მიხეილ სააკაშვილი: ვრჩები აქ ჩემს სიკვდილამდე, ან თავისუფლებამდე

საქართველოს მესამე პრეზიდენტი მიხეილ სააკაშვილი ციხის საავადმყოფოში გადასვლაზე უარს ამბობს და წერილში წერს, რომ რჩება იქ სადაც არის.

“როგორიც არ უნდა იყოს ჩემი ჯანმრთელობის მდგომარეობა, მე უარს ვაცხადებ გლდანის ციხის საავადმყოფოში გადაყვანაზე და მირჩევნია, დავრჩე იქ, სადაც ახლა ვიმყოფები, სანამ ამ სიტუაციას არ დაასრულებს ან ჩემი სიკვდილი, ან ჩემი თავისუფლება. ნებისმიერ სიტუაციაში უარს ვაცხადებ გლდანის ციხეში ჩემს გადაყვანაზე“, – აცხადებს სააკაშვილი.

● ყოფილი პრეზიდენტი მიხეილ სააკაშვილი უკვე 26-ე დღეა შიმშილობს. მისი ჯანმრთელობის მდგომარეობის შესასწავლად რამდენიმე დღის წინ ციხეში ექიმთა ჯგუფი იმყოფებოდა, რომლებმაც პრევენციული ჰოსპიტალიზაციის რეკომენდაცია მრავალფუნქციურ სამედიცინო დაწესებულებაში გასცეს, თუმცა იუსტიციის მინისტრი ამბობს, რომ თუ მესამე პრეზიდენტის ჯანმრთელობის მდგომარეობა გაუარესდება, ის გადაყვანილი იქნება მხოლოდ ციხის საავადმყოფოში. 

● იუსტიციის მინისტრის, რატი ბრეგაძის მტკიცებით, ციხის კლინიკა აკმაყოფილებს მრავალპროფილური საავადმყოფოს კრიტერიუმებს და შეუძლია მოშიმშილე პატიმრის ჯანმრთელობის მართვა. 

● სახალხო დამცველის სპეციალურმა წარმომადგენელმა ციხის იმ საავადმყოფოს მზადყოფნის ხარისხი შეამოწმა, სადაც მესამე პრეზიდენტს უპირებენ გადაყვანას.სახალხო დამცველის განცხადებაში ნათქვამია, რომ ციხის საავადმყოფოში არსებული ვითარება სრულფასოვნად არ შეესაბამება ექიმთა მულტიფუნქციური ჯგუფის მიერ გაცემულ დასკვნასა და რეკომენდაციებს, ასევე, არსებობს გარკვეული რისკები უსაფრთხოების თვალსაზრისით.

● მიხეილ სააკაშვილის მდგომარეობის მონიტორინგისთვის შექმნილი ექიმთა კონსილიუმი კარდიოლოგმა ზურაბ ფაღავამ დატოვა. ექიმის თქმით, კონსილიუმის დატოვების მიზეზი მისი გაუარესებული ჯანმრთელობის მდგომარეობაა.

ექიმი ეკატერინე მხეიძე, რომელიც 2018 წლის აპრილიდან ჰოლანდიაში მიხეილ სააკაშვილის ჯანმრთელობაზე ზრუნავდა, ამბობს, რომ მდგომარეობა ძალიან საშიშია:

“არ არის მიღებული პაციენტის ჯანმრთელობის შესახებ საჯაროდ საუბარი, მაგრამ როცა ასეთი ექსტრემალური და ძალიან, ძალიან საშიში მდგომარეობაა, ჩემს თავს მივცემ უფლებას, ვილაპარაკო. 

მას ჰქონდა თანდაყოლილი დაავადებები, რომლებიც შეიძლება დაავადებად არც ჩაითვალოს, თუ ადამიანი ნორმალურად იკვებება, თანდაყოლილი პათოლოგიები, რომლებიც ნორმალურ პირობებში არ წარმოადგენს საშიშროებას. მაგრამ 26-დღიანი შიმშილობის შემდეგ ქმნის ძალიან დიდ რისკს.”

ექიმის თქმით,  შეიძლება სააკაშვილის მდგომარეობა ისე დამძიმდეს, რეანომობილმა ვერც მიუსწროს.

კატეგორიულად მოვითხოვ და გაფრთხილებთ – ეს ისეთი ზღვარია, რომელიც მეტ მოცდას აღარ ექვემდებარება. ეს შეიძლება ყოველ წამს მოხდეს და ამის მერე რეანომობილი რომ მოვა და მას სადღაც გადაიყვანს, გზაშიც კი შეიძლება უკუქცევადი პროცესები განვითარდეს. 

გაფრთხილებთ, ეს ისეთი საშიში რისკია – გთხოვთ, ბატონი მიხეილი გადაიყვანოთ ისეთ კლინიკაში, სადაც იქნება 24-საათიანი დაკვირვების საშუალება”. – ამბობს ეკატერინე მხეიძე. 

● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
● თავისუფლება მიშას: რას ფიქრობენ ექსპერტები ბოლო ცხრა წლის ყველაზე ხალხმრავალ აქციაზე

კიდევ ერთი ექიმი, წამების მსხვერპლთა რეაბილიტაციის ცენტრი “ემპათია”-ს პრეზიდენტი, მარიამ ჯიშკარიანი აცხადებს, რომ სააკაშვილი ცალსახად გადასაყვანია სამოქალაქო ტიპის მულტიპროფილურ კლინიკაში, ვინაიდან ასეთია იმ კონსილიუმის დასკვნა, რომელიც ჯანდაცვის სამინისტრომ თავად შექმნა.

ჯიშკარიანის განმარტებით, N18 დაწესებულების საავადმყოფოს არ აქვს შესაბამისი რესურსები ხანგრძლივად მოშიმშილე სააკაშვილის სამკურნალოდ და გარდა არასაკმარისი რესურსებისა, სააკაშვილის ამ დაწესებულებაში გადაყვანა შესაძლოა ღირსების შემლახველ მოპყრობადაც განიხილებოდეს, ვინაიდან საავადმყოფო მე-8 საპყრობილის ტერიტორიაზე მდებარეობს.

ექიმის თქმით, სააკაშვილისთვის სამოქალაქო კლინიკაში ჰოსპიტალიზაციაზე უარის მიღმა პოლიტიკური დისკრიმინაციის ნიშნები ჩანს:

“იმის გათვალისწინებით, რომ წელიწადში 500-ზე მეტი პატიმარია სარგებლობს სამოქალაქო კლინიკების მომსახურებით და პაციენტს აქვს უფლება აირჩიოს სამედიცინო დაწესებულება და მკურნალი ექიმი, ჩემთვის გაუგებარია, რატომ ეუბნება ხელისუფლება სააკაშვილს უარს.”

მესამე პრეზიდენტის სანახავად დღეს ციხეში “ნაციონალური მოძრაობის” ერთ-ერთი ლიდერი, კობა ნაყოფია იმყოფებოდა. მისი თქმით, სატელეფონო ზარების აკრძალვის შემდეგ, მიხეილ სააკაშვილის მნახველს წერილს აღარ გაატანენ, შესაბამისად, სააკაშვილისგან წერილის მიღების საშუალება იქნება ფოსტა, ან ადვოკატი.

ნაყოფიას თქმითვე, სააკაშვილს ციხეში ფანჯრებიც დაბურეს.