გლობალური ომის პარტია, ღია მუქარა ოპოზიციის მიმართ და მამაკაცის რძე. ივანიშვილის ინტერვიუ "იმედზე" - მთავარი აქცენტები
ივანიშვილის ინტერვიუ იმედზე
26 ოქტომბრის არჩევნებამდე ხუთი დღით ადრე, მმართველი პარტიის, “ქართული ოცნების” საპატიო თავმჯდომარემ, ბიძინა ივანიშვილმა ვრცელი ინტერვიუ მისცა პროსახელისუფლებო ტელეკომპანია “იმედს”.
ინტერვიუში ივანიშვილმა დიდხანს ისაუბრა გლობალური ომის პარტიაზე, რომელსაც საქართველოს ომში ჩათრევა სურს; თქვა, რომ ოპოზიცია არის დასავლური ძალების მიერ მართული; ღიად და პირდაპირ დაემუქრა ოპოზიციას გასამართლებით და აკრძალვით, პუტინის მსგავსად, გაიმეორა, რომ “დედა დედა და მამა – მამა” და ასევე შეპირდა ამომრჩეველს, რომ მომავალ არჩევნებზე პირადად უზრუნველყოფს, რომ ქვეყანში კარგი ოპოზიციური პარტიები გვყავდეს.
ასევე მის ინტერვიუში მოვისმინეთ პასაჟი “მამაკაცის ჰიგიენურ საფენებზე და მამაკაცის რძეზე”, რაც უკვე იქცა ინტერნეტ მიმებად.
ეკონომიკაზე საუბრისას, ივანიშვილმა თქვა, რომ საქართველო ყველა რეიტინგში პირველ ადგილზეა და საქმე მალე ისე წავა, რომ ევროკავშირი თავად შეგვეხვეწება.
რაც შეეხება ჟურნალისტს – “იმედის” წამყვანს, მაგდა ანიკაშვილს ივანიშვილისთვის არც ერთი კრიტიკული კითხვა არ დაუსვამს. თითქმის ყველა კითხვა მაამებლურ პასუხს თავადვე შეიცავდა. ივანიშვილმა ერთხელ პირადადაც უთხრა ჟურნალისტს – თქვენ ისე მკითხეთ, პასუხიც თვითონვე გაეცითო.
და კიდევ ერთი დეტალი: ივანიშვილს თავის ინტერვიუში არ უსაუბრია სალომე ზურაბიშვილზე. ჟურნალისტმა მას პრეზიდენტზე კითხვა არ დაუსვა.
აგვისტოს ომზე და “ნაციონალური მოძრაობის” გასამართლებაზე
ივანიშვილმა კიდევ ერთხელ გაიმეორა, რომ აგვისტოს ომის დაწყება საქართველოს იმდროინდელი ხელისუფლების პროვოცირებულია.
მან თქვა, რომ ამისთვის “ნაციონალური მოძრაობა” გასამართლდება.
“ამ ჯგუფს, კონკრეტულად ვინც ჩაიდინა დანაშაული, დაარღვია კანონი და გარედან მიღებული დავალების საფუძველზე საკუთარ ძმებთან აომა ჩვენი ქვეყანა უნდა მოეთხოვოს პასუხოს”.
“გირგვლიანი საქართველომ მოკლა? – მათ და მათმა სისტემამ, კრიმინალურმა სისტემამ გააკეთა ეს ყველაფერი და ამ კრიმინალურმა სისტემამ ჩაიდინა ეს ომიც და, რა თქმა უნდა, მათ შერიგება [ოსებთან] არ უნდათ“, – განაცხადა ბიძინა ივანიშვილმა.
ბიძინა ივანიშვილი „ნაციონალური მოძრაობის“ არაკონსტიტუციურად გამოცხადებას აპირებს. კითხვაზე, თუ რატომ დღეს და რატომ უფრო ადრე არ გააკეთა ეს, ის პასუხობს, რომ “ჰააგაში, სტრასბურგში სასამართლოები იყო, მოსაგები გვქონდა საქმეები და ამ ფონზე რომ დაგვესწრო მოვლენებისთვის, შეიძლებოდა ქვეყანა დაგვეზიანებინა”.
ივანიშვილი გულისხმობს 2008 წლის ომის გამო საქართველოს მიერ რუსეთის წინააღმდეგ აღძრულ საქმეებს.
