერმა მედია-იმპერია სოციალურ ქსელებში
•  რას უნდა ველოდოთ რუსეთის პრეზიდენტ ნავალნისგან?

რუსეთის ხელისუფლება მოწამლვას არ იძიებს და რაიმე კავშირს ინციდენტთან უარყოფს.

ნავალნის დაპატიმრება ემუქრება?

ამასთან, რუსეთში ნავალნის წინააღმდეგ სისხლის სამართლის საქმე აღიძრა მეორე მსოფლიო ომის ვეტერანის წინააღმდეგ ცილისწამების ფაქტზე. ამ მუხლით მას ჯარიმა და ორას ორმოც საათამდე სავალდებულო სამუშაოები ემუქრება.

ფედერალურმა პენიტენციურმა სამსახურმა კი მოითხოვა, რომ სასამართლომ პოლიტიკოსი 3,5 წლით კოლონიაში გაუშვას 2014 წლის სისხლის სამართლის საქმეზე, რომელზეც ის პირობითად იქნა გასამართლებული. დეპარტამენტი მიიჩნევს, რომ ოპოზიციონერის გერმანიაში გამგზავრება პირობითი მსჯავრის პირობებს არღვევს.

დეკემბრის ბოლოს რუსეთის საგამოძიებო კომიტეტმა ნავალნის წინააღმდეგ ახალი საქმე აღძრა – ანტიკორუფციული ფონდიდან თანხების გაფლანგვაზე. ამ მუხლით მას 10 წლამდე თავისუფლების აღკვეთა ემუქრება.

რას ამბობს ამაზე ნავალნი

თავად პოლიტიკოსი მიიჩნევს, რომ გამოძიება მის წინააღდეგ იმისთვის დაიწყო, რომ ქვეყანაში მისი დაბრუნება არ დაუშვან.

”პუტინი, რომელმაც ჩემი მოკვლის ბრძანება გასცა, თავის ბუნკერში  ყვირის და თავის მსახურებს ეუბნება, ყველაფერი გააკეთონ, რომ არ დავბრუნდე. მსახურები ჩვეულებისამებრ იქცევიან: ჩემს წინააღმდეგ ახალ სისხლის სამართლის საქმეებს თხზავენ. მაგრამ რას არ უნდა აკეთონ, ჩემთვის ეს საინტერესო არაა. რუსეთი ჩემი ქვეყანაა, მოსკოვი ჩემი ქალაქია და მე ისინი მომენატრა”, – განაცხადა ნავალნიმ 13 იანვარს