სახელმწიფო უსაფრთხოების სამსახურმა ტერორისტულ დანაშაულზე ე.წ. ისლამური სახელმწიფოს (ISIS) წევრი საქართველოს ორი მოქალაქე დააკავა.
“უსახელმწიფო უსაფრთხოების სამსახურმა სპეციალური ოპერაცია საქართველოს ორ რეგიონში ოთხ ლოკაციაზე ერთდროულად ჩაატარა. საგამოძიებო მოქმედებების შედეგად ამოღებულია დროშები ტერორისტული ორგანიზაცია ისლამური სახელმწიფოს სიმბოლიკით და სხვადასხვა სახის ელექტრონული ინფორმაციის მატარებელი მოწყობილობა. ამასთან, დაკავებულების საცხოვრებელი სახლებიდან ამოღებულია საბრძოლო მასალა, ასაფეთქებელი მოწყობილობა და ფეთქებადი ნივთიერებები”. – ნათქვამია უწყების განცხადებაში.
უსაფრთხოების სამსახურის კონტრტერორისტული ცენტრი გამოძიებას სისხლის სამართლის კოდექსის 327-ე და 236-ე მუხლებით აწარმოებს. უწყების ცნობით, გრძელდება ოპერატიულ-საგამოძიებო მოქმედებები როგორც დაკავებული პირების ტერორისტული ორგანიზაცია ისლამური სახელმწიფოს საქმიანობაში მონაწილეობის ხასიათის გამოვლენისთვის, ისე დანაშაულთან შემხებლობაში მყოფი სხვა პირების იდენტიფიცირების მიზნით.
სუს-მა ისლამური სახელმწიფოს მხარდამჭერის ბრალდებით საქართველოს 6 მოქალაქე მიმდინარე წლის 17 მაისსაც დააკავა. უწყებაში აღნიშნავენ, რომ კონტრტერორისტული ოპერაცია ერთდროულად ოთხ ადგილზე ჩატარდა.
აღსანიშნავია, რომ მიმდინარე წლის 22 აპრილს საქართველოს კონტრტერორისტულმა ცენტრმა ე.წ. ისლამური სახელმწიფოს ერთ-ერთი დაჯგუფების მეთაური, საქართველოს მოქალაქე მალხაზ პაქსაშვილი დააკავა.
როგორც უწყებაში განმარტავენ, მოპოვებული მტკიცებულებებით დადგინდა, რომ აღნიშნულმა პირმა საქართველო 2013 წელს დატოვა, სირიაში გაემგზავრა და ტერორისტულ ორგანიზაცია “ისლამურ სახელმწიფოს” შეუერთდა.
● 2014 წელს ისლამური სახელმწიფოს ლიდერმა აბუ ბაქრ ალ-ბაღდადიმ მსოფლიო ჯიჰადი და სახალიფოს დაარსება გამოაცხადა. ისლამური სახელმწიფო აკონტროლებდა ერაყის, სირიისა და ლიბანის ნაწილს, ასევე მცირე ტერიტორიებს ლიბიაში, ნიგერიაში, ავღანეთსა და ჩრდილოეთ აფრიკაში.
● 2015 წელს რამდენიმე ათეული ახალგაზრდა წავიდა ჩეჩნეთიდან სირიაში საბრძოლველად; პანკისიდანაა ისლამური სახელმწიფოს ერთ-ერთი ოდიოზური ემირი აბუ უმარ ალ-შიშანიც, იგივე თარხან ბათირაშვილი. ამის გამო, ტერორიზმის კერის რეპუტაციამ მტკიცედ დაიმკვიდრა პანკისში სახელი და ეს რეპუტაცია დღემდე რჩება – მიუხედავად იმისა, რომ რამდენიმე წელია ხეობიდან ხალხი თითქმის აღარ ხვდებოდა ტერორისტულ ორგანიზაცია ISIS-თან დაკავშირებულ ისტორიებში.
● 2017 წლის 12 დეკემბერს, ამერიკის პრეზიდენტმა დონალდ ტრამპმა ქვეყნის სამხედრო ბიუჯეტის ხელმოწერისას განაცხადა, რომ აშშ-მ სირიასა და ერაყში “ისლამური სახელმწიფო” საბოლოოდ დაამარცხა.
● მოგვიანებით პენტაგონმა ასევე განმარტა, რომ სირიასა და ერაყში “ისლამური სახელმწიფოს” 3 ათასამდე წევრია დარჩენილი, რაც დაახლოებით ათჯერ ნაკლებია 2015 წლის მონაცემებზე, როდესაც “ისლამური სახელმწიფო” ვითარდებოდა და ახალ-ახალ ტერიტორიებს იპყრობდა. მათივე ცნობით, მოკლულია 60-70 ათასი ტერორისტი, უფრო მეტი კი თავის სამშობლოში დაბრუნდა.