საქართველოს ომში ჩართვის მცდელობებზე
ივანიშვილი ამბობს, რომ საქართველო და უკრაინა ომში “ჩართეს”.
“ჩვენ კარგი რეპეტიცია გაგვატარა სააკაშვილმა და უკვე 2008-ში პირველ ომში ჩაგვრთო… და უკრაინაც, 2022 -ში. ნახეთ, მზადება როგორი იყო, როგორ უნდოდათ საქართველოში მეორე ფრონტის გახსნა. რიცხვი, ზუსტად განსაზღვრული არავის ჰქონდა, წინა პერიოდსაც თუ გაიხსენებთ და მე ვუყურებდი ტელევიზიებს, ძალიან მაინტერესებდა ინფორმაცია, ვიცოდი, რომ რაღაც საშინელება უნდა დატრიალებულიყო”.
აშშ-სთან ურთიერთობაზე და ელჩ დენიგანთან შეხვედრაზე
ივანიშვილმა საერთაშორისო პარტნიორებთან ურთიერთობების გადატვირთვაზე ისაუბრა და აღნიშნა, რომ „ყველაფრის პრობლემა და მიზეზი არის ომი“.
მისი თქმით, სწორედ ომაა „გაამძაფრა ყველანაირი ურთიერთობები და შეცვალა, ზოგჯერ თავდაყირაც კი დააყენა ის, რაც გვქონდა“.
„ჩვენ არ გვქონია ომამდე პრობლემები. ვფიქრობ და იმედი მაქვს, რომ ომი რამდენიმე თვეში, შეიძლება ამ წლის ბოლოსაც დასრულდეს…. არჩევნები ამერიკაშიც დასასრულებელია, ევროპაშიც ახლა დასრულდა და ლაგდება, ბოლომდე არ დალაგებულა კიდევ ბიუროკრატია, იმედია, თანხვედრაში იქნება ომის დასრულება და ომის დასრულების შემდგომ სიტუაცია მგონი დაუბრუნდება პირვანდელს,” -აღნიშნა პარტიის საპატიო თავმჯდომარემ.
ივანიშვილის თქმით, “ამერიკა სულ იყო პრიორიტეტული ჩვენთვის – იმედი მაქვს და დარწმუნებულიც ვარ, რომ ომის დასრულების პარალელურად აუცილებლად მოვახერხებთ უაღრესად რთული და არასასურველი დამოკიდებულებები შევცვალოთ უფრო პოზიტიურად”.
ბიძინა ივანიშვილმა განაცხადა, რომ არჩევნების შემდეგ მასსა და ამერიკის შეერთებული შტატების ელჩს, რობინ დანიგანს შორის შეხვედრა გაიმართება.
როგორც ბიძინა ივანიშვილმა აღნიშნა, სინგაპურში სასამართლო დავის მოგების შემდეგ, მას ამერიკის ელჩთან ჰქონდა კომუნიკაცია და შეხვედრა მოითხოვა. მისივე თქმით, შეხვედრა არჩევნების შემდეგ გაიმართება.
„როდესაც სინგაპურში სასამართლო მოვიგეთ და ამის აღსრულებას ხელი ვეღარ შეუშალა კრედიტ სუისმა, მე მყისიერად, წინა კვირაში უკვე დავურეკე ამერიკის ელჩს, გვქონდა კომუნიკაცია, ვთხოვე შეხვედრა და ვთქვი, რომ ის მიზეზები, რაც იყო, რეალურად თავისით გადაწყდა, შესაბამისად ჩემგან პრობლემა აღარ არის და მე მზად ვარ შესახვედრად. იქიდანაც ძალიან ჯანსაღი რეაქცია იყო, ამის სურვილი არსებობს და ჩვენ არჩევნების შემდგომ ვაპირებთ შეხვედრას“ , – აღნიშნა პარტიის საპატიო თავმჯდომარემ. [შვეიცარიულმა ბანკმა „კრედიტ სუისმა“ სინგაპურში ბიძინა ივანიშვილთან სასამართლო დავა წააგო. სასამართლომ ბანკს საქართველოს ყოფილი პრემიერ-მინისტრისთვის კომპენსაციის სახით 926 მილიონი დოლარის გადახდა დააკისრა. სინგაპურის სასამართლომ დაადგინა, რომ ბანკმა არ შეასრულა ბიძინა ივანიშვილის აქტივების დაცვის ვალდებულება. [სინგაპურის სასამართლომ 30 სექტემბერს მიიღო გადაწყვეტილება ივანიშვილის სასარგებლოდ. საქმე უკავშირდება შვეიცარულ ბანკ Credit Suisse-თან ბიძინა ივანიშვილის მრავალწლიან დავას. ივანიშვილი ბანკის თანამშრომელს ასობით მილიონის მოპარვაში ადანაშაულებს. მოგვიანებით, ივანიშვილმა ფულის მოპარვასა და ფინანსურ შანტაჟში კოლექტიური დასავლეთი ანუ მისი სიტყვებით რომ ვთქვათ, “გლობალური ომის პარტია” დაადანაშაულა.]
