მიხეილ სააკაშვილის დაკავების კადრები გამოქვეყნდა

შსს მიხელ სააკაშვილის დაკავების კადრებს ავრცელებს:

_____________________________________

საქართველოს მესამე პრეზიდენტი სამშობლოში დაბრუნდა 1 ოქტომბერს, ღამე, ადგილობრივი თვითმართველობის არჩევნებამდე ერთი დღით ადრე.

1 ოქტომბერს დილით მან გაავრცელა რამდენიმე ვიდეო შეტყობინება, რომელიც ჩაწერილია შავი ზღვისპირა ქალაქში, ბათუმში.

სააკაშვილის წინააღმდეგ რამდენიმე სისხლის სამართლის საქმეა აღძრული და იგი უკვე მსჯავრდებულია რამდენიმე ეპიზოდზე. საქართველოს კანონმდებლობის თანახმად, იგი საქართველოს ტერიტორიაზე შემოსვლისთანავე უნდა დაეკავებინათ.

მთელი დღის განმავლობაში ხელისუფლების წარმომადგენლები ამტკიცებდნენ, რომ ძებნილი სააკაშვილი “არ შემოეპარათ” და რომ მესამე პრეზიდენტი იყო უკრაინაში, კურორტ ტრუსკავეცში.

საქართველოს შინაგან საქმეთა სამინისტროში ირწმუნებოდნენ, რომ მიხეილ სააკაშვილს არ დაუტოვებია უკრაინა და, შესაბამისად, არ გადმოუკვეთავს ქვეყნის სახელმწიფო საზღვარი. მმართველმა პარტიამ სააკაშვილის მიერ გავრცელებულ ვიდეოებს „ფეიკები” უწოდა, თავად მას კი „კლოუნი“.

იმავე დღეს, საღამოს შვიდი საათისთვის, სრულიად მოულოდნელად, საქართველოს პრემიერ-მინისტრმა ირაკლი ღარიბაშვილმა გამართა ბრიფინგი, სადაც გამოაცხადა, რომ ყოფილი პრეზიდენტის დაკავებულია.

როგორც შემდეგ გაირკვა, სააკაშვილი თბილისში, გლდანი-ნაძალადევის რაიონში, ერ-ერთ ბინაში დააკავეს.

დაკავების შემდდეგ, სააკაშვილი ქალაქ რუსთავის ციხეში გადაიყვანეს.

რუსთავის ციხესთან მობილიზებულია სპეცრაზმი და დამონტაჟებულია რკინის ღობეები. იქ იკრიბებიან მესამე პრეზიდენტის მომხრეები.

● ჩამოვა – არ ჩამოვა. რას ფიქრობენ საქართველოში სააკაშვილის შესაძლო დაბრუნებაზე და რა იქნება შემდეგ?
● რეფერენდუმი, კოკაინი და სისხლიანი ბანერები. მთავარი, რაც უნდა ვიცოდეთ 2 ოქტომბრის არჩევნებზე საქართველოში
● რას ვირჩევთ 2 ოქტომბერს? ხუთი ნიშანი, რომელიც მიუთითებს, რომ საქართველოში თვითმმართველობა არ არის

სააკაშვილს საქართველოს პრეზიდენტის პოსტი ათი წლის განმავლობაში, ორი ვადით ეკავა. 2013 წელს, მას შემდეგ, რაც მისმა პარტიამ “ნაციონალური მოძრაობამ” არჩევნები წააგო და მისი მეორე საპრეზიდენტო ვადა დასრულდა, სააკაშვილმა დატოვა ქვეყანა და მას შემდეგ სამშობლოში აღარ დაბრუნებულა.

ამ წლების განმავლობაში ის ცხოვრობდა ევროპასა და შეერთებულ შტატებში, შემდეგ კი დასახლდა უკრაინაში, სადაც ჯერ ექს-პრეზიდენტ პოროშენკოს გუნდის წევრი და ოდესის გუბერნატორი იყო, შემდეგ კი პოროშენკოს ოპოზიციაში გადავიდა.

ბოლო წლებში იგი პრეზიდენტ ვოლოდიმირ ზელენსკის რეფორმების კომიტეტს ხელმძღვანელობდა. სააკაშვილი ამჟამად არ არის საქართველოს მოქალაქე – მოქალაქეობა მან ავტომატურად დაკარგა მას შემდეგ, რაც ექვსი წლის წინ უკრაინის მოქალაქეობა მიიღო. სააკაშვილის წინააღმდეგ რამდენიმე სისხლის სამართლის საქმეა აღძრული.

სააკაშვილს უფლებამოსილების გადამეტებაში, საბიუჯეტო სახსრების გაფლანგვაში, 2007 წლის ნოემბერში ოპოზიციის აქციის დარბევასა და ტელეკომპანია “იმედში” შეჭრაში ადანაშაულებენ. სააკაშვილია ასევე დეპუტატ ვალერი გელაშვილის ცემისა და სანდრო გირგვლიანის მკვლელობის საქმეების ფიგურანტი.

სააკაშვილი უკვე არის მსჯავრდებული ორ ეპიზოდზე. მას 6 წლით აქვს ერთ-ერთ საქმეზე აღკვეთილი თავისუფლება. საქართველოს ხელისუფლების წარმომადგენლები მუდმივად აღნიშნავდნენ, რომ ძებნილ ექსპრეზიდენტს დააპატიმრებდნენ სამშობლოში დაბრუნებისთანავე.

საქართველოში ჩამოსვლის შესახებ საუბრისას თავად სააკაშვილმაც ხაზი გაუსვა, რომ არ ეშინია დაკავების.

2 ოქტომბერს საქართველოში ადგილობრივი თვითმმართველობის ორგანოებს ირჩევენ, თუმცა ოპოზიცია ამ არჩევნებს რეფერენდუმს უწოდებს, სადაც უნდა გადაწყდეს გაიმართება თუ არა ქვეყანაში რიგგარეშე საპარლამენტო არჩევნები და დასრულდება თუ არა ქვეყანაში “ქართული ოცნების” ერთპიროვნული, ცხრაწლიანი მმართველობა.