რობერტ კოჩარიანი: პრემიერობისთვის ბრძოლა გაგრძელდება

სომხეთში, ახალი პარლამენტი აირჩიეს. წინასწარი შედეგების გამოცხადების შემდეგ, ბლოკმა „აიასტანმა“, რომლის ლიდერი ექსპრეზიდენტი რობერტ კოჩარიანია, განაცხადა, რომ არჩევნების შედეგები საეჭვოდ გამოიყურება. ადგილობრივი და უცხოელი ჟურნალისტებისთვის გამართულ პრესკონფერენციაზე კი რობერტ კოჩარიანმა განაცხადა, რომ მოქმედი ხელისუფლების ქმედებები ახალ რიგგარეშე არჩევნებს გამოიწვევს და ბლოკი „აიასტანი“ გააგრძელებს ბრძოლას ხელისუფლებისა და პრემიერ-მინისტრის პოსტისთვის.

ცესკოს წინასწარი მონაცემებით, ახლა პარლამენტში შევიდნენ პრემიერ-მინისტრობის მოვალეობის შემსრულებლის, ნიკოლ ფაშინიანის პარტია „სამოქალაქო ხელშეკრულება“, ექსპრეზიდენტ რობერტ კოჩარიანის ბლოკი „აიასტანი“ და ასევე, ეროვნული უსაფრთხოების სამსახურის ყოფილი უფროსის არტურ ვანეციანისა და სომხეთის ყოფილი პრეზიდენტის, სერჟ სარგსიანის ერთ ბლოკად გაერთიანებული პარტიები.

• პარლამენტის ვადამდელი არჩევნების შედეგების შესახებ – ვიდეოგამოკითხვა ერევანში
• „სხვა“ პარლამენტი სომხეთში: კონსოლიდაცია თუ დესტაბილიზაცია?
• არჩევნების შედეგები სომხეთში: „ხავერდოვანი“ რევოლუცია „ფოლადისამ“ შეცვალა

ხელისუფლებისთვის ბრძოლა გაგრძელდება

რობერტ კოჩარიანმა განაცხადა, რომ ხელისუფლებისთვის ბრძოლა მხოლოდ იმ შემთხვევაში შეწყდება, თუკი მოქმედი ხელისუფლება გადადგება:

„და კიდევ რა მიზნით შევდივართ პარლამენტში? ფიქრობთ, რომ პარლამენტში რაღაც მანდატების გამო შევდივართ? […] თუკი მოქმედი ხელისუფლება წავა, ქვეყანაში ჩამოყალიბდება ეროვნულ ინტერესებზე ორიენტირებული მთავრობა, მაშინ თავს თავისუფალ ადამიანად ჩავთვლი და დავფიქრდები პოლიტიკური ბრძოლის შეწყვეტაზე. მანამდე ჩვენ ვიბრძოლებთ იმისათვის, რომ ქვეყანაზე პასუხისმგებლობა საკუთარ თავზე ავიღოთ“.

ამასთან ერთად, ექსპრეზიდენტმა ხაზი გაუსვა, რომ საკუთარ თავს პარლამენტში ვერ ხედავს:

„მე უფრო აღმასრულებელი ხელისუფლების ადამიანი ვარ, ვიდრე საკანონმდებლო. ამიტომ, ვერ წამომიდგენია საკუთარი თავი ეროვნულ კრებაში. მაგრამ საბოლოო გადაწყვეტილება ჯერჯერობით არ მიმიღია“.

ექსპრეზიდენტმა ასევე კომენტარი გააკეთა არჩევნების მეორე დღეს, რესპუბლიკის მოედანზე გამართულ ნიკოლ ფაშინიანის მრავალრიცხოვან მიტინგზე. ღონისძიების შემდეგ მას შთაბეჭდილება დარჩა, რომ მოქმედი ხელისუფლების ქმედებებში არაფერი არ შეიცვლება:

„თუკი მთავრობა გააგრძელებს ისე მოქმედებას, როგორც აქამდე აკეთებდა, როდესაც სხვებს რეპრესიებითა და ვენდეტებით აშინებდა, ჩვენ ძალიან მალე აღმოვჩნდებით ახალი რიგგარეშე არჩევნების პირისპირ. ეს პერმანენტულ ხასიათს მიიღებს, სანამ ისინი ვერ გაიგებენ, რომ შიდა პოლიტიკის ასე გატარება უბრალოდ არ შეიძლება“.

