კრემლი ყველა წესის საწინააღმდეგოდ აგრძელებს აფხაზეთის პრეზიდენტობის კანდიდატის მხარდაჭერას
კრემლი აგრძელებს გუნბას დახმარებას
აფხაზეთის ცენტრალურმა საარჩევნო კომისიამ (ცესკო) პრეზიდენტობის კანდიდატი ბადრა გუნბა გააფრთხილა, რომ საარჩევნო კამპანიისას ადმინისტრაციული რესურსის გამოყენება დაუშვებელია. თუმცა, რეალურად საუბარია კრემლის დახმარებაზე, რომელიც გუნბას უპრეცედენტო მხარდაჭერას უცხადებს.
კერძოდ, მოსკოვი გუნბას თანამდებობის პირად აღიქვამს, მიუხედავად იმისა, რომ ის ამჟამად ასეთ სტატუსს არ ფლობს.
რუსი მინისტრები და ფედერალური უწყებების ხელმძღვანელები ხშირად ჩადიან აფხაზეთში და გუნბას თანდასწრებით სოხუმს სხვადასხვა საჩუქრებს გადასცემენ – დაწყებული სასკოლო სახელმძღვანელოებით, დასრულებული სასწრაფო დახმარების მანქანებით.
გუნბასთვის სპეციალურად ეწყობა კულტურული და საზოგადოებრივად მნიშვნელოვანი ღონისძიებები.
ამასთან, გავრცელებული ინფორმაციით, თითქოსდა გუნბას თხოვნით, რუსეთის პრეზიდენტმა ვლადიმირ პუტინმა მთავრობისთვის დავალება გასცა, განეხილათ აფხაზეთის ახალგაზრდობის “მრავალ პროექტში“ ჩართვის შესაძლებლობა.
მოსკოვის ეს ქმედებები აშკარად მიზნად ისახავს აფხაზეთის ამომრჩევლებისთვის გუნბას შეუცვლელობის იდეის დანერგვას და, შესაბამისად, მას მეორე ტურში – რომელიც 1 მარტს გაიმართება – მეტი ხმის მოპოვებაში დახმარებას.
- სოხუმის რეკონსტრუირებული აეროპორტი სატესტო რეჟიმში გაიხსნა. პირველი მგზავრი კრემლის ფავორიტი იყო
- კრემლმა თბილად მიიღო აფხაზეთის ე.წ. პრეზიდენტობის კანდიდატი, მაგრამ სოხუმმა ეს უკანონოდ მიიჩნია
აღსანიშნავია, რომ გასულ პარასკევს, 21 თებერვალს, გუნბამ და მისმა მეტოქემ, ოპოზიციის კანდიდატმა ადგურ არძინბამ ხელი მოაწერეს შეთანხმებას, რომელიც სამართლიანი კონკურენციის ვალდებულებას ითვალისწინებდა.
თუმცა, უკვე კვირას, 23 თებერვალს, გუნბამ ეს შეთანხმება დაარღვია – სოხუმში რუსეთის ჯანდაცვის მინისტრს, მიხაილ მურაშკოს შეხვდა და მასთან ერთად ბავშვთა საავადმყოფოს მშენებლობა დაათვალიერა.
თავის განცხადებაში ცენტრალურმა საარჩევნო კომისიამ ეს ინციდენტი ახსენა, მაგრამ ყველაზე ფრთხილი ფორმით. პასუხისმგებლობა, ძირითადად, აფხაზეთის ჯანდაცვის მინისტრის მოვალეობის შემსრულებელ ედუარდ ბუთბას დააკისრეს, რომელიც შეხვედრის მესამე მონაწილე იყო.
“ედუარდ ბუთბას ეს შეხვედრა შეიძლება ჩაითვალოს კანდიდატის სასარგებლოდ აგიტაციაში მონაწილეობად, რაც საარჩევნო კანონმდებლობის მოთხოვნებს არღვევს“, – ნათქვამია ცესკოს განცხადებაში.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
