„მოსკოველი კურატორები მოითხოვენ, რომ სამხრეთ ოსეთმა არ გააღიზიანოს თბილისი“. მოსაზრება ცხინვალიდან
რუსეთი თბილისსა და სამხრეთ ოსეთს შორის
ონლაინ გამოცემა Echo of the Caucasus-ის მიმომხილველი, მურატ გუკემუხოვი, თავის წყაროებზე დაყრდნობით წერს, რომ ცხინვალის ე.წ. ხელისუფლებამ მიიღო პირდაპირი მითითება მოსკოვიდან, არ მოახდინოს სკანდალების პროვოცირება საქართველოში, რათა ხელი არ შეეშალოს მმართველი პარტიის, „ქართული ოცნების“ მოგებას ოქტომბრის საპარლამენტო არჩევნებში.
ქვემოთ მოცემულია ანალიზის შემოკლებული ვერსია.
ცოტა ხნის წინ, რუსეთის პრეზიდენტის რეგიონთაშორისი და კულტურული ურთიერთობების დეპარტამენტის ხელმძღვანელი იგორ მასლოვი ორდღიანი ვიზიტით ცხინვალს ეწვია.
დეტალების გარკვევის მცდელობა განსაკუთრებით წარმატებული არ ყოფილა – წყაროებს მოლაპარაკებების შესახებ ძალიან მწირი ინფორმაცია აქვთ. მაგრამ ისინი ამტკიცებენ, რომ განხილულ საკითხებს შორის იყო სამხრეთ ოსეთის პარლამენტში მომავალი შემოდგომის საარჩევნო კამპანია.
მოსკოვის მოთხოვნა ამ კამპანიის შესახებ არაერთხელ გაჟღერდა – ამან არ უნდა გამოიწვიოს შიდა პოლიტიკური კრიზისი – ეს არის ძირითადი მოთხოვნა. მაგრამ ამჯერად არის რაღაც ახალი: კამპანიამ არ უნდა გამოიწვიოს სკანდალები საქართველოში, სადაც ოქტომბერში საპარლამენტო არჩევნები გაიმართება.
მოსკოვს არ სურს, რომ სამხრეთ ოსელმა პოლიტიკოსებმა ქართულ ოპოზიციას მმართველი “ქართული ოცნების” წინააღმდეგ არგუმენტები მისცენ.
ამიტომ დაისვა კატეგორიული მოთხოვნა: სამხრეთ ოსეთში საარჩევნო დებატებიდან გამოირიცხოს საქართველოს საზღვრის გადახედვის თემა, სამხრეთ ოსეთის რუსეთთან შეერთების რეფერენდუმი და ა.შ.
ე.წ. პრეზიდენტ გაგლოევს, ცხადია, აქვს საკუთარი ინტერესი ამ „საათების სინქრონიზაციის“ მიმართ – მზად არის მოსკოვი მხარი დაუჭიროს მას მომავალ არჩევნებში?
რა არის ალან გაგლოევის პრობლემები წინასაარჩევნოდ? მაგალითად ის, თუ რას გადაწყვეტს მოსკოვი ბიუჯეტში არსებული ხვრელების შესახებ, სიტუაცია რუსეთის საბაჟოზე, საწვავის ფასების ზრდა, სახელმწიფო და საჯარო მოხელეების შემცირება – ეს ყველაფერი აუცილებლად გახდება სამხრეთ ოსეთის წინასაარჩევნო დისკუსიის ნაწილი, რომელიც მიმართულია ამჟამინდელი ხელისუფლების წინააღმდეგ.
სასწორის საპირისპირო მხარეს, ჯერჯერობით მხოლოდ საბავშვო მოედანი და ზამთრის საციგურაო მოედანია, გახსნილი “ნიხასის” საპრეზიდენტო პარტიის მონაწილეობით. თუმცა ეს არ არის საკმარისი.
ამ თვალსაზრისით ლოგიკური კითხვაა კურატორებისთვის: მზად არიან საპარლამენტო არჩევნებამდე გააძლიერონ სამხრეთ ოსეთის მმართველი გუნდის პოზიციები და სჭირდებათ თუ არა ეს პრინციპულად?
ჯერჯერობით უცნობია, რა შეიძლება შესთავაზონ პრეზიდენტ გაგლოევს მომავალ არჩევნებზე. მმართველი პარტია „ნიხასი“ აშკარად არ მიდის ტრიუმფისკენ, თუნდაც ადმინისტრაციული რესურსის გათვალისწინებით.
ამის გასაგებად, საკმარისია გადავხედოთ, რა რესურსები დაეთმო ბოლო ორი წლის განმავლობაში პარტიულ მშენებლობას, გარკვეული იდეოლოგიის ჩამოყალიბებას.
ამ ამბის კიდევ ერთი ნაწილია ის, რომ საპარლამენტო არჩევნების კამპანია საპრეზიდენტო რბოლის დასაწყისია და ფაქტობრივად, ისინი ერთდროულად იწყება.
- ფოსტალიონები ცხინვალში: „გადარჩენისთვის ვიბრძვით, სანამ ხელისუფლება დაპირებებით გვკვებავს“
- სამხრეთ ოსეთში სტალინის ძეგლი გაუჩინარდა და პუტინის ქანდაკება გამოჩნდა
- რატომ ვერ იბრუნებენ კონფლიქტით დაზარალებული ოსები საქართველოს მოქალაქეობას და ქონებას?
საარჩევნო აქტივები კონცენტრირებულია პოლიტიკურად მძიმე ძალების სამ ხელში: ძამბულატ თედეევი, ედუარდ კოკოითი და ანატოლი ბიბილოვი.
ეს არის უნიკალური ვითარება, როდესაც მთავარი მოთამაშეები – რომლებიც პრეტენზიას აცხადებენ ცხინვალის შიდა დღის წესრიგის დადგენაზე – სამხრეთ ოსეთის ფარგლებს გარეთ ცხოვრობენ, ხოლო შიგნით მოქმედი პოლიტიკური ფიგურები აუტსაიდერობისთვის არიან განწირული.
ჯერჯერობით გაურკვეველია, რას აპირებს მოსკოვი ამ ამბავთან დაკავშირებით. მაგრამ დრო გადის, საარჩევნო კამპანია უკვე ახლოსაა – დროა სამხრეთ ოსური კვერცხები კურატორის კალათებში ჩავდოთ.
