სტატისტიკის ეროვნული სამსახურის ინფორმაციით, 2023 წლის აგვისტოში, წინა თვესთან შედარებით, ინფლაციის დონე 0.7%-ით გაიზარდა, ხოლო წლიურმა ინფლაციის დონემ საქართველოში 0.9% შეადგინა.
● ალკოჰოლურ სასმელებსა და თამბაქოზე – 5.7%-ით.
● განათლება – 6.9%-ით.
● საცხოვრებელი, წყალი, ელ.ენერგია და აირი 5%-ით, სასტუმროები, კაფეები და რესტორნები კი, 7.2%-ით.
ფასები მომატებულია შემდეგ ქვეჯგუფებზე:
● ბოსტნეული და ბაღჩეული (46.4%), ● ხილი და ყურძენი (12.9%), თევზეული (9.7%), ● ხორცი და ხორცის პროდუქტები (5.8%), ● მინერალური და წყაროს წყალი, უალკოჰოლო სასმელები და ნატურალური წვენები (5.8%), ● ყავა, ჩაი და კაკაო (1.8%).
საქსტატის ცნობით, ფასები შემცირებულია ზეთსა და ცხიმზე (-26.3%), პურსა და პურპროდუქტებზე (-7.9%).
ერთ წელში ფასი ყველაზე მეტად ტრანსპორტზე (-7.9%) და ჯანდაცვაზე (-7.3%) შემცირდა. ავეჯი, საოჯახო ნივთები, სახლის მოვლა – 0.6%-ით გაიაფდა, დასვენება, გართობა და კულტურა – 1.5%-ით.
ასევე, ივლისთან შედარებით, სურსათსა და უალკოჰოლო სასმელებზე ფასები 2.1%-ით გაიზარდა, აქედან ყველაზე მეტად ფასმა ბოსტნეულსა და ბაღჩეულზე მოიმატა (19.3%). საქსტატი ირწმუნება, რომ ამ კატეგორიაში ფასები შემცირდა პურსა და პურპროდუქტებზე (-1.2%), ასევე, ზეთსა და ცხიმზე (-1.1%);
2022 წელი ქვეყანამ მშპ-ს 10.1%-იანი ზრდით დაასრულა. აღსანიშნავია, რომ გასულ წელს საქართველოს ეკონომიკაში გამოკვეთილი ძირითადი ტენდენციები, დიდწილად, რუსეთ-უკრაინის ომითაა გამოწვეული. მას შემდეგ, რაც რუსეთი უკრაინაში შეიჭრა, რუსეთიდან და ბელარუსიდან საქართველოში ათასობით ადამიანი შემოვიდა. გასული წლის ეკონომიკური ზრდა სწორედ ამ ერთჯერადი მიგრაციული პროცესებითაა გამოწვეული.
ეკონომიკური ზრდის მიუხედავად, ინფლაცია მოსახლეობისთვის მთავარ გამოწვევად რჩება, რის გამოც ადამიანების ეკონომიკური მდგომარეობა არ უმჯობესდება. ამასთან, მიგრაციის შედეგად სტიმულირებული მოთხოვნის გამო უძრავი ქონების ფასები იზრდება. იმის გათვალისწინებით, რომ ქირა ფასების კალათის ერთ-ერთი კომპონენტია, მისი ზრდა იწვევს ინფლაციის მატებას, რაც მოსახლეობისთვის კიდევ უფრო დიდ ეკონომიკურ დარტყმას წარმოადგენს.
მიუხედავად ორნიშნა ეკონომიკური ზრდისა, Heritage Foundation-ის 2022 წლის ეკონომიკური თავისუფლების ინდექსში საქართველოს მდგომარეობა მკვეთრად გაუარესდა, კერძოდ, ერთ წელიწადში ქვეყანა საერთაშორისო რეიტინგის მე-12 პოზიციიდან 26-მდე ჩამოქვეითდა, რაც საქართველოს სარეიტინგო ქულის გაუარესების უპრეცედენტო მაჩვენებელია.
საერთაშორისო გამჭვირვალობა – საქართველოს (TI) მიხედვით კი უკრაინაში ომის დაწყების შემდეგ, რუსეთის მოქალაქეები საქართველოში თვეში საშუალოდ 1 300 კომპანიას არეგისტრირებენ.
მათ მიერ გამოქვეყნებული სტატისტიკის თანახმად, ომის დაწყების შემდეგ (2022 წლის მარტი) რუსეთის მოქალაქეებმა 21 326 კომპანია დაარეგისტრირეს. ეს მონაცემები გასული 27 წლის მონაცემებს თითქმის სამჯერ აღემატება.
