ბიძინა ივანიშვილის დამცველი იურიდიული კომპანია ევროპულ მედიას კვლავ აკრიტიკებს და ამბობს, რომ მათ სტატიებზე ცენზურა ტენდენციად იქცა. იურისტები “იმედგაცრუებულნი” არიან იმით, რომ ივანიშვილის პიარ გუნდს სტატიის გამოქვეყნებაზე ევროპულმა მედიამ მორიგ ჯერზე უთხრა უარი.
“შეგახსენებთ, რომ როდესაც საქმე ეხება ბანკის კრიტიკას, წამყვანი საერთაშორისო მედია, მათ შორის, Financial Times, Wall Street Journal, Bloomberg, Reuters და მსგავსი კალიბრის სხვა გამოცემები სიამოვნებით აქვეყნებენ მათ. სიტუაცია კარდინალურად განსხვავდება, როდესაც ფაქტებსა და მტკიცებულებებზე დაყრდნობით ჟღერდება ლოგიკური და ობიექტური ანალიზი, რასაც მოსდევს ასეთივე, საღ მსჯელობაზე დაფუძნებული ლეგიტიმური შეკითხვები”, – ნათქვამია ადვოკატების განცხადებაში.
მათივე მტკიცებით, ივანიშვილის კრიტიკა შეიცავდა ბანკის მენეჯმენტის საფუძვლიან მხილებას, რის გამოც “იგი დაექვემდებარა ბლოკირებას და ცენზურას”. როგორც ადვოკატები განმარტავენ, სტატიის გაცნობის საშუალება მხოლოდ ქართულ აუდიტორიას მიეცა მას შემდეგ, რაც ევროპულ პრესაში გამოქვეყნება ორიგინალი სახით შეუძლებელი აღმოჩნდა, რაც აჩვენებს, რომ “ქართული მედია სივრცე თავისუფალია.”
ადვოკატები ხაზს უსვამენ, რომ როდესაც ხორციელდება ბანკის კრიტიკა, მაშინ ბიძინა ივანიშვილისთვის ყველა კარი ღიაა: სტატიებს ბეჭდავს როგორც შვეიცარიული, ისე ევროპული და წამყვანი საერთაშორისო მედია. მაგრამ ამასთან, მათივე თქმით, როგორც კი “ფოკუსის ქვეშ ექცევა არა ბანკი, არამედ კონკრეტულად მისი მენეჯმენტი, რომელიც შეგნებულად აზიანებს ბანკის ინტერესებს და პოლიტიკური შანტაჟის ქვეშ აქცევს თავის კლიენტს”, მაშინ მედია დუმს და ეს უკვე არა ერთჯერადი შემთხვევა, არამედ ტენდენციაა:
“ტენდენციაა იქიდან გამომდინარე, რომ ბატონ ივანიშვილს მსგავსი გამოცდილება უკვე ჰქონდა შვეიცარიულ მედიაში, როდესაც მენეჯმენტის კრიტიკის შემცველი ინფორმაციის გამოქვეყნებაზე შვეიცარიულმა პრესამაც, რადიომაც და ტელევიზიამაც უარი თქვა 2022 წლის ივლისში. მაშინ ბატონი ივანიშვილი ამ საკითხზეც ხმამაღლა საუბრობდა. ახლა იგივე უკვე ბრიტანულ/ევროპულ მედიაში განმეორდა.”
ადვოკატების თქმით, მათმა კლიენტმა ვერ შეძლო საერთაშორისო მკითხველის ინფორმირება იმის შესახებ, თუ როგორ მოქმედებდა ბანკის მენეჯმენტი 2008-2015 წლებში, როდესაც “ხდებოდა მის ანგარიშებზე წარმოუდგენელი დანაშაულები”, რის შესახებაც ბანკის მენეჯმენტი ასზე მეტჯერ იღებდა მინიშნებას შიდა აუდიტის სისტემისგან, თუმცა ნაცვლად დანაშაულის აღკვეთისა, დამნაშავეთა პრემიებითა და ბონუსებით წახალისება ხდებოდა.
