საქართველოს პრემიერმინისტრი ირაკლი კობახიძე, უნგრეთში, კონსერვატიული პოლიტიკური მოქმედების კონფერენციაში მონაწილეობს. ვიქტორ ორბანის ორგანიზებულ ანტილიბერალურ კონფერენციაზე სიტყვით გამოსვლისას კობახიძემ განაცხადა, რომ “ე.წ ლიბერალები” განსაკუთრებული “ენთუზიაზმით იბრძვიან” ქრისტიანობის წინააღმდეგ.
კობახიძემ გაიმეორა არაერთი პროპაგანდისტული ფრაზა, რომელსაც რუსეთი დასავლეთის წინააღმდეგ იყენებს.
უნგრეთის პრემიერმინისტრმა, ვიქტორ ორბანმა კი კონფერენციაზე სიტყვით გამოსვლისას განაცხადა, ირაკლი კობახიძე არის საქართველოს პრემიერმინისტრი, რომელიც ყველა გამოწვევის მიუხედავად, ახერხებს ქვეყანაში “ეროვნული იდენტობისა და კულტურის” შენარჩუნებას.
“მინდა, მივესალმო ირაკლი კობახიძეს, საქართველოს პრემიერმინისტრს. ის არის მთავრობის მეთაური, რომელიც საქართველოში, ქართულ პოლიტიკაში დიდ მოჭადრაკედ მიიჩნევა. ეს გასაოცარი არ არის, რადგან საქართველოს მრავალსაუკუნოვან ისტორიაში ჭადრაკი არის გეოპოლიტიკური თამაში. ყველა გამოწვევის, ზეძალის მიუხედავად, როგორ შეიძლება, ეროვნული იდენტობისა და კულტურის შენარჩუნება ქვეყანაში, ეს ნამდვილად არის მოჭადრაკის, გროსმაისტერის უნარი. ბატონო პრემიერ-მინისტრო, მადლობას გიხდით, რომ ჩვენთან ერთად ხართ და წარმატებას გისურვებთ“, – განაცხადა ვიქტორ ორბანმა.
ირაკლი კობახიძემ ტრიბუნა ძირითადად ანტიდასავლური, ჰომოფობიური და პოპულისტური განცხადებებისთვის გამოიყენა.
“ე.წ ლიბერალები განსაკუთრებული ენთუზიაზმით იბრძვიან ქრისტიანობის წინააღმდეგ. ე.წ. ლიბერალებსა და ბოლშევიკებს შორის ერთადერთი განსხვავება ისაა, რომ ბოლშევიკები რელიგიის წინააღმდეგ ბრძოლის მთავარ იარაღად უროს იყენებდნენ, ე.წ. ლიბერალები კი ქრისტიანობას პროპაგანდით ებრძვიან, რომელსაც მედიის ტოტალური კონტროლის პირობებში უროზე ბევრად დიდი ძალა აქვს”, – თქვა მან.
გარდა ამისა, კობახიძემ თბილისში მიმდინარე პროტესტის დისკრედიტაციაც სცადა:
“დღეს საქართველოს მართლმადიდებელი ეკლესია მათი თავდასხმის განსაკუთრებული სამიზნეა. ორიოდე დღის წინ ქართულმა ე.წ. ლიბერალებმა საქართველოს ეროვნული იდენტობის კონცეფციის შეცვლაც კი სცადეს და სიტყვები: მამული, ენა სარწმუნოება, სიტყვებით: მამული, ენა, ერთობით შეცვალეს და ამოიღეს სიტყვა რწმენა.”
თავის პოპულისტურ გამოსვლაში, კობახიძემ ყურადღება გენდერულ იდენტობაზეც გაამახვილა და თქვა, რომ რამდენიმე ათეული წლის წინ ვერავინ წარმოიდგენდა, რომ “ამ თემაზე სერიოზული” მსჯელობა მოუწევდათ.
“ე.წ. ლიბერალების პოზიციის მიხედვით, ადამიანს არ უნდა ჰქონდეს მყარი გენდერული იდენტობა და ის ცხოვრების ნებისმიერ ეტაპზე თავად უნდა ირჩევდეს საკუთარ სქესს, ბავშვსაც კი უნდა ჰქონდეს სქესის არჩევის უფლებაო. ე.წ. ლიბერალებისთვის მიუღებელია გენდერულად განსაზღვრული ტერმინების გამოყენება, როგორებიცაა, მაგალითად, ქალი და კაცი ან დედა და მამა.
ე.წ. ლიბერალისთვის სინამდვილეში სრულიად უცხოა ისეთი ღირებულებები, როგორიცაა თავისუფლება და შემწყნარებლობა. ამ მიდგომის გაგრძელებაა ნარკოპოლიტიკის ლიბერალიზაციის კამპანია, რომელსაც ე.წ. ლიბერალები აქტიურად აწარმოებენ. ნარკოტიკები ადამიანში მოაზროვნე ინდივიდს კლავენ და მას ღირებულებებისგან დაცლილ სუბიექტად აქცევენ.” – თქვა კობახიძემ.
შარშან მაშინდელმა პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.
Associated Press-ის ცნობით როცა უნგრეთი მემარჯვენე პოპულისტური მთავრობის გამო ევროპაში დიდწილად იზოლირებულია, ისინი თანამოაზრე მოძრაობებს ქვეყნის გარეთ ეძებენ.
“ამერიკელ კონსერვატორთა კავშირის” ორგანიზებული “კონსერვატიული პოლიტიკური მოქმედების კონფერენცია”(CPAC) პირველად 1974 წელს გაიმართა. ეს ყოველწლიური ღონისძიება სხვადასხვა ქვეყნებშიც იმართება. უნგრეთი კონფერენციას უკვე მესამე წელია რაც მასპინძლობს.
ევროკავშირის ყველაზე პრორუსულ და პოპულისტურ მთავრობად მიჩნეული უნგრეთის ხელისუფლება და საქართველოს მთავრობა ერთმანეთის პოლიტიკის მიმართ სიმპათიებს არ მალავენ. 2022 წლის ოქტომბერში, ვიქტორ ორბანმა ქართველ კოლეგას, ირაკლი ღარიბაშვილს უწოდა “დიდებული პოლიტიკოსი იმ მცირეთა შორის”, რომელიც “დაბრუნდა”, საქართველოს პრემიერმა კი აღნიშნა, რომ საქართველოს მთავრობამ უნგრეთისგან ბევრი მაგალითი გადმოიღო და მათი წარმატებული რეფორმები გაიზიარა.
