"[ოცნებას] მცდარი წარმოდგენები აქვთ დონალდ ტრამპზე. ის მხარს უჭერს ისეთ ლიდერებს, როგორიც ზურაბიშვილია" - ინტერვიუ ჯო უილსონთან
ინტერვიუ ჯო უილსონთან
რესპუბლიკელი კონგრესმენი, ჰელსინკის კომისიის თავმჯდომარე ჯო უილსონი აცხადებს, რომ “ქართულ ოცნებაში” დონალდ ტრამპზე “ყოვლად მცდარი წარმოდგენები” აქვთ, რადგან ის თავისუფლებისა და დემოკრატიის მხარდამჭერია და მხარს უჭერს ისეთ ლიდერებს, როგორიცაა პრეზიდენტი ზურაბიშვილი. მისივე თქმით, სანქციები – ეს მხოლოდ დასაწყისია. ამის შესახებ მან “რადიო თავისუფლებასთან” ინტერვიუში ისაუბრა.
საქართველოს პარლამენტის შენობაში 29 დეკემბერს, “ქართული ოცნების” მიერ დანიშნული პრეზიდენტის, მიხეილ ყაველაშვილის ინაუგურაცია გაიმართა.
ყაველაშვილი პირველი პრეზიდენტია, რომელიც ხალხის მიერ არ არის არჩეული. მის ლეგიტიმურობას არ აღიარებს ოპოზიცია, სამოქალაქო საზოგადოება, საქართველოში მოქმედი არასამთავრობო ორგანიზაციები; მისთვის გამარჯვება არ მიულოცავთ არც საქართველოს დასავლელ პარტნიორებს.
ინაუგურაციის პარალელურად, სალომე ზურაბიშვილის მხარდასაჭერად, რომელსაც საზოგადოების დიდი ნაწილი ერთადერთ ლეგიტიმურ პრეზიდენტად მიიჩნევს, საქართველოს პრეზიდენტის ორბელიანების სასახლესთან დილიდან ათასობით ადამიანი შეიკრიბა
ჯო უილსონი:
“ჩემთვის პრეზიდენტი ზურაბიშვილი საქართველოს ლეგიტიმური პრეზიდენტია. და ამ შეხედულებას ძალიან ბევრი ამერიკელი იზიარებს. ვიმედოვნებდით, რომ შესაძლებელი იქნებოდა პუტინის ჩარევის აღკვეთა საქართველოს პოლიტიკურ სისტემაში, მაგრამ, სამწუხაროდ, ეს არ მოხდა. ამას დღეს ყველა იაზრებს ამერიკაში, ბაიდენის ადმინისტრაციაშიც კი. არის აღქმა, რომ საქართველოში არსებული ვითარება [რუსული] ჩარევის (სუბვერსიის) შედეგია, რაც ჩვენთვის, ტრამპის მხარდამჭერებისათვის, განსაკუთრებით შემაშფოთებელია.
აი, თვალი შევავლოთ, რას აკეთებს საქართველოს მთავრობა: მაისის ბოლოს, საქართველოს პრემიერ-მინისტრი მონაწილეობდა ირანის პრეზიდენტის, მკვლელი იბრაჰიმ რაისის დაკრძალვაში, „თეირანის მოლებისათვის“ პატივისცემის დასადასტურებლად. ეს საქართველოს „ბოროტების ღერძის“ – ირანის, ომის დამნაშავე პუტინისა და ჩინეთის კომუნისტური პარტიის მჭიდრო პარტნიორად წარმოაჩენს. ეს ძალიან მრავლისმეტყველია.
დარწმუნებული ვარ, პრეზიდენტი ტრამპი, როდესაც თეთრ სახლში დაბრუნდება, სათანადოდ იქნება ინფორმირებული, რომ “ქართული ოცნება“ თანამშრომლობს თეირანის რეჟიმთან, რომელიც მის წინააღმდეგ მკვლელებს აგზავნის. ამასთან დაკავშირებით [ტრამპის ადმინისტრაციაში] აბსოლუტური სიცხადე იქნება
ვფიქრობ, მათ ყოვლად მცდარი წარმოდგენები აქვთ დონალდ ტრამპზე. ის თავისუფლებისა და დემოკრატიის მხარდამჭერია და მხარს უჭერს ისეთ ლიდერებს, როგორიცაა პრეზიდენტი ზურაბიშვილი, რომელიც ომის დამნაშავე პუტინის წინააღმდეგ იმაღლებს ხმას. მართალია, ტრამპი მოლაპარაკების მომხრეა, მაგრამ როცა ხედავს, რომ შეთანხმება ვერ შედგება, გადამწყვეტად მოქმედებს.
2020 წელს, სპიკერ მაიკ ჯონსონთან და [ტრამპის მომავალი ადმინისტრაციის] ეროვნული უსაფრთხოების მრჩეველ მაიკ უოლცთან ერთად, რესპუბლიკური კვლევითი კომიტეტის მეშვეობით გამოვაქვეყნეთ ანგარიში, რომელიც ივანიშვილის წინააღმდეგ სანქციების დაწესებას ითხოვდა. და, როგორც იქნა, ბაიდენის ადმინისტრაციამ ეს ნაბიჯი გადადგა.
