ივანიშვილი “მაგნიტსკის აქტში”? აშშ-ის სენატი საქართველოს კრიზისზე
ივანიშვილი “მაგნიტსკის აქტში”
აშშ-ის სენატმა საქართველოში არსებული კრიზისის გამო ივანიშვილის წინააღმდეგ მტკიცებულებები მოისმინა. ხუთშაბათს სენატის საგარეო ურთიერთობათა კომიტეტმა მაგნიტსკის აქტი და მისი შესაძლო გაფართოება განიხილა და ამ კონტექსტში განსაკუთრებული ყურადღება დაუთმო საქართველოში არსებულ ვითარებას.
ფინანსისტმა, Hermitage Capital Management-ის აღმასრულებელმა დირექტორმა და აშშ-ში მაგნიტსკის აქტის შექმნის მთავარმა ფიგურამ უილიამ ბრაუდერმა ისაუბრა კორუფციის როლზე საქართველოში მიმდინარე კრიზისში. ბრაუდერმა საქართველოს არაფორმალური მმართველი, მილიარდერი ბიძინა ივანიშვილი, კრიზისის შექმნაში დაადანაშაულა.
„საიდან აქვს მას ფული? რუსეთიდან. როგორ იშოვა მან ქონება? “გაზპრომის“ და სხვა სახელმწიფო კომპანიების მეშვეობით. ჩემი გამოცდილებით, ეს კომპანიები ძალიან კორუმპირებულები არიან. ივანიშვილმა რამდენიმე მილიარდი იშოვა და საქართველოში დაბრუნდა. როგორ აკონტროლებენ ამას რუსები? ისინი ეუბნებიან: „შენ ფული საეჭვო გზით იშოვე. ჩვენ შეგვიძლია ყველაფერი ჩამოგართვათ, აღვძრათ სისხლის სამართლის საქმე თქვენ წინააღმდეგ, მაგრამ ამას არ გავაკეთებთ, თუ თქვენ დაგვეხმარებით. ” და რას აკეთებს ივანიშვილი? ის აქტიურად ეხმარება რუსებს.
სამართლიანად შეიძლება ითქვას, რომ საქართველოს დღევანდელი არალეგიტიმური ხელისუფლება რუსეთის მარიონეტული ხელისუფლებაა. და სამართლიანი იქნება თუ ვიტყვით, რომ ამ სიტუაციაში ბატონი ივანიშვილი ძალიან აქტიურ როლს თამაშობს. ეს არის ერთ-ერთი მაგალითი იმისა, თუ როგორ მუშაობს კორუფცია.
კიდევ ერთი მაგალითია ის, რომ ასეთ ადამიანებს, კორუმპირებულებს და ხელისუფლებაში მყოფთ, არ სურთ, რომ მომავალმა ხელისუფლებებმა მათი საქმეები გამოიძიონ. და რას აკეთებენ? ისინი არ თმობენ ძალაუფლებას, და ამას აკეთებენ ბიულეტენების ჩაყრით, არჩევნების გაყალბებით და ა.შ.“
აშშ-ის ჰელსინკის კომისიის თანათავმჯდომარემ, სენატორმა ბენ კარდინმა, რომელიც შეხვედრას უძღვებოდა, იმედი გამოთქვა, რომ „მაგნიტსკის აქტის” სანქციები დაეხმარება საქართველოს სწორ გზაზე დაბრუნდეს“.
„რაც ახლა ადგილზე ხდება, მიუღებელია. დღევანდელი ხელისუფლება არასათანადოდ ეპყრობა ქართველ ხალხს“, – განაცხადა კარდინმა.
რა არის “მაგნიტსკის აქტი”
37 წლის სერგეი მაგნიტსკი უკრაინული წარმოშობის რუსი საგადასახადო მრჩეველი და ადვოკატი იყო, ვინც რუსეთის ხელისუფლება კორუფციასა და სამსახურებრივი უფლებამოსილების გადაჭარბებაში ამხილა. მაგნიტსკი რუსეთის ისტორიაში ყველაზე მასშტაბური ფინანსური მაქინაციების გამოაშკარავების გამო 2008 წელს დააპატიმრეს და 11 თვეში ციხეში მოკლეს.
“მაგნიტსკი აქტი” 2012 წელს აშშ-ის კონგრესმა მიიღო. ამ აქტის მთავარი მიზანი რუსეთის ხელისუფლების იმ წარმომადგენლებისთვის პასუხისმგებლობის დაკისრება იყო, ვინც მოსკოვის ციხეში სერგეი მაგნიტსკის სიკვდილზე იყო პასუხისმგებელი.
ხოლო 2016 წლის განახლებული ვერსიის საფუძველზე, “მაგნიტსკის აქტის” მეშვეობით აშშ-ის ხელისუფლებას შეუძლია ადამიანის უფლებების დარღვევის ფაქტების გამო მსოფლიოს მასშტაბით უცხო ქვეყნის ხელისუფლების წევრებს სანქციები დაუწესოს – გაყინოს მათი ქონება და აუკრძალოს აშშ-ის ტერიტორიაზე შესვლა.
