კარა-მურზა სააკაშვილს: თქვენ კიდევ ბევრს გააკეთებთ საკუთარი ქვეყნისთვის
კარა-მურზა სააკაშვილზე
რუსეთში დაპატიმრებული ოპოზიციონერი ვლადიმირ კარა-მურზა პატიმრობაში მყოფ საქართველოს მესამე პრეზიდენტს, მიხეილ სააკაშვილს წერილს უგზავნის. სააკაშვილი წერილს საკუთარ ფეისბუქზე აქვეყნებს.
კარა-მურზა წერილში წერს, რომ რომ მიხეილ სააკაშვილი და მისი თანამოაზრეები მისთვის მაგალითია იმისა, თუ როგორ შეიძლება ყოფილი საბჭოთა რესპუბლიკა თანამედროვე დემოკრატიულ ქვეყნად იქცეს.
“ძალიან გამიხარდა, რომ თქვენგან წერილი მივიღე. მადლობა თბილი სიტყვებისთვის. ჩვენთვის თქვენ და თქვენი თანამოაზრეები ვარდების რევოლუციიდან არის მაგალითი იმისა, თუ როგორ არის შესაძლებელი, რამდენიმე წელიწადში ყოფილი საბჭოთა რესპუბლიკა იქცეს თანამედროვე, ღია, დემოკრატიულ ქვეყნად. […]
რა თქმა უნდა, ამჟამინდელი ქართული ნახევრად-პუტინი ხელისუფლება დიდი ხნით არ არის და თქვენ კიდევ ბევრს გააკეთებთ თქვენი ქვეყნისთვის. გაუფრთხილდით საკუთარ თავს მაქსიმალურად, იზრუნეთ ჯანმრთელობაზე. წინ ბევრი საქმეა და ძალა აუცილებლად დაგჭირდებათ.
ჩვენ კი, რუსეთში გარდაუვალი კოლაფსის შემდეგ, სადამდეც პუტინის რეჟიმი მიიყვანს ქვეყანას, მოგვიწევს ყველაფრის სრულად აღდგენა. გვჯერა, რომ მოვახერხებთ, მათ შორის, თქვენი მაგალითით და მჯერა, რომ ევროპა საბოლოოდ შეძლებს, გახდეს ჭეშმარიტად მშვიდობიანი, ერთიანი და თავისუფალი, დემოკრატიულ უკრაინასთან, საქართველოსთან და დემოკრატიულ რუსეთთან ერთად. ეს ჩვენს საერთო ინტერესშია”, – ნათქვამია წერილში.
● ევროპარლამენტარები და ყოფილი პრეზიდენტები – ვინ აწერს ხელს სააკაშვილის მხარდამჭერ წერილს
● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
კრემლის კრიტიკოსს ვლადიმირ კარა-მურზას 25 წლით თავისუფლების აღკვეთა მიესაჯა სახელმწიფოს ღალატისა და სხვა ბრალდებებისთვის, რომლებიც რუსეთის მიერ უკრაინაში წამოწყებული ომის კრიტიკას უკავშირდება.
კარა-მურზა 2022 წლის 11 აპრილს, საკუთარ სახლთან დააკავეს. დაკავების მიზეზად პოლიციამ განმარტა, რომ პოლიტიკოსი „პოლიციის ოფიცრების დანახვისას არასათანადოდ იქცეოდა, იცვლიდა გადაადგილების ტრაექტორიას და [პოლიციის მხრიდან] გაჩერების მოთხოვნის შემდეგ მიმალვა სცადა.”
