კორონავირუსით 119 მედიკოსი დაინფიცირდა საქართველოში, 1 კი გარდაიცვალა

საქართველოში covid-19-ის გამოვლენის პირველი შემთხვევიდან, 2020 წლის 26 თებერვლიდან 11 ივნისამდე, კორონავირუსით 119 მედიკოსი დაინფიცირდა, მათგან ერთი – გარდაიცვალა. 

17  ივნისის მონაცემებით, საქართველოში კორონავირუსით ინფიცირების 888 შემთხვევაა დადასტურებული. კარანტინის რეჟიმშია 2710 ადამიანი, ხოლო სტაციონარში მეთვალყურეობის ქვეშ – 267 პირი. კორონავირუსით ინფიცირებულთაგან 731 გამოჯანმრთელდა და 14  გარდაიცვალა.

კორონავირუსით ინფიცირებული მედპერსონალიდან გარდაიცვალა ერთი ექთანი, 70 წლის ქალი, რომელიც  ქვემო ქართლიდან იყო.

დაავადებათა კონტროლის ეროვნული ცენტრის ინფორმაციით, კორონავირუსით ინფიცირებული 119 მედიკოსიდან (რაც ინფიცირებულთა საერთო რაოდენობის 14,4 პროცენტია) 101 ადამიანი უშუალოდ სამედიცინო პერსონალი იყო,  ხოლო 18 – ტექნიკური პერსონალი.

• თელავის ბაზარი და კორონავირუსი. VIDEO
• ვირუსის აფეთქება სომხეთში – მიზეზები და დასკვნები საქართველოსთვის
• პლასტელინის ადამიანები კარანტინიდან გამოდიან

კორონავირუსით ინფიცირებული 119 მედიკოსიდან 31 იყო ექიმი, 58 – ექთანი, 10 სანიტარი და 1 ეპიდემიოლოგი. 

ინფიცირებული სამედიცინო პერსონალის უდიდეს ნაწილი  – 84% ქალია. მათი საშუალო ასაკი 41 წელია, ასაკობრივი დიაპაზონი კი – 19-72 წელი.

ყველაზე მეტი მედიკოსი აპრილში დაინფიცირდა.  მათი დიდი ნაწილი კოვიდის მიმღები კლინიკების სამედიცინო პერსონალი  იყო. 

ზოგ შემთხვევაში სამედიცინო პერსონალი თავად გახდა საზოგადოებაში დაავადების გავრცელების მიზეზი. ასე მოხდა, მაგალითად, ე.წ. საბურთალოს კლასტერის შემთხვევაში, როდესაც ინფიცირებულმა ექთანმა 27 ადამიანი დააინფიცირა.