"ჩვენ და ტრამპს ერთი საერთო გვაქვს - ჩვენს პირობებში ომი არ ყოფილა" - კიდევ რა თქვა ირაკლი კობახიძემ ბრიფინგზე
ირაკლი კობახიძის ბრიფინგი
პრემიერმინისტრი ირაკლი კობახიძე ამბობს, რომ გუშინ კონგრესში გამართული მოსმენაზე საქართველოს მიმართებით “უსამართლო შეფასებები” გაკეთდა. ამის შესახებ მან “ქართული ოცნების” ოფისში ჟურნალისტის კითხვის პასუხად განაცხადა. ასევე, კობახიძემ აღნიშნა, რომ მათ ხელისუფლებას და აშშ-ის პრეზიდენტობის კანდიდატ დონალდ ტრამპს “ერთი საერთო” აქვთ – მათ დროს ომი არ ყოფილა.
ბრიფინგზე კობახიძემ სუს-ის გამოძიება და ოლივერ ვარჰეისთან მისი სატელეფონო საუბარი, რომელიც მაისში შედგა, ერთმანეთს დაუკავშირა და თქვა, რომ ევროკომისიისგან ტერაქტზე გაფრთხილება მიიღო.
კობახიძემ კიდევ ერთხელ ისაუბრა აშშ-სთან ურთიერთობის გადატვირთვაზე და განაცხადა, რომ ეს ყველაფერი აშშ-ს ხელშია.
კიდევ რა თქვა საქართველოს პრემიერმინისტრმა
“თუ დემოკრატები გაიმარჯვებენ, ომი 1 წელში დასრულდება, თუ რესპუბლიკელები – 6 თვეში”
“ჩვენ ველოდებით, რომ მაქსიმუმ 1 წელიწადში დამთავრდება ომი უკრაინაში. თუ რესპუბლიკელები გაიმარჯვებენ, როგორც უკვე ითქვა, ვფიქრობთ, რომ უკვე იანვარშიც შეიძლება ომი დასრულდეს.
როგორც კი ომი დასრულდება, როგორც რეგიონში ვითარება დამშვიდდება, მაშინვე შეიცვლება მიდგომები საქართველოს მიმართ. ეს არის ჩვენი ოპტიმისტური მოლოდინი.
ურთიერთობების გადატვირთვა არ არის აპრიორი დამოკიდებული რესპუბლიკელების გამარჯვებაზე. კიდევ ერთხელ გავიმეორებ: თუ დემოკრატები გაიმარჯვებენ, სავარაუდოდ, ერთ წელიწადში დასრულდება ომი, თუ რესპუბლიკელები – სავარაუდოდ, ნახევარ წელიწადში.
ორივე შემთხვევაში, ომი დასრულდება, ვითარება დამშვიდდება რეგიონში და შეიცვლება დამოკიდებულება საქართველოს მიმართ. ანუ აპრიორი რესპუბლიკელების გამარჯვებაზე არ არის დაფუძნებული ჩვენი ოპტიმიზმი და ჩვენი იმედები.
მე ვარ დარწმუნებული, რომ მაქსიმუმ ერთ წელიწადში, შეიძლება 6 თვეშიც, დაიწყება არსებითად, თვისებრივად [აშშ-საქართველოს] ურთიერთობების გადახედვა.”
“აშშ-ს ხელშია ურთიერთობების გადატვირთვა, მათ ხელეწიფებათ”
“ჩვენ ძალიან რთული პროცესები გამოვიარეთ 2020 წლის შემოდგომიდან მოყოლებული, იყო რევოლუციის ორი მცდელობა. თქვენ გახსოვთ, რამდენი რამ გააფუჭა ამერიკის წინა ელჩმა ევროკავშირის წინა ელჩთან ერთად, ხო? ამ პირობებში თუ ვინმე უნდა ზრუნავდეს და თუ ვინმეს ხელეწიფება ურთიერთობების გადატვირთვა, ეს არის სწორედ მეორე მხარე, ეს არის აშშ.
ძალიან ბევრი რამ გაფუჭდა ამ წლების განმავლობაში, 3-4 წლის განმავლობაში, კიდევ ერთხელ ვიტყვი იმ უსამართლო და არასწორი მიდგომებით, რომლებიც ჩვენ ვიხილეთ. შესაბამისად, მათ ხელშია ურთიერთობების გადატვირთვა.
როდესაც ჩვენ ვხედავთ რევოლუციის მოწყობის ორ მცდელობას საქართველოში) ენჯეოების პირდაპირი მონაწილეობით და როცა ამ პირობებში აპროტესტებ ენჯეოების გამჭვირვალობას, ბუნებრივია, ჩნდება ლოგიკური დასკვნა, რომ ვიღაცას უნდა ენჯეოების ხელით მოაწყოს რევოლუციის მესამე მცდელობაც.
და ეს აღქმა არ უნდა დარჩეს ქართულ საზოგადოებაში. აქედან გამომდინარე, იქნებოდა სწორი, სამართლიანი და პრაგმატული, რომ ნაცვლად მუდმივი საუბრისა სხვა თემებზე, ჩვენ ვისაუბროთ ურთიერთობების გადატვირთვაზე.”
“ქართულ საზოგადოებას ალტერნატივა არ აქვს”
რაც შეეხება იმას, რომ ქართული ოცნება მომავალი 4 წელი გარანტირებულად და კიდევ მინიმუმ 8 წელი გვაქვს ამბიციები, ამას აქვს მარტივი ახსნა – ჩვენ პრაქტიკულად ალტერნატივა არ გვაქვს და ქართულ საზოგადოებასაც არ აქვს ალტერნატივა. ერთადერთი, რა ალტერნატივასაც თავს გვახვევენ გარედან, ეს არის კოლექტიური ნაცმოძრაობა.
“მაქვს იმედი, ქართველ ხალხს ევროკავშირში გაწევრიანების შესახებ მოლაპარაკებების გახსნაზე უარს არ ეტყვიან”
“რაც შეეხება იმას, გაიხსნება თუ არა ოქტომბერში მოლაპარაკებები, ეს არის ევროკავშირის გადასაწყვეტი. მაქვს იმედი, რომ ქართველ ხალხს მოლაპარაკებების გახსნაზე უარს არ ეტყვიან. თუ სხვანაირად მოხდება გამოდის, რომ ქართველი ხალხის მიმართ არის არასწორი დამოკიდებულება.
ხედავთ, როგორი უსამართლობაა, დსთ-ის წევრი ქვეყანა, მოლდოვა, ნული პოლიტიკური და მედია პლურალიზმით, დემოკრატიის, კორუფციის კუთხით სერიოზული პრობლემებით, აქვს მოლაპარაკებები გახსნილი და ჩვენ არა, ეს არის სრული უსამართლობა.
ერთადერთი ახსნა და მიზეზი შეიძლება ჰქონდეს ამ უსამართლობას, ეს არის განსხვავებული ინტერესები. როგორც კი ინტერესები შეიცვლება, მაშინვე შეიცვლება საქართველოს მიმართ მიდგომები და მაშინვე გაიხსნება მოლაპარაკებებიც.”
