საქართველოში მოქალაქეებმა ახალი პოლიტიკური მოძრაობა, "სოციალური დემოკრატიისთვის" დააფუძნეს
მოძრაობა სოციალური დემოკრატიისთვის
საქართველოს მოქალაქეებმა ახალი მემარცხენე პოლიტიკური მოძრაობა, სოციალური დემოკრატიისთვის დააფუძნეს. ამ დროისთვის მოძრაობას 100-ზე მეტი წევრი ჰყავს. მოძრაობის წევრები ძირითადად პროევროპული აქციების მონაწილეები არიან.
სოციალური დემოკრატიისთვის წევრების თქმით, მოძრაობა აერთიანებს სხვადასხვა პროფესიის, გამოცდილებისა და ინტერესების მქონე მოქალაქეებს და ეფუძნება “ევროპულ მემარცხენე გამოცდილებას.”
“ჩვენი თანამედროვე ისტორიის ალბათ ყველაზე გამორჩეული ეტაპი დაკავშირებულია საქართველოში სოციალ-დემოკრატიულ მოძრაობასთან, რომელიც შემდეგ პარტიად გადაკეთდა, რომელთანაც დაკავშირებულია ძალიან ბევრი ცვლილება საქართველოში და რაც მთავარია ის მონაპოვარი, რასაც საქართველოს დემოკრატიული რესპუბლიკა ერქვა.
ამიტომ, ჩვენ როცა ერთის მხრივ ვეფუძნებით ევროპულ მემარცხენე გამოცდილებას, ჩვენ ვეფუძნებით წმინდად ქართულ გამოცდილებას, რომელიც თვითონ ევროპისთვისაც ძალიან მნიშვნელოვანია.
ამ ქვეყანას აქვს უდიდესი ტრადიცია მემარცხენე პროგრესული სახელმწიფოს მშენებლობის, პროგრესული პოლიტიკური ძალის შექმნისა და განვითარების”. – თქვა ისტორიკოსმა, ირაკლი ირემაძემ.
“ამ ქვეყანაში, გასული ათწლეულის განმავლობაში ცდილობდა არაერთი მოძრაობა, რომელიც ამ ქვეყანაში ცდილობდა დაემკვიდრებინა სოციალური სამართლიანობა.
დღეს ჩვენ ვართ ისეთ მდგომარეობაში, რომ ეს ყველა ძალა უნდა გაერთიანდეს ერთ კალაპოტად, ერთ დინებად, მარტივი მიზეზის გამო – დღეს საქართველო მხოლოდ ევროპის საკითხზე ან დემოკრატიის საკითხზე არ არის ორად გახლეჩილი; დღეს ეს ქვეყანა არის გახლეჩილი ეკონომიკური და სოციალური თვალსაზრისითაც.
ჩვენ ერთად ვაპირებთ ბრძოლას იმისთვის, რომ შევქმნათ ისეთი საზოგადოება და ეს ქვეყანა ვაქციოთ ისეთ საზოგადოებად, სადაც მეორეხარისხოვანი მოქალაქეები არ იქნებიან და ყველას ექნება შესაძლებლობა იცხოვროს ადამიანურად, ღირსეულად, იზრუნოს საკუთარი უფლებების, სურვილების, მისწრაფებების რეალიზებისთვის.
უკვე ეცოდინება ყველას ამ საზოგადოებაში, რომ გარდა კონსერვატორებისა, გარდა ამ ნეო-ლიბერალებისა და ა.შ. ამ საზოგადოებაში თავისი ადგილი აქვთ მონიშნული მემარცხენეებს და შეეცდებიან, რომ მაქსიმალურად დიდი კოალიცია შეკრან იმისთვის, რომ ქვეყანაში პროგრესი შედგეს”. – თქვა ლევან ლორთქიფანიძემ.
ახალ მოძრაობას გამოეხმაურა “კოალიცია ცვლილებებისთვის” ერთ-ერთი ლიდერი ნიკა მელია.
“საზოგადოებრივი მაუწყებლიდან მეგაფონით რომ მოდის მარში რუსთაველზე, დღეს პოლიტიკურ მოძრაობად ჩამოყალიბდა, მომავალში პოლიტიკურ პარტიად ვიხილავთ;
იმედია, ეს წამოწყება იქნება სტაბილური და არა სპონტანური, მომზადებული იმ სიმძიმეებისათვის, რაც ავტოკრატიის პირობებში თან ახლავს პოლიტიკურ პროცესს.
იმედი მაქვს, მათი ყოფნა ქართულ პოლიტიკაში, იქნება ეფექტიანი და ხანგრძლივი, შედეგზე და არა პროცესზე ორიენტირებული. წარმატებები.” – წერს ნიკა მელია.
