ზავი ყარაბაღში: მესამე ჰუმანიტარული შეთანხმებაც დაირღვა?
აშშ-ის შუამავლობით, აზერბაიჯანი და სომხეთი ყარაბაღის კონფლიქტის ზონაში, 26 ოქტომბრის დილის 8:00 საათიდან, ჰუმანიტარული ზავის დაწყების შესახებ შეთანხმდნენ.
მაგრამ უკვე ცეცხლის შეწყვეტის პირველ წუთებში, გავრცელდა ინფორმაცია მისი დარღვევის შესახებ.
ყარაბაღის პრეზიდენტი არაიკ არუთუნიანი აშშ-ში მიღწეულ ზავის მიესალმა. მის ძალაში შესვლამდე, რამდენიმე წუთით ადრე, ცეცხლის შეწყვეტის შეთანხმების მკაცრად დაცვის განზრახვის შესახებ განაცხადა Facebook-ის საკუთარ გვერდზე, პრემიერ-მინისტრმა ნიკოლ ფაშინიანმა. ანალოგიური განცხადება გააკეთა აზერბაიჯანის თავდაცვის სამინისტრომაც.
გაეროს გენერალური მდივანი, ანტონიო გუტიერეშ მიესალმა ზავის მიღწევას.
თუმცა, ფაქტობრივად, მისი ძალაში შესვლის დადგომისთანავე, აზერბაიჯანის თავდაცვის სამინისტროს პრესსამსახურმა განცხადება გაავრცელა:
„26 ოქტომბერს, 08:05 საათზე, სომხეთის შეიარაღებულმა ძალებმა, ცეცხლის შეწყვეტის ახალი ჰუმანიტარული რეჟიმის დარღვევით, ქალაქ ლაჩინის მიმართულებით, საარტილერიო დარტყმა განახორციელეს აზერბაიჯანის არმიის ქვედანაყოფებზე, რომელიც ლაჩინის რაიონის სოფელ საფიანში არის განლაგებული“.
რამდენიმე წუთის შემდეგ, აზერბაიჯანის თავდაცვის უწყება კიდევ ერთი განცხადებით გამოვიდა ცეცხლის შეწყვეტის რეჟიმის დარღვევის შესახებ:
„სომხეთის შეიარაღებულმა ძალებმა, ცეცხლის შეწყვეტის ახალი ჰუმანიტარული რეჟიმის დარღვევით, 26 ოქტომბერს, ქალაქი ტერტერი და ამავე რაიონის სოფლები დაბომბა“. ეს ინფორმაცია ტვიტერის საკუთარ გვერდზე დაადასტურა აზერბაიჯანის პრეზიდენტის თანაშემწე ჰიქმეთ გაჯიევმაც.
სომხურმა მხარემ აზერბაიჯანის ეს ბრალდებები უარყო:
„თავდაცვის არმიის ქვედანაყოფები მკაცრად იცავენ მიღწეულ შეთანხმებას და მტრის ბრალდებებს არა მხოლოდ არაფერი აქვს საერთო რეალობასთან, არამედ, გაკეთებულია სამომავლო პროვოკაციებისთვის საინფორმაციო ბაზის მომზადების კონტექსტში“, – ნათქვამია ყარაბაღის თავდაცვის სამინისტროს განცხადებაში.
ძალიან მალე, გავრცელდა სომხეთის თავდაცვის სამინისტროს პრესმდივნის განცხადებაც. შუშან სტეფანიანმა Facebook-ის საკუთარ გვერდზე დაწერა:
„აშშ-ში მიღწეული ცეცხლის შეწყვეტის ჰუმანიტარული შეთანხმების უხეში დარღვევით, აზერბაიჯანულმა მხარემ, დაახლოებით, 8:45 საათზე, არტილერიით დაბომბა სამხედრო პოზიციები არცახის სამხრეთ-აღმოსავლეთში“.
ერთი წუთის შემდეგ, მან მეორე მსგავსი შინაარსის განცხადება გამოქვეყნა:
„მორიგი დარღვევა დაფიქსირდა 09:10 საათზე. მოწინააღმდეგემ მიზანში ამოიღო სამხრეთ-აღმოსავლეთ მიმართულებით არსებული პოზიციები და ამ მიმართულებით 5 საარტილერიო ჭურვი გაუშვა“.
