საქართველოში კორონავირუსით ინფიცირებულთა რაოდენობა 485-მდე გაიზარდა

ბოლო 24 საათის განმავლობაში საქართველოში კორონავირუსით ინფიცირების 29 ახალი შემთხვევა გამოვლინდა.

26 აპრილის მონაცემებით, საქართველოში კორონავირუსით ინფიცირების 485  შემთხვევაა დადასტურებული. კარანტინის რეჟიმშია 4928 ადამიანი, ხოლო სტაციონარში მეთვალყურეობის ქვეშ – 522 პირი. კორონავირუსით ინფიცირებულთაგან 139 გამოჯანმრთელდა და 6  გარდაიცვალა. 

უცხოეთიდან საქართველოში სამკურნალოდ გადმოყვანილია  კორონავირუსით ინფიცირებული საქართველოს 3 მოქალაქე.

კორონავირუსის პირველი შემთხვევა დაფიქსირდა ახალციხეში. ინფიცირებული შუახნის მამაკაცია. ის ახალციხის კლინიკა “იმედში“ საკარანტინო ზონიდან გადაიყვანეს. 

• მთავრობის ანტიკრიზისული გეგმა – ვინ რა დახმარებას მიიღებს
• როგორ მოიხსნება შეზღუდვები – მთავრობის გეგმა
• ბრძოლა COVID-19-თან საქართველოში: “სიბნელეში ხელის ცეცებით”. საუბარი ზურაბ ჭიაბერაშვილთან

კორონავირუსი დაუდასტურდა თეთრიწყაროს ადგილობრივი საავადმყოფოს ექთანსაც. მისი დაინფიცირების წყარო ამ დროისთვის უცნობია. თეთრიწყაროში ახლა ეპიდემიოლოგების ჯგუფი მუშაობს.  ისინი პირველ რიგში კორონავირუსზე მედპერსონალს ამოწმებენ.  

კრონავირუსის გავრცელების მხრივ ყველაზე მძიმე მდგომარეობა ბოლნისის მუნიციპალიტეტშია, სადაც covid-19 80 ადამიანს დაუდასტურდა. 

თბილისის ინფექციური საავადმყოფოს დირექტორი თენგიზ ცერცვაძე აცხადებს, რომ კორონავირუსის გავრცელების პიკი აპრილის ბოლოს იქნება და ონფიცირებულთა საერთო რაოდენობა 1000-ს არ გადააჭარბებს. 

“პიკს მოველით ამ თვის ბოლოს. შემდეგ, იქნება 1-2 კვირიანი პლატო და წავა დაღმავალი გზით. ძნელი საპასუხოა, რამდენი იქნება პიკის მომენტში ავადმყოფების რაოდენობა. ვვარაუდობ, რომ 1 000 შემთხვევას არ უნდა გადაცდეს,” -ამბობს ცერცვაძე.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.