ლატვიის პრეზიდენტი: კანდიდატის სტატუსის შეჩერებით საქართველოს მთავრობას მკაფიო სიგნალი უნდა გაეგზავნოს
ლატვიის პრეზიდენტი კანდიდატის სტატუსზე
ლატვიის პრეზიდენტის, ედგარს რინკევიჩსის თქმით, საქართველოში შექმნილი ვითარება ევროკავშირისგან სასწრაფო და მკაცრ რეაგირებას მოითხოვს. როგორც პრეზიდენტი განმარტავს, ევროკავშირმა კანდიდატის სტატუსის შეჩერებით საქართველოს მთავრობას მკაფიო სიგნალი უნდა გაუგზავნოს, რათა სიტუაცია არ გაუარესდეს. ამის შესახებ ლატვიის პრეზიდენტმა საერთაშორისო კონფერენციაზე – Riga StratCom Dialogue 2024 – განაცხადა.
“თუ ჩვენ არ გავუგზავნით ძალიან მკაფიო და ძალიან ძლიერ სიგნალს [საქართველოს მთავრობას] და მხოლოდ სიტყვიერ შეშფოთებას გამოვხატავთ, სიტუაცია გაუარესდება“, – განაცხადა ედგარს რინკევიჩსმა.
ლატვიის პრეზიდენტმა საქართველოს მთავრობას მოუწოდა, გაითვალისწინოს თავისი საზოგადოების სურვილები და არ დაემორჩილოს გარე გავლენებს, რამაც შეიძლება ხელი შეუშალოს ქვეყნის დემოკრატიულ განვითარებას.
მან ხაზი გაუსვა, რომ ლატვია მხარს დაუჭერს საქართველოს, მაგრამ მხოლოდ იმ შემთხვევაში, თუ ქვეყანა პატივს სცემს დემოკრატიისა და კანონის უზენაესობის პრინციპებს.
გუშინ ევროკავშირის ელჩმა საქართველოში, პაველ ჰერჩინსკიმ სტუდენტებთან საუბრისას განაცხადა, რომ {უვიზო რეჟიმის შეჩერებით} ქართველი ხალხი არ უნდა დაისაჯოს და საფასური გადაიხადოს იმისთვის, რაც მათ არ გაუკეთებიათ. მისივე თქმით, უვიზო რეჟიმის გაუქმების ალბათობა დაბალია. ჰერჩინსკიმ ასევე აღნიშნა ევროკავშირის პოზიცია არ შეცვლილა და გაერთიანებაში ელიან, როდის დაიკავებს საქართველო “კუთვნილ სკამს მაგიდის გარშემო.”
“ძირითადად არის რაღაცები, რაც არ მოგვწონს და ახლა ვუყურებთ, სად გავწყვეტთ, სად შევზღუდავთ, სად უკან დავიხევთ და სად გავართულებთ. და როგორც ევროკავშირის ელჩი საქართველოში ვამბობ, რომ ეს გულდასაწყვეტია, რადგან ძალიან ვცდილობდით შეგვენარჩუნებინა “მეტი მეტისთვის” დამოკიდებულება, მაგრამ ახლა გამოსავალი არ გვაქვს, რომ არ გადავიდეთ – “ნაკლები ნაკლებისთვის.” – თქვა ჰერჩინსკიმ.