გლობალური ომის პარტიაზე
ივანიშვილმა ინტერვიუში კვლავ ვრცლად ისაუბრა “გლობალური ომის პარტიის” თეორიაზე, რომელსაც საქართველოს ომში ჩართვა სურს და აშანტაჟებს.
იმის საილუსტრაციოდ, რომ უკრაინაში ომის დაწყების შემდეგ საქართველოზე დიდი ზეწოლა ხორციელდებოდა დასავლეთიდან მეორე ფრონტის გახსნის მოთხოვნით, ივანიშვილმა ერთი ამბავი მოჰყვა, რომელიც, მისი თქმით, ყოფილ პრემიერს, ირაკლი ღარიბაშვილს გადახდა:
“მინდა გავიხსენო ყოფილი პრემიერ-მინისტრის, ირაკლი ღარიბაშვილის მონაყოლი, როდესაც მასთან ერთ-ერთი ქვეყნის მაღალი თანამდებობის პირი ასეთი ტიპის საუბარს აწარმოებდა. ირაკლი შეეკითხა: კი, მაგრამ, როგორ წარმოგიდენიათ, ჩვენ რამდენი დღე შეგვიძლია, რომ ვიომოთ, რამდენ დღეს გავუძლებთო?
– 3-4 დღეო.
– და 3-4 დღის გამო გვღუპავთო?
– თქვენ სამი მილიონი ხართ და 3-4 დღეში ყველას კი ვერ ამოგხოცავენო. შემდეგ შეგიძლიათ პარტიზანული მოძრაობით ტყეში გახვიდეთო და ჩვენ დაგეხმარებით და იქიდან იომეთო. ეს იყო რეალობა. ამ ყველაფერმა გამოიწვია გუნდში ეს გადაწყვეტილება. გუნდი გამყარდა, გამკაცრდა, გააგრესიულდა. რადგან, გუნდმა უფრო ადრე იცოდა ეს ყველაფერი, ვიდრე საზოგადოებამ“, – განაცხადა ივანიშვილმა.
ვინ იყო ეს დასავლელი მაღალჩინოსანი, ივანიშვილს არ დაუკონკრეტებია.
მისი თქმით, საქართველოს მიერთება რუსეთის წინააღმდეგ დასავლურ საქნციებზე პირდაპირ მის ომში ჩართვას ნიშნავდა.
გახარიაზე და მის თანაგუნდელებზე
ივანიშვილმა კვლავ რადიკალურად ისაუბრა ოპოზიციაზე და ამ კონტექსტში, რამდენჯერმე ახსენა სიტყვა “გასამართლება.
მისივე თქმით, ყველაზე სახიფათო ძალა დღეს ქართულ ოპოზიციაში არის – „ლელო“ და „გახარია საქართველოსთვის“, რადგან ისინი “ნაციონალური მოძრაობის” მობრუნებას უწყობენ ხელს. “ნაციონალური მოძრაობა” კი, რომლის ლიდერებმა “უცხოეთში ისწავლეს”, გლობალური ომის პარტიის მონა-მორჩილია და საქართველოში ომის გაჩაღება უნდა.
ივანიშვილმა განსაკუთრებული სიმძაფრით ყოფილ თანაგუნდელზე, გიორგი გახარიაზე ისაუბრა და მას “გარეწარი” უწოდა.
