ჯეიკ სალივანი: ქართული ოცნების ქმედებების მიზანია ქართველების იზოლირება აშშ-სა და ევროპისგან
ჯეიკ სალივანი რუსულ კანონზე
ეროვნული უსაფრთხოების საკითხებში თეთრი სახლის მრჩეველი, ჯეიკ სალივანი X-ზე წერს, რომ “ქართული ოცნების” ქმედებების მიზანია ქართველების იზოლირება აშშ-სა და ევროპისგან.
“საქართველოში დემოკრატიული უკუსვლის გამო ღრმად შეშფოთებულები ვართ. ქართველი პარლამენტარები დგანან კრიტიკული არჩევანის წინაშე – მხარი დაუჭირონ ქართველი ხალხის ევროატლანტიკურ მისწრაფებებს თუ მიიღონ კრემლის სტილის უცხოელი აგენტების კანონი, რომელიც ეწინააღმდეგება დემოკრატიულ ღირებულებებს.
ბოლო პერიოდში ქართული ოცნების რიტორიკა, შემოთავაზებული საკანონმდებლო ცვლილებები და ქმედებები ეწინააღმდეგება ქართველი ხალხის მისწრაფებებს და მიზნად ისახავს ქართველების იზოლირებას აშშ-სა და ევროპისგან. ჩვენ ქართველი ხალხის გვერდით ვდგავართ.” – წერს სალივანი.
კომენტარი
სალივანის ტვიტს გამოეხმაურა სამხედრო მიმომხილველი და პარტია “ახალის” წევრი ლევან ყურაშვილი.
“საქართველოში შეიძლება სიტყვა “მრჩეველს” დიდ მნიშვნელობას არ ვანიჭებთ, მაგრამ უნდა გვესმოდეს, რეალურად რა ძალაუფლებას ფლობს ეს ადამიანი ამერიკაში.
შორს რომ არ წავიდე, ამ ადამიანის სიტყვა იყო ერთ-ერთი გადამწყვეტი, უკრაინას რა ტიპის იარაღით დაეხმარებოდნენ და რუსეთთან რა დონის ესკალაციაზე წავიდოდნენ.
ეს ადამიანი ასევე მნიშვნელოვნად განსაზღვრავს ამერიკის პოლიტიკას ჩინეთთან, ისრაელთან და ა.შ.
სალივანი არის ძალიან ფრთხილი და მოზომილი ადამიანი. და როგორც წესი, არ არის მკვეთრი მოძრაობების მომხრე (როგორც ამბობენ, პირადად მისგან იბლოკებოდა ძალიან დიდხანს უკრაინისთვის ATACMS-ის რაკეტების გადაცემა).
და ასეთმა ადამიანმა დატვიტა დღეს დილით, სადაც პირდაპირი ტექსტით წერია აგენტების კანონიცა და მოსალოდნელი შედეგებიც.
და ბოლოს, ერთი მნიშვნელოვანი ფრაზა ტვიტში: გაფრთხილება პარლამენტარებს, რომ ისინი აკეთებენ კრიტიკულ არჩევანს.
კრიტიკულ არჩევანს არამარტო ქვეყნისთვის, არამედ საკუთარი თავისთვისაც.
ახლა, იქ მჯდომი ქოცების 90% მაგ ფრაზის მნიშვნელობას ვერ გაიგებს, მაგრამ ვინც ხვდება, ისინი აუხსნიან.
დანარჩენზე სანქციების კოორდინატორი, ბლინკენის თანაშემწე ო’ბრაიენი ჩამოვა მომდევნო კვირაში და ის ისაუბრებს დახურულ კარს მიღმა, პირდაპირი ტექსტით.” – ამბობს ყურაშვილი.
გუშინვე გამოქვეყნდა 29 კონგრესმენის წერილი, რომლებიც საქართველოს პრემიერს, ირაკლი კობახიძეს მიმართავენ და ე.წ. რუსული კანონის კანონპროექტის გაწვევას მოითხოვენ.
განცხადებაში კონგრესმენები შეშფოთებას გამოხატავენ რუსული კანონის შემობრუნებაზე, კანონპროექტის მოწინააღმდეგეების წინააღმდეგ ხელისუფლების გამოყენებულ მეთოდებსა და ივანიშვილის განცხადებაზე. კონგრესმენები მოუწოდებენ კობახიძეს, გაიწვიონ კანონი, წინააღმდეგ შემთხვევაში ისინი შეუერთდებიან სენატის ინიციატივას.
აღსანიშნავია, რომ აშშ-ს 14 სენატორისგან შემდგარმა ორპარტიულმა ჯგუფმა 26 აპრილს გამოაქვეყნა წერილი საქართველოს მთავრობის მიმართ, რომელშიც ამერიკელი კანონმდებლები რუსული კანონის მიღების შემთხვევაში ქვეყნის არაფორმალური მმართველის, ბიძინა ივანიშვილის რეჟიმს სანქციებს, სავიზო შეზღუდვებს და ფინანსური მხარდაჭერის გადახედვას ჰპირდებიან.
გუშინვე ცნობილი გახდა, რომ აშშ-ს სახელმწიფო მდივნის თანაშემწე ევროპისა და ევრაზიის საკითხებში, ჯიმ ო’ბრაიენი 14 მაისს თბილისში ჩამოვა და ხელისუფლების, სამოქალაქო საზოგადოებისა და კერძო სექტორის წარმომადგენლებს შეხვდება. ჯეიმს ო’ბრაიენი აშშ-ის სახელმწიფო დეპარტამენტის სანქციების კოორდინაციის ოფისის ხელმძღვანელი იყო.
მანამდე, ო’ბრაიენის საქართველოში მიმდინარე მოვლენებს X-ზე გამოეხმაურა და აღნიშნა, რომ აშშ ღრმად შეშფოთებულია იმ ადამიანებზე ძალადობით, რომლებიც “კრემლის მიერ შთაგონებულ კანონს” ეწინააღმდეგებიან.