იურიდიულ კომპანიაში აცხადებენ, რომ უნდა გაეცეს პასუხი მთავარ კითხვას – ვისი დაკვეთითა და დავალებით მოქმედებს ბანკის მენეჯმენტი.
“ვინ არის ის ძალა, რომელმაც აიძულა მენეჯმენტს ზემოთ აღწერილი უამრავი კანონდარღვევა ჩაედინა? ვინ არის ის ძალა, ვინც ბანკის მენეჯმენტს ბატონი ივანიშვილის შანტაჟი დაუკვეთა? ვინ არის ის ძალა, რომელმაც, ამ ერთი მცირე ეპიზოდის მაგალითზეც გვაჩვენა, რომ ბანკის მენეჯმნეტს ბატონი ივანიშვილისთვის თანხის გადახდას უკრძალავს? ვინ არის ის ძალა, რომელმაც ევროპარლამენტს ორჯერ მიაღებინა რეზოლუცია ბატონი ივანიშვილის დასანქცირების მოთხოვნით და ორივე ჯერზე არ მისცა მისი ბოლომდე რეალიზების, აღსრულების საშუალება, რაც აჩვენებს, რომ მიზანი შანტაჟი იყო და არა რეალური სანქცირება? ვინ არის ის ძალა, ვინც ევროპულ მედიაში წვდომას ბლოკავს მაშინ, როდესაც საქმე ბანკის მენეჯმენტს შეეხება?” – ამბობენ ადვოკატები.
შვეიცარიულ ბანკთან ივანიშვილს რამდენიმე სამართლებრივი დავა ჰქონდა. ბოლოს, ბიზნესმენმა ბანკი გადარიცხვების შეფერხებასა და ამ გზით პოლიტიკურ ზეწოლაში დაადანაშაულა. “ქართული ოცნების” წარმომადგენლები აცხადებდნენ, რომ შვეიცარიულ ბანკში პრობლემების შექმნით დასავლეთი, კერძოდ კი აშშ, ცდილობს ივანიშვილზე ზეწოლის მოხდენას, რათა საქართველო ომში ჩართოს რუსეთის წინააღმდეგ.
2023 წლის 8 თებერვალს შვეიცარიულ ბანკთან “კრედიტ სვისთან” დავაში ბიძინა ივანიშვილის დამცველმა ფირმამ ევროპული მედია ცენზურასა და ინფორმაციის დაბლოკვაში დაადანაშაულა. ივანიშვილის ადვოკატები ამბობენ, რომ სტატიები, სადაც ისინი Credit Suisse-ის მენეჯმენტს აკრიტიკებდნენ გასულ წელს შვეიცარიულმა მედიამ დაბლოკა, ამჯერად კი ევროპულ/ბრიტანული მედიიდან მიიღეს უარი სტატიების განთავსებაზე. მათი თქმით, ევროპული მედიაც მონოპოლიზებული აღმოჩნდა.
2023 წლის 26 იანვარს ბიძინა ივანიშვილის წარმომადგენლებმა საერთაშორისო პრესაში ვრცელი წერილი გამოაქვეყნეს, სადაც ეწერა, რომ ივანიშვილი ადასტურებს პოლიტიკურ ზეწოლას Credit Suisse-თან სამართლებრივ დავაში.
ივანიშვილის ადვოკატები აღნიშნავენ, რომ Credit Suisse-ის ტრასტები იყენებენ ევროპარლამენტის მიერ მიღებულ რეზოლუციას, რომლითაც დეპუტატები აღმასრულებელ ორგანოებს ივანიშვილის სანქცირების რეკომენდაციას უწევდნენ.
14 დეკემბერს მიღებული რეზოლუციით, ევროპარლამენტმა მოუწოდა ევროპულ საბჭოსა და დემოკრატიულ პარტნიორებს, რომ დააწესონ სანქციები ბიძინა ივანიშვილის, როგორც საქართველოში დემოკრატიული პროცესების გაუარესებაზე პასუხისმგებელ პირის წინააღმდეგ.