ივანიშვილი ასევე ღიად დაიმუქრა, რომ გახარიას თანაგუნდელებს გაასამართლებს:
„ისევ დავუბრუნდები ამ ჩემს მოუშუშებელ ჭრილობას – აი, გახარიას პარტიის წევრები. არასდროს შეურაცხყოფა არ მიმიყენებია პოლიტიკოსისთვის, მაგრამ ამ გარეწართან, ამასთან რომ დგანან, ამის გვერდით, რა თქმა უნდა, მათ გასამართლება მოუწევთ. რა თქმა უნდა, შავით თეთრზე დავუმტკიცებთ ყველაფერს, რას აკეთებდა, რისთვის აკეთებდა, „ნაციონალური მოძრაობის“ მოყვანას როგორ ეხმარებოდა და ეხმარება დღესაც და რა კარგად აქვს გაცნობიერებული, რომ საქართველო მეორე დღესვე ომში უნდა ჩართოს, სასამართლოს დონეზე გვაქვს ყველა დოკუმენტი დალაგებული, რა თქმა უნდა, ამათ მოუწევთ პასუხისგება და მკაცრი პასუხისგება, მასაც და მისი პარტიის წევრებსაც. უფრო მეტი გაღიზიანება მათზე მაქვს, ისინი „ქართული ოცნების“ წევრები იყვნენ, უმრავლესობა და ჩვენი მანდატით შემოვიდნენ პარლამენტში”.
ივანიშვილის თქმით, გიორგი გახარიას გადადგომა, 2021 წელს სწორედ საქართველოს ომში ჩართვისთვის მომზადებას უკავშირდებოდა. ვინაიდან, გლობალური ომის პარტიამ იცოდა, რომ „ქართული ოცნება“ არ იომებდა, გადაწყვიტეს მმართველი გუნდი ჩამოეშალათ. მან განმარტა, რომ გახარიას გადადგომის მთავარი მაზანი იყო ის, რომ მოსულიყვნენ ისეთი პოლიტიკური ძალები, რომლებიც საქართველოს მყისიერად ჩართავდნენ ომში.
საკონსტიტუციო უმრავლესობა
ივანიშვილმა საათნახევრიანი ინტერვიუს განმავლობაში რამდენჯერმე ახსენა, რომ “ქართულ ოცნებას” სჭირდება საკონსტიტუციო უმრავლესობა:
“დღეს ამ არჩევნებს ჩვენ მოვიგებთ , ამის პრობლემა არ არის, ოღონდ გვინდა საკონსტიტუციო უმრავლესობა. მოკლედ, თუ ეს ძალა [ნაციონალური მოძრაობა] არ მოვაშორეთ ქვეყანას, მუდმივი რევოლუციური სიტუაცია იქნება … უნდა აიკრძალოს ის ვინც, ხალხის და ქვეყნის მტერია, ჩვენ გვჭირდება საკონსტიტუციო უმრავლესობა, რომ „ნაციონალური მოძრაობა“ ავკრძალოთ და მოვიშოროთ”,- განაცხადა ივანიშვილმა “იმედთან” ინტერვიუში.
დასავლეთის მიერ მისთვის დაკისრებულ სანქციებზე
დასავლეთის განცხადებები, ძირითადად, შანტაჟის შემცველია, მაგრამ ამან არ იმუშავა არც ხალხზე და არც პირადად მასზე, ამბობს ივანიშვილი”
“რაც შეეხება დასჯას და სანქცირებას… ამანაც უკუშედეგი გამოიღო და არ იმუშავა, ვერ იმუშავა და ვერც იმუშავებს. იმის იქით ველოდებით თუ არა [კიდევ სანქციებს]? – მე პირადად, აღარ ველოდები. მე მგონი, რისი გაკეთებაც შეეძლოთ და რაც უნდოდათ გააკეთეს, ამოწურეს. არ იმუშავა”.
ლგბტ პროპაგანდის წინააღმდეგ კანონზე
ივანიშვილმა საკმაოდ მსუყედ ისაუბრა ლგბტ პროპაგანდის საფრთხეზე, რომელიც საქართველოს ემუქრება და რომლის გამოც მიიღეს ცოტა ხნის წინ კანონი საქართველოს პარლამენტში. ივანიშვილა თქვა, რომ ოპოზიციამ პარლამენტის მუშაობას ბოიკოტი იმიტომ გამოუცხადა, რომ აღნიშნული კანონის მიღებაში არ მიეღით მონაწილეობა, რადგან დასავლელი “პატრონების” შიშით ამ კანონს ხმას ვერ მისცემდნენ.
