Le Figaro: მიხეილ სააკაშვილი დაპატიმრების შემდეგ მოწამლეს
Le Figaro: მიხეილ სააკაშვილი მოწამლეს
ავტორიტეტული ფრანგული გამოცემა Le Figaro მიხეილ სააკაშვილის ჯანმრთელობასთან დაკავშირებით სტატიას აქვეყნებს, სადაც ამერიკელ ექიმებზე დაყრდნობით წერს, რომ ყოფილი პრეზიდენტი დაპატიმრების შემდეგ ციხეში მოწამლეს.
გამოცემის მიხედვით, ამერიკელი მეცნიერების მიერ ჩატარებული ანალიზებით ექსპრეზიდენტის ორგანიზმში დარიშხანი აღმოაჩინეს. Le Figaro-ს განმარტებით, მძიმე მეტალების კვალი, კონკრეტულად ვერცხლისწყლისა და დარიშხანის ნაპოვნია მის თმასა და ფრჩხილებში. მიხეილ სააკაშვილი მოწამლულია მისი დაპატიმრების შემდეგ.
სტატიაში ასევე აღნიშნულია, რომ მონაცემები აშშ-ის ორ დამოუკიდებელ ლაბორატორიაში გაანალიზეს.
“ეჭვგარეშეა: თუ მას ადეკვატური მკურნალობისთვის ევროპულ ან ამერიკულ საავადმყოფოში არ გადაიყვანენ, მიხეილ სააკაშვილი ციხეში დაიღუპება.” – ვკითხულობთ სტატიაში.
● მედია, პოლიტიკური დევნა, სააკაშვილი და სხვა – ევროპარლამენტმა საქართველოზე კომპრომისული რეზოლუცია მიიღო
● “სააკაშვილის პოლიტპატიმრად მოხსენიების გამო” – მმართველმა პარტიამ მხარი არ დაუჭირა PEACE-ს ისტორიულ რეზოლუციას
● სააკაშვილის საქმეები. რისთვის ზის ციხეში ყოფილი პრეზიდენტი
2 დეკემბერს გამოქვეყნდა ამერიკაში ჩატარებულ ტოქსიკოლოგიურ ექსპერტიზა, რომელსაც პროფესორი დეივიდ სმიტი აწერს ხელს. დასკვნაში წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
ტოქსიკოლოგიურ დასკვნაში 3 ძირითად საკითხზეა საუბარი: ორგანიზმში მძიმე მეტალების არსებობაზე, მისი მკურნალობის პროცესში მედიკამენტების ჭარბ, არამიზნობრივ გამოყენებასა და პოლიფარმაციის [პოლიფარმაცია არის დაავადების სამკურნალოდ მედიკამენტების ჭარბი, არამიზნობრივი გამოყენება – JAMnews} შედეგად ტვინის ქერქის დაზიანებაზე.
სმიტის თქმით, წამლების დანიშვნისას, განსაკუთრებით მაშინ, როცა რამდენიმე მედიკამენტის მიღება ერთდროულად ხდება, მედიკოსებს ევალებათ, დანიშნონ სწორი წამალი, სწორი დოზით და სწორი ხანგრძლივობისთვის და მათი მიღება პაციენტმა გონივრულ დროს უნდა შეწყვიტოს.
ექსპერტის დასკვნის მიხედვით, სააკაშვილის მკურნალობის შესახებ ოფიციალური მონაცემებისა და სამედიცინო დოკუმენტების მიხედვით, ის დაპატიმრების შემდეგ 14 სხვადასხვა მედიკამენტს იღებდა და პოლიფარმაცია სწორედ ამ 14 წამლის დანიშვნის შედეგია, რომელიც იწვევს დისფუნქციას, მათ შორის თეთრი ნივთიერების შემცირებას ტვინის პრეფრონტალურ ქერქში, რომელიც ტვინში აღმასრულებელ ფუნქციებზეა პასუხისმგებელი. ექსპერტის აზრით, ტვინის ადეკვატური აღდგენისთვის ამ წამლებისგან დეტოქსიკაციაა საჭირო.
