"რეკომენდაციები მიუთითებს კანდიდატის სტატუსისკენ მიმავალ გზას" - ღარიბაშვილი ოლაფ შოლცს შეხვდა
ირაკლი ღარიბაშვილი ოლაფ შოლცს შეხვდა
საქართველოს პრემიერმინისტრი, ირაკლი ღარიბაშვილი გერმანიის კანცლერს, ოლაფ შოცლს სამუშაო ვიზიტის ფარგლებში შეხვდა. შეხვედრის შემდეგ გავრცელებულ რელიზში ვკითხულობთ, რომ გერმანიის კანცლერმა საქართველოს პრემიერმინისტრს მოუწოდა, რეფორმებისთვის საჭირო ნაბიჯები გადადგას.
საქართველოს მთავრობის ადმინისტრაციის ცნობით შეხვედრაზე ღარიბაშვილმა ოლაფ შოლცს “12 რეკომენდაციის შესრულების კუთხით არსებული მნიშვნელოვანი პროგრესი გააცნო” და ასევე თქვა, რომ საქართველო კანდიდატის სტატუსის მოლოდინშია.
შეხვედრის პრესკონფერენცია არ გამართულა.
გერმანიის მთავრობის განცხადება:
როგორც პრესრელიზშია აღნიშნული, ოლაფ შოლცმა და ირაკლი ღარიბაშვილმა ბერლინში გამართულ შეხვედრაზე ურთიერთობების გაღრმავებაზე, უსაფრთხოების საკითხებზე, ევროპულ პოლიტიკასა და უკრაინაში რუსეთის აგრესიული ომზე ისაუბრეს.
“ფედერალურმა კანცლერმა ხაზი გაუსვა, რომ გერმანია გააგრძელებს საქართველოს მხარდაჭერას ევროკავშირისკენ მიმავალ გზაზე, და მოუწოდა საქართველოს მთავრობას რეფორმებისთვის საჭირო ნაბიჯები გადადგას. ევროკომისიის რეკომენდაციები მიუთითებს კანდიდატის სტატუსისკენ მიმავალ გზას. მან მოუწოდა საქართველოს მთავრობას უახლოეს კვირებში დროულად და მაქსიმალური მონდომებით მიიღოს აუცილებელი ზომები.
რაც შეეხება უსაფრთხოების საკითხს, ფედერალურმა კანცლერმა ხაზი გაუსვა, რომ გერმანია აგრძელებს საქართველოს სუვერენიტეტისა და ტერიტორიული მთლიანობის მხარდაჭერას საერთაშორისოდ აღიარებული საზღვრების ფარგლებში.” – ნათქვამია გერმანიის მთავრობის განცხადებაში.
● კატრინ კოლონა: ევროკავშირის გზაზე, სამართალი და მედიის თავისუფლება ერთ-ერთი მთავარი ფაქტორებია
● ანალენა ბერბოკი: ჩვენ გვინდა, ვნახოთ საქართველო ევროკავშირში
● ბრიტანეთის საგარეო მდივანი: გააძლიერეთ ვალდებულებები მედიის თავისუფლებასა და სასამართლოს დამოუკიდებლობაზე
საქართველოს მთავრობის განცხადება
“შეხვედრაზე ირაკლი ღარიბაშვილმა ოლაფ შოლცს საქართველოს მიერ ევროინტეგრაციის გზაზე გადადგმული ნაბიჯები, განხორციელებული რეფორმები და ევროკომისიის 12 რეკომენდაციის შესრულებული კუთხით არსებული მნიშვნელოვანი პროგრესი გააცნო. პრემიერმა ასევე ისაუბრა საქართველოსთვის ევროკავშირის წევრი ქვეყნის სტატუსის მინიჭების მნიშვნელობაზე და აღნიშნა, რომ საქართველო წლის ბოლოს კანდიდატის სტატუსის მოლოდინშია.
შეხვედრაზე პრემიერ-მინისტრმა ასევე აღნიშნა, რომ ახლა საქართველოსთვის წევრი ქვეყნების როგორც პოლიტიკური, ისე პრაქტიკული მხარდაჭერა კრიტიკულად მნიშვნელოვანია ქვეყნის ევროკავშირში გაწევრიანების შემდეგი ეტაპისთვის.” – წერს მთავრობის ადმინისტრაცია.
მთავრობის ცნობით, ირაკლი ღარიბაშვილმა მადლობა გადაუხადა ოლაფ შოლცს მხარდაჭერისთვის:
“მთავრობის მეთაურის თქმით, ფედერალური კანცლერი საქართველოს ევროინტეგრაციას ყოველთვის ღიად უჭერს მხარს, რისთვისაც ირაკლი ღარიბაშვილმა ოლაფ შოლცს მადლობა გადაუხადა.
შეხვედრაზე ასევე აღინიშნა ორ ქვეყანას შორის არსებული მჭიდრო პარტნიორული და მეგობრული ურთიერთობები.”
