"პირნათლად ვემსახურე ქვეყანას" - ღარიბაშვილმა პრემიერის პოსტი დატოვა

ღარიბაშვილმა პრემიერის პოსტი დატოვა

ირაკლი ღარიბაშვილმა პრემიერმინისტრის თანამდებობა დატოვა. ის პარტიის თავმჯდომარის პოსტს გადაიბარებს. ამის შესახებ მან მთავრობის ადმინისტრაციაში გამართულ ბრიფინგზე განაცხადა.

“ნება მომეცით, მკაფიოდ განვმარტო ამ გადაწყვეტილების მიზეზი. გასული წლის ბოლოს საზოგადოებას ჩავაბარე ვრცელი ანგარიში ჩემი საქმიანობის შესახებ.

მე პირნათლად ვემსახურე ჩვენს ქვეყანას, უკომპრომისოდ ვიცავდი ჩვენი ქვეყნის და ხალხის ინტერესებს და ვამაყობ შედეგებით, რომელსაც ამ პერიოდში, გუნდთან ერთად მივაღწიე. მე ორჯერ მომიწია ამ უმაღლეს თანამდებობაზე მუშაობა. ჯამში, ყველაზე მეტხანს, 5 წელი ვიყავი პრემიერმინისტრი. ჩვენი პოლიტიკური გუნდის სიძლიერის ერთ-ერთი უმთავრესი ფაქტორი არის შიდა დემოკრატია, რომლის ყველაზე მკაფიო გამოვლინება გახლავთ როტაციის პრინციპი. გუნდში მრავალი წარმატებული ლიდერია და საჭიროა, სხვებსაც მიეცეთ შესაძლებლობა.

ახალი ამოცანების წინაშე ვართ, შემოდგომაზე ახალ პარლამენტს ავირჩევთ და ქართული ოცნება უნდა მოემზადოს არჩევნების დამაჯერებლად მოსაგებად და გავაგრძელოთ წინსვლა სხვა უფრო დიდი მიზნების მისაღწევად.

ამ პოლიტიკური რეალობიდან გამომდინარე, პოლიტსაბჭოსგან მივიღე შეთავაზება, დავიკავო პარტიის თავმჯდომარის თანამდებობა, ამასთან დაკავშირებით ყრილობა გაიმართება პირველ თებერვალს. არ დაგიმალავთ, რომ პოლიტსაბჭოში განვიხილეთ შესაძლებლობა, რომ ზაფხულში, საარჩევნო კამპანიის დაწყებამდე დავრჩენილიყავი, თუმცა ვარჩიე, ახლა მიმეღო ეს გადაწყვეტილება.” – განაცხადა ირაკლი ღარიბაშვილმა.

● ნოდარ ხარშილაძის კომენტარი: დღეს “ქართულ ოცნებაში” შიდა სამოქალაქო ომია
● “ბიძინა ივანიშვილის როლი არის ჩვენი ქვეყნის გადარჩენა”. “ოცნება” ივანიშვილის დაბრუნებაზე
● გია ხუხაშვილის კომენტარი: ბიძინა ივანიშვილის გადაწყვეტილებაში ვხედავ პირად მოტივებს, შფოთვებს და რისკებს

დღეს სამთავრობო მედია TV იმედმა გაავრცელა ინფორმაცია, რომ “ქართული ოცნების” მოქმედ თავმჯდომარეს, ირაკლი კობახიძეს პრემიერმინისტრის თანამდებობაზე წარადგენენ, ხოლო მოქმედი პრემიერი ირაკლი ღარიბაშვილი მმართველი პარტიის თავმჯდომარის თანამდებობას დაიკავებს. ასევე, ირაკლი კობახიძე პარტიის პოლიტიკური მდივნის პოსტს დაიკავებს.

ტელეკომპანიის ცნობით, 24 იანვარს ჩატარებულ “ქართული ოცნების” პოლიტსაბჭოს სხდომაზე გადაწყდა, რომ პირველ თებერვალს პარტიის ყრილობა გაიმართება.

ირაკლი ღარიბაშვილმა მთავრობის მეთაურის თანამდებობა ორჯერ დაიკავა. პრემიერმინისტრის პოსტზე პირველად 2013 წელს დაინიშნა, თუმცა ის ორ წელში, 2015 წელს მოულოდნელად დატოვა.

შემდგომში ის ამავე თანამდებობაზე 2021 წლის 18 თებერვალს აქამდე მოქმედი პრემიერმინისტრის, გიორგი გახარიას გადადგომის შემდეგ წარადგინეს. მანამდე ღარიბაშვილი ჯერ პარტიის გენერალურ მდივნად, შემდეგ თავდაცვის მინისტრად დაინიშნა, 23 თებერვალს კი პრეზიდენტმა სალომე ზურაბიშვილმა ღარიბაშვილის საქართველოს პრემიერმინისტრად დანიშვნის შესახებ განკარგულებას ხელი მოაწერა.

მოსალოდნელ სამთავრობო ცვლილებებზე ექსპერტები ბიძინა ივანიშვილის პოლიტიკაში მეორედ მობრუნების შემდეგ საუბრობდნენ.