ირაკლი კობახიძე: 2025 წელს გადამწყვეტი დარტყმა უნდა მივაყენოთ რადიკალებს ჩვენს ქვეყანაში
ირაკლი კობახიძის განცხადება
ქართული ოცნების პრემიერმინისტრმა ირაკლი კობახიძემ მთავრობის სხდომაზე განაცხადა, რომ საქართველოს ხელისუფლებამ 2025 წელს გადამწყვეტი დარტყმა უნდა მიაყენოს “რადიკალებს” საქართველოში და უნდა დაასრულოს “ლიბერალური ფაშიზმი.”
ამასთან, კობახიძემ საუნივერსიტეტო რეფორმისთვის სამთავრობო კომისიის შექმნა დააანონსა და აღნიშნა, რომ კომისია 4 წლის განმავლობაში იმუშავებს უმაღლესი განათლების სისტემასა და საუნივერსიტეტო რეფორმაზე, განათლების მინისტრი, ალექსანდრე წულაძე (რომელიც კომისიის მდივანი იქნება) და ლევან იზორია (პრემიერ მინისტრის მრჩეველი განათლებისა და მეცნიერების საკითხებში) უხელმძღვანელებს.
ირაკლი კობახიძემ აშშ-ს პრეზიდენტის, დონალდ ტრამპის ინაუგურაციაზეც ისაუბრა და “წარმატებები” უსურვა მას “დიფ სთეითის” დამარცხების საქმეში.
რა თქვა ირაკლი კობახიძემ
“2025 წელს გადამწყვეტი დარტყმა უნდა მივაყენოთ რადიკალებს ჩვენს ქვეყანაში”
“შიდა პოლიტიკური კუთხით 2025 წელი იქნება ძალიან მნიშვნელოვანი – ჩვენ გადამწყვეტი დარტყმა უნდა მივაყენოთ რადიკალებს ჩვენს ქვეყანაში, რადიკალიზმი და ლიბერალური ფაშიზმი უნდა დასრულდეს ამ ქვეყანაში. ეს არის უპირობოდ მნიშვნელოვანი იმისათვის, რომ ჩვენმა ქვეყანამ განაგრძოს განვითარება და მიაღწიოს ყველა იმ ეროვნულ მიზანს, რომელიც აქვს დასახული.”
“წარმატებებს ვუსურვებთ პრეზიდენტ ტრამპს “დიფ სთეითის” დამარცხების საქმეში”
“დღეს არის მნიშვნელოვანი დღე, აშშ-ში იმართება ახალი პრეზიდენტის ინაუგურაცია და ეს არის ერთგვარი გარდამტეხი მომენტი ამერიკის შეერთებული შტატებისთვის.
გასული ? წელი იყო საკმაოდ რთული მთლიანად ჩვენი ქვეყნისთვის, ისევე როგორც მთლიანად მსოფლიოსთვის, იყო არაერთი კრიზისი, კვლავაც მიმდინარეობს ომი უკრაინაში, ახლო აღმოსავლეთში ომი, ევროპაში არის მძიმე ეკონომიკური კრიზისი.
ფსევდოლიბერალური პროპაგანდა კიდევ უფრო ფართოდ გაიშალა ამ ? წლის განმავლობაში. ლიბერალური ფაშიზმი არის არა მარტო ჩვენი ქვეყნის პრობლემა, არამედ სხვადასხვა ქვეყნის პრობლემაა, ამანაც ახალი განვითარება შეიძინა ამ ? წლის მანძილზე და კონკრეტულად ჩვენს ქვეყანაში, ამ 4 წლის განმავლობაში, იყო რევოლუციის 4 მცდელობა.
სამწუხაროდ, მსოფლიოში არ იყო სიმშვიდე და ანალოგიურად იყო რთული პროცესები ჩვენს ქვეყანაშიც.
გვაქვს ძალიან დიდი იმედი, რომ შემდეგი 4 წელი იქნება თვისებრივად განსხვავებული, იქნება ბევრად უფრო მშვიდი მსოფლიოსთვის და ეს ყველაფერი, რა თქმა უნდა, უნდა აისახოს ჩვენს ქვეყანაზეც.