შეიქმნა განწყობა, სადაც ისმის კითხვები საქართველოს დღევანდელი მთავრობის ლეგიტიმაციასთან დაკავშირებით, მათ აღიქვამენ, როგორც პუტინის გავლენის გამავრცელებელ ძალას.
ჩვენ ვნახეთ, რომ პუტინს ხელი მოეცარა მოლდოვასა და რუმინეთში, და დარწმუნებული ვარ, საბოლოოდ მარცხს იგემებს საქართველოშიც. სირიაშიც ხელი მოეცარა, მისი გლობალური წარუმატებლობების სია თანდათან იზრდება, სამწუხაროდ, მხოლოდ „ქართულ ოცნებასთან“ გამოუვიდა და მიაღწია წარმატებას
დარწმუნებული ვარ ასევე, რომ სანქციებიც გაგრძელდება იმ ინდივიდების წინააღმდეგ, ვინც საქართველოში დემოკრატიას ძირს უთხრის.
პრეზიდენტი ტრამპი არასდროს ერიდებოდა სანქციების გამოყენება-დაწესებას – ვფიქრობ, როგორც კი დაბრუნდება, განაახლებს სანქციებს თეირანის რეჟიმზე
მეტიც, ვფიქრობ, რომ ის დააწესებს მეორად სანქციებსაც, იმ ქვეყნებზე, რომლებიც თეირანთან თანამშრომლობენ, რადგან ამ რეჟიმმა ღიად გამოაცხადა ომი დონალდ ტრამპის წინააღმდეგ. დარწმუნებული ვარ, ის ამას უპასუხოდ არ დატოვებს.
ეს მხოლოდ დასაწყისია. ეს არის კიდევ ერთი მაგალითი, როდესაც პუტინმა გადაამლაშა, თავისი შესაძლებლობები გადაჭარბებულად შეაფასა და ჩათვალა, რომ რასაც საქართველოში აკეთებს, გაუვა. ამას გარდა, ჩინეთის კომუნისტურ პარტიასთან პორტების ინფრასტრუქტურის გარშემო დამყარებული კავშირები და ბიზნესურთიერთობები კიდევ უფრო ამტკიცებს საქართველოს ამ „ბოროტების ღერძთან“ მიერთებას. ეს არც საქართველოს ინტერესებშია, არც კავკასიის და არც უფრო ფართო რეგიონის.
ზუსტად იმავე სტატუსით ვიწვევ სალომე ზურაბიშვილს, როგორც ფილიპინების რესპუბლიკის წარმომადგენელთა პალატის სპიკერს და ბულგარეთის ყოფილ ელჩს, სტეფან სტოიანოვს. ჩემთვის ეს უკვე დიდი ხანია ტრადიციად იქცა – მსოფლიოს ლიდერების მოწვევა ვაშინგტონში მნიშვნელოვან ღონისძიებებზე. და დიდი იმედი მაქვს, პრეზიდენტი ზურაბიშვილი მიიღებს მიწვევას და მოვა, როგორც ჩემი სტუმარი. ის დაესწრება როგორც ინაუგურაციას, ასევე რიგ სხვა მნიშვნელოვან ღონისძიებებს.
3 იანვარს, როდესაც ახალი კონგრესი ფიცს დადებს, „მეგობარი აქტი“ ხელახლა იქნება წარდგენილი კონგრესში, ორპარტიული მხარდაჭერით – როგორც რესპუბლიკელების, ასევე დემოკრატების მხრიდან.
ეს კიდევ ერთხელ დაადასტურებს ამერიკის ერთგულებას და მხარდაჭერას ქართველი ხალხის მიმართ. ეს იქნება ერთ-ერთი პირველი კანონპროექტი, რომელსაც ახალი კონგრესი განიხილავს – სხვა ისეთ მნიშვნელოვან საკითხებზე ადრე, როგორიცაა ენერგეტიკა, საზღვრების უსაფრთხოება და ეკონომიკური განვითარება
ტრამპის გუნდის ლიდერები, როგორებიც არიან [მომავალი სახელმწიფო მდივანი] მარკო რუბიო – ადამიანი, რომლის ოჯახსაც კომუნისტური კუბის დატოვება მოუხდა და ამიტომაც, პირად მაგალითზეც კარგად ესმის ტოტალიტარიზმის საშიშროება, ასევე [მომავალი ელჩი გაეროში] ელის სტეფანიკი და [მომავალი მრჩეველი ეროვნული უსაფრთხოების საკითხებში] მაიკ უოლცი – ეს ხალხი საქართველოს კარგად იცნობს, ისინი გულშემატკივრობენ დემოკრატიულ, თავისუფალ საქართველოს და ამ საქმეში წამყვან როლს შეასრულებენ. მათი მიზანი იქნება, რომ საქართველოს თავისუფლება და დემოკრატია პრიორიტეტად დარჩეს [ამერიკისთვის].”