ივანიშვილის გამოსვლაში იყო თითქმის იგივე ნარატივები, რასაც რუსეთის პრეზიდენტი, ვლადიმირ პუტინი იმეორებს მუდმივად – რომ დედა დედა უნდა იყოს, მამა მამა, რომ დასავლეთში ბავშვებს რყვნიან და ასე შემდეგ.
პუტინის მსგავსად, ივანიშვილმაც თავის ინტერვიუში ლიბერალური იდეოლოგია გააკრიტიკა.
“პროპაგანდას რაც შეეხება, ბოდიში მომიხდია, საკუთარ სახლში ვისაც რა უნდა ის გააკეთოს, არავინ არ შედის და არავინ არავის არ მისდევს, მაგრამ პროპაგანდამ და აგიტაციამ რაც გამოიწვია, ნახეთ ქვეყნები და არსებობს სტატისტიკა ამის, რამდენჯერ გაიზარდა რიცხვი“, – განაცხადა ბიძინა ივანიშვილმა.
მისი თქმით, დასავლური პროპაგანდის მიზანია, რომ “ადამიანმა არ უნდა იცოდეს ქალია თუ კაცი”.
” შენ უკვე არ იცი ვინ ხარ და სამართავად ხარ იოლი და ეს არის უახლესი იარაღი დაპყრობის”, – აღნიშნა ივანიშვილმა.
ივანიშვილის თქმით, დასავლეთში პროპაგანდა ისეთ დონეზეა, რომ “მამაკაცების საპირფარეშოებში ჰიგიენურ ხელსახოცებს დებენ და მამაკაცის რძე იგივეა, რაც დედაკაცის”.
“ის, რომ ამბობენ ქალს ქალი აღარ დავუძახოთ და კაცს კაცი აღარ დავუძახოთ, ის რომ ბაღის ხუთ წლამდე ბავშვებში მიდის უკვე სექსუალური აღზრდის გაკვეთილები… ერთ-ერთი განვითარებული ქვეყნის მასწავლებელი ციხეში მეორედ შეუშვეს, იმის გულისთვის, რომ გამოვიდა და ისევ თქვა პრინციპულად, რომ მხოლოდ ორი სქესი არსებობს – მამრი და მდედრი და არ არსებობს ეს მრავალფეროვნება სექსუალობის”.
არჩევნების შემდეგ
ივანიშვილმა, ტელეკომპანია “იმედთან” ინტერვიუში არჩევნების შემდგომ პერიოდზეც ისაუბრა.
მისი თქმით, ოპოზიციას რესურსი „არ აქვს რომ ქვეყანაში რამე არიოს“, თუმცა არსებობს მცდელობები და სიფხიზლეა საჭირო.
„რაც შეეხება არჩევნების შემდგომ პერიოდს. არ მინდა ამის გაუბრალოება, რომ ესენი არაფერს ცდილობენ. თარგამაძის მკვლელობაში დადანაშაულებული მეორედ რომ შემოვიდა, 18 წელი ციხე ეკუთვნის და კაცი კიდევ შემოვიდა. ასეთი სულელი ხომ არ არის არა? შემოდის, რაღაცებს წვალობენ, მაგრამ არავითარი რესურსი არ აქვთ. გაუბედურებულები არიან. უბედური ხალხია ზოგადად. ხალხი, ვინც საკუთარ ქვეყანას და საკუთარ სამშობლოს ებრძვის ამაზე დიდი უბედურება რა უნდა იყოს. საცოდავი გაუბედურებული ხალხია, არავითარი რესურსი მაგის არ აქვთ, რომ არიონ, თუმცა მცდელობები აქვთ და ფხიზლად უნდა ვიყოთ. მე რატომ ვაწყნარებ ხალხს, იმიტომ, რომ კარგად მუშაობს ქართული სისტემა და სახელმწიფო სტრუქტურები მუშაობენ მომართულად და გვაქვს იმის რესურსი, რომ არ დავუშვათ, თუმცა სიფრთხილე არ უნდა დავკარგოთ“, – განაცხადა ბიძინა ივანიშვილმა.
ივანიშვილმა ინტერვიუს ბოლოს კიდევ ერთხელ მოუწოდა ამომრჩევლებს “ქართული ოცნების” მხარდაჭერისკენ და დაპირდა, რომ მომავალ არჩევნებზე პირადად უზრუნველყოფს, რომ ქვეყანში კარგი ოპოზიციური პარტიები იყვნენ და ამომრჩეველს ღირსეული არჩევანი ჰქონდეს.