ყოფილ პრეზიდენტს მიაჩნია, რომ 2018 წელს, როდესაც „ხავერდოვანი“ რევოლუცია მოხდა, ხელისუფლებამ ძალიან დიდი ნდობის კრედიტი მიიღო და შეეძლო ქვეყანა სწორი მიმართულებით წაეყვანა:

„მაგრამ ისინი წავიდნენ ვენდეტების, პირადი ანგარიშსწორების გზით. ეს ყარაბაღის დაკარგვით, ეკონომიკური და შიდაპოლიტიკური კრიზისით დამთავრდა“.

არჩევნებზე დარღვევების შესახებ

რობერტ კოჩარიანმა განაცხადა, რომ ბლოკ „აიასტანის“ საარჩევნო შტაბში აგროვებენ დარღვევების შესახებ მასალებს საკონსტიტუციო სასამართლოსთვის მისამართად. მისი თქმით, შედეგები მათთვის მოულოდნელი იყო, რადგან გამოკითხვები სრულიად სხვა სურათს აჩვენებდა:

„ვეჭვობთ, რომ ადგილი ჰქონდა მასობრივ დარღვევებს, ვნახეთ ადმინისტრაციული რესურსის აშკარა გამოყენების ფაქტები და ამიტომ საკონსტიტუციო სასამართლოს მივმართავთ“.

მანდატი, რომელიც ამ ხელისუფლებამ მიიღო, არ არის ნდობის მანდატი, დარწმუნებულია ექსპრეზიდენტი:

„გავაგრძელებთ ბრძოლას. საპარლამენტო ბრძოლა გააძლიერებს ჩვენს ქუჩის ბრძოლას. აქტიური მხარდამჭერები გვყავს, რომლებსაც ქუჩის ბრძოლის დიდი გამოცდილება აქვთ. ამ არჩევნებმა პოლიტიკური ლანდშაფტი შეცვალა. პარლამენტში ჩვენი შესვლა, ცუნამის მსგავსი რამ იყო. ჩვენ შევინარჩუნებთ ამ ტემპსა და დინამიკას. ყველანაირი პოტენციალი გვაქვს“.

ჩამოართმევს თუ არა კოჩარიანი ფაშინიანს „შერიგების ხელს“

პარტია „სამოქალაქო ხელშეკრულების“ შტაბბინაში, ამომრჩეველთა ხმების დათვლის ღამეს სიტყვით გამოსვლისას, ნიკოლ ფაშინიანმა განაცხადა, რომ მზად არის მოლაპარაკებები დაიწყოს პოლიტიკურ ძალებთან, „რომლებიც დიალოგისთვის არიან განწყობილი“.

რობერტ კოჩარიანს ამის არ სჯერა:

„თქვენ შენიშნეთ გამოწვდილი „შერიგების ხელი“? მე ვერ დავინახე. ეს ხელისუფლება მხოლოდ იტყუებოდა და მისთვის დაჯერება უბრალოდ არ შეიძლება. ხელისუფლება, რომელიც 44 დღის განმავლობაში იტყუებოდა (ამდენ ხანს გაგრძელდა 2020 წლის შემოდგომაზე ყარაბაღის მეორე ომი), აცხადებს რაღაცას, შემდეგ კი მათგან ვიღაც საპირისპიროს ამბობს.

არ შემიძლია დავუჯერო, განსაკუთრებით მაშინ, როდესაც ცნობილ ექიმს, არმან ჩარჩიანს დაპატიმრებას უპირებენ სასაცილო ბრალდებით (მოითხოვდა, რომ კლინიკის თანამშრომლები, რომელსაც ის ხელმძღვანელობს, არჩევნებზე წასულიყვნენ და ბრალდებულია ამომრჩეველზე ზეწოლაში). და პირები, რომლებიც დამნაშავეები არიან 5 ათასი ადამიანის დაღუპვაში (საუბრობს ყარაბაღის მეორე ომში დაღუპულებზე), ცდილობენ დააპატიმრონ ექიმი, რომელმაც ათასობით სიცოცხლე გადაარჩინა. სწორედ ეს არის ხელისუფლების ნამდვილი სახე“.

ექსპრეზიდენტი დარწმუნებულია, რომ მთავრობა ვენდეტის ახალ სერიას დაიწყებს, მაგრამ იმ ბლოკის პოლიტიკური ბრძოლა, რომელსაც ის არჩევნების დროს ჩაუდგა სათავეში, კანონის ფარგლებში გაგრძელდება:

„ჩვენ არ გამოვიყვანეთ ადამიანები არჩევნების შემდეგ ქუჩაში. მიგვაჩნია, რომ მთელი პროცესი სამართლებრივი კურსით უნდა წარიმართოს“.