პოდოლიაკი: (ოცნების ბანერები) არა მხოლოდ უკრაინისთვის, საქართველოსთვისაც შეურაცხმყოფელია
მიხაილო პოდოლიაკი ოცნების ბანერებზე
უკრაინის პრეზიდენტის ოფისის მრჩეველი მიხაილო პოდოლიაკი “ქართული ოცნების” პროპაგანდისტულ ბანერებს ეხმაურება და ამბობს, რომ ეს “არა მხოლოდ უკრაინას აყენებს შეურაცხყოფას, არამედ საქართველოსთვისაც შეურაცხმყოფელია”.
მიხაილო პოდოლიაკმა “ფორმულას” ეთერში, გადაცემა ღამის კომენტარში ისაუბრა რუსეთის მხრიდან მეზობელი ქვეყნების მიმართ აგრესიაზეც.
“რა თქმა უნდა, ნეგატიური რეაქცია მქონდა, იმიტომ რომ აგრესორი არის რუსეთის ფედერაცია, რუსეთს შეუძლია იარსებოს მხოლოდ ომის პირობებში, მეზობელი ქვეყნების დანგრევით და როგორი ბრწყინვალე ინფრასტრუქტურაც არ უნდა გაგაჩნდეთ, რუსეთი, რაღაც მომენტში, შურის და სიძულვილის გამო, შემოვა და ყველაფერს დაანგრევს.
ეს არ არის არავის სურვილი, არც უკრაინის, არც საქართველოს, ეს მხოლოდ რუსეთის სურვილია და ვიღაცას როდესაც მიზეზი და შედეგი ერევა, ნაღმს უდებს საკუთარ მოქალაქეებსა და ქვეყანას, იმიტომ რომ რუსეთი არ გახლავთ ის ქვეყანა, რომელიც საერთაშორისო სამართალს, ორმხრივ ხელშეკრულებებს სცემს პატივს.
რუსეთი ყოველთვის იპოვის მიზეზს, რომ თავს დაესხას ნებისმიერ მეზობელს, იმიტომ რომ თვლის, რომ ამის უფლება აქვს, იმიტომ რომ პოსტსაბჭოთა სივრცე, სადაც ჩვენც და თქვენც იმყოფებით, აღიქვამს, როგორც თავის გავლენის, შესაძლებლობების სფეროს და თვლის, რომ მასთან უნდა შეათანხმო პრეზიდენტის, მინისტრების, დეპუტატების არჩევა და ა.შ.
ეს არის მიუღებელი და რომ შევაჯამოთ ყოველივე აღნიშნული, ეს არა მხოლოდ უკრაინას აყენებს შეურაცხყოფას, არამედ საქართველოსთვისაც შეურაცხმყოფელია.” – თქვა მიხაილო პოდოლიაკმა.
26 სექტემბერს თბილისის ქუჩებში გამოჩნდა ბანერები, სადაც ერთ მხარეს ომისგან დანგრეული, გაპარტახებული უკრაინის ქალაქების შავ-თეთრი ფოტოებია, მეორე მხარეს კი “მშვიდობიანი და ლამაზი” საქართველო.
ეს მმართველი პარტიის წინასაარჩევნო ნოუჰაუა – ამ ფორმით “ქართული ოცნება” ცდილობს ამომრჩევლებს თავისი მთავარი ნარატივი კიდევ ერთხელ მიაწოდოს – “ქართული ოცნების” ხელისუფლება იმდენად ბრძენი და წინდახედულია, რომ საქართველოში მშვიდობაა აი უკრაინელებმა კი, იგივე გამჭრიახობა ვერ გამოიჩინეს, ამიტომ, იქ ომი და ნგრევაა.
მაგალითად, ერთ-ერთ ფოტოზე დონეცკის ოლქის სოფელ ბოგოროდიჩნეში დაბომბვის შედეგად განადგურებული ტაძარი ჩანს, მარჯვნივ კი თბილისის სამების ტაძრის ფერადი ფოტოა. (საინტერესოა, რომ ამ პლაკატისთვის რომელიმე ძველი ქართული ისტორიული ტაძრის ფოტო კი არ აარჩიეს, არამედ რამდენიმე წლის წინ ბიძინა ივანიშვილი მიერ აშენებული ტაძრის)
იმავე დღეს “ქართულმა ოცნებამ” საარჩევნო ვიდეოც გაავრცელა, რომელსაც იგივე შინაარსი აქვს. კადრში მოჩანს განადგურებული უკრაინა და “ფერადი, ლამაზი საქართველო”.
