გიორგი გახარია: პროკურატურამ, გამოძიების ფარგლებში, ხმის მიცემის აღჭურვილობა დააყადაღა
გიორგი გახარიას განცხადება
პარტია “გახარია საქართველოსთვის” ლიდერის, გიორგი გახარიას თქმით, მას შემდეგ, რაც ცესკოს 2024 წლის საპარლამენტო არჩევნებზე ამომრჩეველთა სიების გასაჯაროების მოთხოვნით მიმართეს, საქართველოს პროკურატურამ, გამოძიების ფარგლებში, ხმის მიცემის აღჭურვილობა დააყადაღა. მისივე განმარტებით, ახლა აღნიშნულ მონაცემებზე წვდომა ცენტრალურ საარჩევნო კომისიასაც აღარ აქვს.
პროკურატურის განცხადებით, არჩევნების გაყალბების საქმის გამოძიების ფარგლებში, ცენტრალური საარჩევნო კომისიის ადმინისტრაციულ შენობაში საპარლამენტო არჩევნებში გამოყენებული ამომრჩეველთა ვერიფიკაციის აპარატები დაილუქა. როგორც უწყებაში აცხადებენ, ამის მიზეზია მათზე არსებული ინფორმაციის დაცულობის უზრუნველყოფაა, შემდგომში საგამოძიებო და საპროცესო მოქმედებების ჩატარებისთვის.
პარტია “გახარია საქართველოსთვის” 5 ნოემბრის განცხადებით, სასამართლომ არ დააკმაყოფილა მათი მოთხოვნა ცესკოს სერვერებზე და ხმის მიცემის აპარატებში არსებული მონაცემების გადაუდებელი აუცილებლობით დაცვაზე, “ხოლო პროკურატურა ყალბი გამოძიების ფარგლებში ცდილობს ვერიფიკაციის აპარატების წაღებას”.
პარტიაში აღნიშნავენ, რომ შესაძლოა, არჩევნების გაყალბების უმნიშვნელოვანესი მტკიცებულებები განადგურდეს. განცხადებაში ნათქვამია ისიც, რომ ცესკოს პერსონალურ მონაცემთა კანონი, მაღალი საჯარო ინტერესიდან გამომდინარე, ავალდებულებდა ამ მონაცემების გასაჯაროებას.
რას ამბობს გიორგი გახარია
“დღეს საქართველოში ჩატარებული არჩევნები არავინ არ ცნო, როგორც დემოკრატიული, თავისუფალი. არჩევნების ლეგიტიმაციის საკითხი ჩამოკიდებულია ჰაერში. ჩვენი საერთაშორისო სადამკვირვებლო მისიები და უცხოური პარტნიორები ამბობენ, რომ აუცილებელია შესაბამისი გამოძიების ჩატარება, რომ შემდგომ გადაწყდეს ამ არჩევნების ლეგიტიმაციის საკითხი, ამიტომ ჩვენ სწორედ ამ პრობლემის მოსაგვარებლად მივმართეთ თხოვნით ცესკოს, რომ გაესაჯაროებინა იმ ამომრჩეველთა სიები, ვინც მიიღო მონაწილეობა არჩევნებში, იმის მითითებით თუ რომელ უბანზე მიიღეს მონაწილეობა.
ამაზე ცესკოს, რა თქმა უნდა, არანაირი რეაგირება არ მოახდინა. ამის შემდეგ მივმართეთ სასამართლოს იმისთვის, რომ სასამართლოს დაეცვა ის აღჭურვილობა, რომელზეც ეს ინფორმაცია ინახებოდა და მივმართეთ სასამართლოს თხოვნით, რომ გადაუდებლად მოეხდინა ამ აღჭურვილობის დაცვა.
სამწუხაროდ, სასამართლოზე გამოცხადდა ცესკოს წარმომადგენლები, რომლებმაც თქვეს, რომ პროკურატურამ დაიწყო გამოძიება და ამ გამოძიების ფარგლებში დააყადაღა ეს აღჭურვილობა. ფაქტობრივად, ახლა გვაქვს გარემოება, როდესაც მთავარი მტკიცებულება, რომელმაც არა მხოლოდ ჩვენთვის, საქართველოს მოქალაქეებისთვის და პირველ რიგში, ოცნებისთვის, შეიძლება დაამტკიცოს, რომ ეს არჩევნები იყო სამართლიანი და არაფერი არ გაყალბებულა, ამისთვის საჭიროა, ამ აღჭურვილობაზე არსებული სიების ინფორმაციის გასაჯაროება, რომ თითოეულმა ჩვენგანმა ნახოს სად და როდის მივეცით ხმა.
იმის მაგივრად, რომ ოცნებას ეს გაეკეთებინა, ოცნებამ პროკურატურის საშუალებით ეს აღჭურვილობა უბრალოდ ტყვეობაში აიყვანა, დააყადაღა. და ფაქტობრივად, დღეს ცესკო ღიად ამბობს, რომ რაღაც ფეიკ სისხლის სამართლის საქმის ფარგლებში, ცესკოსაც აღარ აქვს წვდომა ამ აღჭურვილობაზე და მთელი პასუხისმგებლობა ასე გადავიდა პროკურატურაზე.
შესაბამისად, ყველა ის გამოძიება, რასაც მოუწოდებს საქართველოს მოქალაქეები, ისევე როგორც საერთაშორისო საზოგადოება მოუწოდებს ოცნებას, რომ დავრწმუნდეთ იყო თუ არა ეს არჩევნები სამართლიანი, ოცნებასაც ხომ უნდა, რომ ამაში დავრწმუნდეთ, ამისთვის საჭიროა, ამ სიების გასაჯაროება. ზუსტად ეს აღჭურვილობა რამდენიმე დღის წინ ოცნებას აუყვანია ტყვეობაში, პროკურატურის საშუალებით, რაღაც სისხლის სამართლის საქმის ფარგლებში”. – თქვა გახარიამ ბრიფინგზე.
26 ოქტომბრის საპარლამენტო არჩევნების შემდეგ საქართველო ახალი, სრულიად განსხვავებული რეალობის წინაშე აღმოჩნდა.
არჩევნებში ხმების უმრავლესობა – თითქმის 54 პროცენტი “ქართულმა ოცნებამ მიიღო. ეს 12 პროცენტით მეტია ეგზიტპოლის შედეგზე. ამ მონაცემების არ სჯერა არც ადგილობრივ დამკვირვებლებს და არც საერთაშორისო თანამეგობრობას. დამკვირვებლების და ექსპერტების მიერ აღმოჩენილმა ათასობით დარღვევამ და გაყალბების სისტემურმა სქემამ არჩევნების შედეგები კითხვის ნიშნის ქვეშ დააყენა როგორც ქვეყნის შიგნით, ასევე მის ფარგლებს გარეთაც.
საერთაშორისო თანამეგობრობა არ აღიარებს არჩევნების შედეგებს და მათ ლეგიტიმურობას ეჭვის ქვეშ აყენებს. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია. საქართველოში ევროკავშირის ელჩის, პაველ ჰერჩინსკის განცხადებით, მთავრობის კურსის გამო, ევროკავშირის ლიდერებმა ქვეყნის ევროკავშირში გაწევრების პროცესი შეაჩერეს, მწვავე განცხადებების ისმის აშშ-დანაც.