ძალიან ამბიციური გეგმა აქვს პრეზიდენტ ტრამპს გაცხადებული, ეს არის “დიფ სთეითის“ დამარცხების გეგმა და ჩვენ გვინდა, წარმატებები ვუსურვოთ პრეზიდენტ ტრამპს ამ საქმეში. ამ ბრძოლაში წარმატებას ექნება გადამწყვეტი მნიშვნელობა საქართველო-აშშ-ის ურთიერთობების ნორმალიზებისთვის
ჩვენ გვაქვს ძალიან დიდი იმედი, რომ ეს ბრძოლა “დიფ სთეითთან” პრეზიდენტ ტრამპის გამარჯვებით დასრულდება. ეს, რა თქმა უნდა, ხელს შეიწყობს მშვიდობის უზრუნველყოფას მსოფლიოში, ჩვენს რეგიონში კონკრეტულად და ასევე ხელს შეუწყობს სწორი და ჯანსაღი ფასეულობების გავრცელებას, ნაცვლად იმ ფასეულობებისა, რომლებიც აქტიურად ვრცელდებოდა მსოფლიოს მასშტაბით გასული ოთხი წლის მანძილზე.
ჩვენ კიდევ ერთხელ გვინდა დავაფიქსიროთ ჩვენი მზაობა, რომ რომ გვსურს ურთიერთობების თვისებრივად გადატვირთვა, სუფთა ფურცლიდან სტრატეგიული პარტნიორობის განახლება ამერიკის შეერთებულ შტატებთან, იმედი გვაქვს, რომ გვექნება ამ მიმართულებით მნიშვნელოვანი წარმატებები, ამ კუთხითაც 2025 წელი იქნება, რა თქმა უნდა, ძალიან მნიშვნელოვანი.
“ჩვენ ვქმნით სამთავრობო კომისიას, რომელიც იმუშავებს საუნივერსიტეტო რეფორმაზე”
“ჩვენ ვქმნით სამთავრობო კომისიას, რომელიც იმუშავებს საუნივერსიტეტო რეფორმაზე – 4 წლიან პერსპექტივაში, ჩვენ თვისებრივად უნდა გარდავქმნათ საუნივერსიტეტო, უმაღლესი განათლების სისტემა ჩვენს ქვეყანაში.
დღეს, როგორც მოგეხსენებათ არ არის დამაკმაყოფილებელი უმაღლესი განათლების ხარისხი ჩვენს ქვეყანაში და რესურსები არის ძალიან დიდი ამ მიმართულებით – მაქსიმალურად უნდა ავითვისოთ ყველა რესურსი ყველა მიმართულებით, რომ 4 წელიწადში, ჩვენ მივიღოთ თვისებრივად განახლებული სისტემა.
თავისუფლად არის შესაძლებელი, რომ 4 წელიწადში ქართველმა სტუდენტმა საქართველოში მიიღოს ზუსტად იმ ხარისხის უმაღლესი განათლება, რა ხარისხითაც ის იღებს განათლებას, მაგალითად ევროპულ ქვეყნებში
ამისათვის უნდა დაისახოს კონკრეტული, გაწერილი გეგმა და ამაზე იმუშავებს სამთავრობო კომისია – სამთავრობო კომისიას უხელმძღვანელებენ, მოადგილე იქნება, რა თქმა უნდა განათლების მინისტრი, ბატონი ალექსანდრე წულაძე და ამ კომისიის მდივანი იქნება, ბატონი ლევან იზორია, რომელიც გახლავთ პრემიერმინისტრის მრჩეველი განათლებისა და მეცნიერების საკითხებში.
აქაც არცერთი დღე და არცერთი კვირა არ უნდა ჩავაგდოთ, ინტენსიური მუშაობა დაგვჭირდება იმისთვის, რომ 4 წლის თავზე, ჩვენ სრულად მივაღწიოთ დასახულ მიზანს.”
