კელი დეგნანი "ქართულ ოცნებას": გეკითხებით, რა მოტივი გაქვთ?
კელი დეგნანი “ქართულ ოცნებას
აშშ-ს ელჩი კელი დეგნანი “ქართული ოცნებიდან” გასული დეპუტატის, მიხეილ ყაველაშვილის წერილს პასუხობს და ამბობს, რომ ყაველაშვილის წერილი ოცნების ნარატივის გამოძახილია. ის მმართველ პარტიას მიმართავს კითხვით: რა მოტივი გაქვთ?
დეპუტატმა მიხეილ ყაველაშვილმა, საქართველოში აშშ-ს ელჩს ღია წერილით მიმართა და მოუწოდა, ამერიკის იმიჯის დასაცავად “ნაციონალური მოძრაობის” პროვოკაციებსა და ტექნიკური მთავრობის მოთხოვნებს საჯაროდ გაემიჯნოს.
ყაველაშვილის აზრით, კელი დეგნანი უკრაინის პრეზიდენტის მიერ საქართველოდან ელჩის გაწვევის გადაწყვეტილებასაც უნდა გამიჯვნოდა. დეპუტატი ასევე წერს, რომ მისთვის გაუგებარია, “რატომ უწყობენ ხელს თქვენი დაფინანსებული თუ თქვენს მიერ მოწონებული ენჯეოები, პარტიები და ტელევიზიები საქართველოში ეფესბეს ნარატივის გამყარებას ხელს.”
ყაველაშვილმა ელჩს ასევე შეახსენა, რომ “სამწუხაროდ, თქვენ დღემდე არც თქვენი ერთ-ერთი წინამორბედის, ამერიკის ყოფილი ელჩის, უილიამ კორტნის განცხადებას გაემიჯნეთ”, რომელმაც, როგორც ყაველაშვილი ამბობს, ფილანტროპად წოდებული ბიძინა ივანიშვილი ყოველგვარი საფუძვლის გარეშე ოლიგარქად მოიხსენია და დეოლიგარქიზაციაზე “ნაციონალური მოძრაობის” მესიჯი გაიმეორა.
კელი დეგნანის თქმით, ყაველაშვილის წერილი იმდენად სავსე იყო ტყუილებითა და შეთქმულების თეორიებით, რომ მისი ბოლომდე წაკითხვაც კი ვერ შეძლო. ზოგიერთი დეტალი კი მისთვის ნამდვილად გაუგებარია:
“მაგალითად, მას აშკარად არ ესმის ის, რომ შეერთებული შტატები მხარს არა რომელიმე კონკრეტულ პარტიას, არამედ საქართველოს მოსახლეობას უჭერს. ჩვენ აქ იმისთვის ვართ, რომ მხარი კონსტიტუციით განმტკიცებულ დამოუკიდებელ ინსტიტუტებს დავუჭიროთ, რომელთა მოვალეობაც თითოეული საქართველოს მოქალაქის უფლებების დაცვაა. ძალიან სახიფათოა, როდესაც ასეთ დამოუკიდებელ ინსტიტუტებს ძირს უთხრიან. ასევე, როგორც ჩანს, კვლავ იმეორებენ იმ დეზინფორმაციას, რომლის მცდარობაც არაერთხელ დადასტურდა.”
დეგნანის განმარტებით, შეერთებულ შტატებსა და ევროპას რუსეთ-უკრაინის ომში საქართველოს ჩათრევა არ სურთ და ისინი ყველაფერს აკეთებენ იმისთვის, რომ ეს ომი დასრულდეს – ყველაფერს იმისთვის, რომ ის უკრაინის საზღვრებს არ გასცდეს.
კელი დეგნანის თქმით, ისინი მუშაობენ მშვიდობისთვის და “ვინც ჩვენთან ერთად ამ მხრივ მუშაობს, სწორედ ისაა, ვინც გვერდით გვინდა გვყავდეს.”
“ჩემთვის უცნაურია, რომ ის, რაზეც ყაველაშვილი საუბრობს, ქართული ოცნების პარტიის წევრების ნარატივის გამოძახილია, რომელზეც ძალიან ბევრჯერ ითქვა, რომ აბსოლუტურად მცდარია. ჩემი შეკითხვა შემდეგია: რა არის ამ ყველაფრის მოტივი, რატომ გრძელდება ეს ნარატივი, რომელზეც ვიმეორებ, არაერთხელ ითქვა, რომ ტყუილია?” – განაცხადა ელჩმა.
დეგნანის განცხადებას ასევე გამოეხმაურა მმართველი პარტიის თავმჯდომარე ირაკლი კობახიძე. მისი თქმით, როდესაც დეპუტატს ტყუილში ადანაშაულებ, ეს არის ძალიან სამწუხარო.
“ჩვენ როდესაც ვაკრიტიკებთ, თან არგუმენტებით – აი, ფოტიგა, კუბილიუსი, გალერი და ასე შემდეგ, მართლა გაუგონარ რაღაცებს ამბობენ ხოლმე და გვიწევს გაკრიტიკება, იგივე რეზოლუცია რომ ავიღოთ, გაუგონარი რეზოლუცია იყო და გვიწევდა, ბუნებრივია, გაკრიტიკება.” – აღნიშნა კობახიძემ.
“ქართული ოცნების” სამმა დეპუტატმა, სოზარ სუბარმა, მიხეილ ყაველაშვილმა და დიმიტრი ხუნდაძემ პარტია და საპარლამენტო თანამდებობები 28 ივნისს დატოვეს. ისინი პარლამენტში დამოუკიდებელ დეპუტატებად დარჩებიან.
“ქართული ოცნების” თავმჯდომარის, მამუკა მდინარაძის თქმით, ზემოხსენებულ დეპუტატებს მიაჩნიათ, რომ ე.წ. კულისებიდან პოლიტიკური ფაქტებისა და მოვლენების შესახებ მეტი ინფორმაცია უნდა ვრცელდებოდეს და ამის გახმოვანებისთვის მათ თავისუფალი საპარლამენტო მანდატი სჭირდებათ, რადგან გუნდის შიგნით შესაძლოა, უხერხულობები შეექმნათ.
“ქართული ოცნებიდან” წასულმა დეპუტატებმა პირველი განცხადებაც მალევე გამოაქვეყნეს, რომელსაც ხელისუფლების ოპონენტებმა უკვე უწოდეს ანტიდასავლური შეთქმულების თეორია. ყოფილი დეპუტატების თქმით, საქართველოს კანდიდატის სტატუსს არც 6 თვის თავზე არავინ მიანიჭებს, “თუ მანამდე ომში არ ჩაერთო ან რუსეთს სანქციები არ დაუწესა.”