იმავე დღეს, მიხეილ სააკაშვილი კლინიკა ვივამედში მოინახულეს სპეციალური საგამოძიებო სამსახურის წარმომადგენლებმა, რომლებმაც ტოქსიკოლოგიური ექსპერტიზა ჩაატარეს. როდის იქნება დასკვნა, ჯერჯერობით უცნობია.
● “ქვეყნის არევა უნდათ”, “ემპათია ნაცმოძრაობასთანაა კავშირში” – კობახიძე სააკაშვილის სამედიცინო დასკვნას ეხმაურება
● ოლექსეი არესტოვიჩი: თუ სააკაშვილი ციხეში მოკვდება საქართველოს მთავრობა ამას ვერასდროს ჩამოირეცხავს
პირველ დეკემბერს ცენტრმა “ემპათია” მიხეილ სააკაშვილის ჯანმრთელობის მდგომარეობასთან დაკავშირებით სამედიცინო დასკვნა გამოაქვეყნა, რომლის მიხედვით, სააკაშვილს ოცზე მეტი დიაგნოზი თუ სიმპტომი აქვს – მათგან, დაახლოებით ათი პატიმრობასთან შეუთავსებელია.
“ემპათიაში” აცხადებენ, რომ ძირითადი დიაგნოზები არ საჯაროვდება. დასკვნაში ვკითხულობთ, რომ მიხეილ სააკაშვილის ამჟამინდელი ჯანმრთელობის მდგომარეობა ფასდება როგორც მძიმე და პატიმრობასთან შეუთავსებელი – ცალკეული დიაგნოზები ცალკეც და ერთობლიობაში გამოიწვევს ჯანმრთელობის მდგომარეობის შეუქცევად მოშლას, სიცოცხლის ხანგრძლივობის შემოკლებას და სიკვდილსაც, თუკი მას არ მიეცემა შესაძლებლობა მიიღოს ადეკვატური დიაგნოსტიკისა და მკურნალობის უფლება.
მათივე ცნობით, სააკაშვილს აქვს დაუდგენელი ეტიოლოგიის ცხელება, ანორექსია, წონაში სწრაფი კლება, კუნთების, სახსრების ძვლების ტკივილი, კუნთების განლევა, რომელიც შესაძლოა წარმოადგენდეს “დაუდგენელი ინფექციური პროცესის ან/და შესაძლო ინტოქსიკაციის შედეგებსაც”.
28 ნოემბერს თბილისის საქალაქო სასამართლოში სააკაშვილის წინააღმდეგ ახალი პროცესი დაიწყო (ე.წ. საზღვრის კვეთის საქმე – სააკაშვილის საქართველოში გასულ ოქტომბერს სახელმწიფო საზღვრის უკანონოდ გადაკვეთის შედეგად შემოვიდა). პროცესზე თავად სააკაშვილიც უნდა მიეყვანათ, თუმცა, ჯანმრთელობის გაუარესებული მდგომარეობის გამო, ექს-პრეზიდენტმა სხდომაზე დასწრება ვერ შეძლო. მოსამართლე ნინო ჩახნაშვილმა სხდომა თარიღის განსაზღვრის გარეშე გადადო.
პრეზიდენტმა, სალომე ზურაბიშვილმა 24 ნოემბერს განაცხადა, რომ მიხეილ სააკაშვილის ჯანმრთელობის მდგომარეობა ქვეყნის რეპუტაციისთვის მნიშვნელოვანია და თუ ჯანმრთელობის მდგომარეობა “ამ დონეზეა დაზიანებული”, სასამართლომ უნდა მიიღოს ღირსეული გადაწყვეტილება.
საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული.
ოჯახი მის საზღვარგარეთ სამკურნალოდ გადაყვანას ითხოვს.
