ანა ნაცვლიშვილი: ივანიშვილი მთავრობაში დარჩენის გარანტიის სანაცვლოდ აფხაზეთის აღიარებას აპირებს
ივანიშვილი აფხაზეთის დამოუკიდებლობის აღიარებას აპირებს
“ძლიერი საქართველოს” ერთ-ერთი ლიდერის და პარლამენტის წევრის, ანა ნაცვლიშვილის თქმით, ბიძინა ივანიშვილი ხელისუფლებაში დარჩენის გარანტიის სანაცვლოდ აფხაზეთის დამოუკიდებლობის აღიარებას აპირებს. მისვე თქმით, ივანიშვილს საკონსტიტუციო უმრავლესობა, სწორედ “ამ მზაკვრული და მოღალატეობრივი გეგმისთვის” სჭირდება.
რა თქვა ანა ნაცვლიშვილმა
“ნათელია, რომ ბიძინა ივანიშვილი აპირებს აფხაზეთის აღიარებას ხელისუფლებაში დარჩენის გარანტიის სანაცვლოდ. ესაა გზა აფხაზეთის აღიარების და საქართველოს ღალატის ბიძინას რუსული გეგმა.
საქართველოს კონსტიტუციაში ძალიან მკაფიოდ და ცალსახად წერია საქართველოს ტერიტორიული მთლიანობის შესახებ.
კერძოდ,
მუხლი 1.
საქართველო არის დამოუკიდებელი, ერთიანი და განუყოფელი სახელმწიფო, რაც დადასტურებულია 1991 წლის 31 მარტს ქვეყნის მთელ ტერიტორიაზე, მათ შორის აფხაზეთის ასსრ-ში და ყოფილ სამხრეთ ოსეთის ავტონომიურ ოლქში ჩატარებული რეფერენდუმით და 1991 წლის 9 აპრილის საქართველოს სახელმწიფოებრივი დამოუკიდებლობის აღდგენის აქტით.
2.
საქართველოს სახელმწიფოს ტერიტორია განსაზღვრულია 1991 წლის 21 დეკემბრის მდგომარეობით. საქართველოს ტერიტორიული მთლიანობა და სახელმწიფო საზღვრის ხელშეუხებლობა დადასტურებულია საქართველოს კონსტიტუციითა და კანონებით, აღიარებულია სახელმწიფოთა მსოფლიო თანამეგობრობისა და საერთაშორისო ორგანიზაციების მიერ. საქართველოს სახელმწიფოს ტერიტორიის გასხვისება აკრძალულია. სახელმწიფო საზღვრის შეცვლა შეიძლება მხოლოდ მეზობელ სახელმწიფოსთან დადებული ორმხრივი შეთანხმებით.
რატომ სურს ივანიშვილს ამ ჩანაწერის შეცვლა?! გასაგებია რა დავალება აქვს მას მიღებული კრემლისგან. ივანიშვილი ასრულებს რუსეთის დავალებას, ქვეყნის დამოუკიდებლობასთან, ტერიტორიულ მთლიანობასთან და სუვერენიტეტთან ასეთი თამაში ქვეყნის ღალატია.
საქართველო არის დამოუკიდებელი, მისი ტერიტორიული მთლიანობა აღიარებულია ამ ქვეყნის კონსტიტუციით და საერთაშორისო თანამეგობრობის მიერ და რამდენიც არ უნდა ეცადოს მის გადაწერას კრემლის დავალებით ივანიშვილი, არაფერი გამოუვა.” – განაცხადა ანა ნაცვლიშვილმა.
მცხეთაში, “ქართული ოცნების” წინასაარჩევნო გამოსვლაში ბიძინა ივანიშვილმა თქვა, რომ საქართველოს ტერიტორიული მთლიანობის აღდგენის საკითხი დღის წესრიგში “ნებისმიერ დროს შეიძლება დადგეს”, რა დროსაც კონსტიტუციაში შესაბამისი ცვლილებების შეტანა იქნება აუცილებელი, კერძოდ, უნდა გადაისინჯოს, ქვეყნის მმართველობის სისტემა და ტერიტორიული მოწყობა.
მანამდე “ქართული ოცნების” პოლიტიკურმა საბჭომ გაავრცელა განცხადება, რომელშიც ნათქვამია: “თუ საქართველოს ტერიტორიული მთლიანობა მშვიდობიანი გზით აღდგება, საჭირო იქნება საქართველოს კონსტიტუციაში ცვლილებების შეტანა, რათა საქართველოს მმართველობის სისტემა და ტერიტორიული სახელმწიფო სტრუქტურა ახალ რეალობასთან შესაბამისობაში მოიყვანოს.“
