ღარიბაშვილი დღეს პარლამენტში იყო. რა თქვა მან - ძალიან მოკლედ
ღარიბაშვილის გამოსვლა პარლამენტში
პარლამენტში დღეს ინტერპელაციის წესით პრემიერ-მინისტრი ღარიბაშვილი იყო დაბარებული.
ღარიბაშვილი რამდენიმე ოპოზიციონერმა დეპუტატმა ევროკავშირის მიერ საქართველოსთვის მიცემული 12 რეკომენდაციის შესრულების პროცესზე პასუხების გასაცემად დაიბარა.
პრემიერმა თქვა, რომ 24 საათი სტატუსზე ლაპარაკი ფარისევლობაა, მაშინ როცა მთავარი პრობლემა არის ქვეყნის გაერთიანება. გამიჯნულ დეპუტატებს, რომლებიც კელი დეგნანს თავს ესხმიან, მან “ძვირფასი დეპუტატები” უწოდა, რომლებიც “უფრო ზომიერები” უნდა იყვნენ შეფასებებში. მან ასევე ბევრი ისაუბრა წინა ხელისუფლებაზე, საქართველოს ომში ჩათრევის მცდელობაზე და დეპოლარიზაციისკენ მოუწოდა ოპოზიციას, რომელსაც ამავე გამოსვლაში დაბოღმილები, შურიანები და კლოუნები უწოდა.
პრემიერმა ისე დატოვა პარლამენტი, რომ ოპოზიციონერი დეპუტატების კითხვებზე პასუხი არ გაუცია. ნაცვლად ამისა, ისინი ანტისახელმწიფოებრივ საქმიანობაში დაადანაშაულა და უთხრა, რომ არ აპირებდა სათითაოდ ეპასუხა მათ მიერ დასმულ კითხვებზე.
მოკლედ, რამდენიმე დასამახსოვრებელი ციტატა:
დეპოლარიზაციაზე:
“12 რეკომენდაციიდან პირველი არის დეპოლარიზაცია ანუ ევროპელი ლიდერები, მეგობრები გეუბნებიან, რომ დაასრულეთ ეს სამარცხვინო რიტორიკაც და ქვეყნის მტრობა. რას აკეთებთ იმისათვის, რომ მინიმუმამდე მაინც დაიყვანოთ ისედაც პოლარიზებული გარემო?”
ოპოზიციას:
● დაბოღმილი, გამწარებული, შურით აღვსილნი ხართ, საშინელებაა!
● თქვენ მინდა დაგისვათ კითხვა: გააცნობიეროთ, ვის ემსახურებით ასეთი დასუსტებული, დაქსაქსული, დეგრადირებული ოპოზიცია არ მინახავს 10 წელია.
● ერთადერთი ხსნა გაქვთ, ბატონო და ქალბატონო ოპოზიციის წარმომადგენლებო, რომ აირჩიოთ კლოუნი ხაბეიშვილი თავმჯდომარედ [ხაბეიშვილი “ნაციონალური მოძრაობის” თავმჯდომარედ იყრის კენჭს შიდა პარტიულ არჩევნებზე_JAMnews]. დიდი გამოწვევაა, მაგრამ ეს არის თქვენი ხსნა.
● ვნახეთ, როგორ დაესხა თავს ევროკომისარ ოლივერ ვაჰრეის მთელი დესტრუქციული ოპოზიცია რადიკალური ფორმითა და გამოხატვით, როგორი შეურაცხყოფა მიაყენეს ადამიანს, რომელმაც ჩამოიტანა პოზიტიური გზავნილი. ამაზე მეტი რა მტკიცებულება სჭირდება საზოგადოებას? ამ ადამიანებს არ უხარიათ არც ქვეყნის წარმატება, არც პოზიტიური შეფასება.
● როგორ ბედავთ საერთოდ თქვენ, ადეიშვილის ყოფილი მოადგილე, ერთ-ერთი მთავარი შემოქმედი იმ მახინჯი, მჩაგვრელი დიქტატორული რეჟიმის და სისტემის, რომელიც ადამიანებს კლავდა, აუპატიურებდა, აწამებდა, კერძო საკუთრების განცდა და ცნება საერთოდ არ არსებობდა ქვეყანაში, ძარცვავდა ბატონი კეზერაშვილი, თქვენი მთავარი ფორმალური თუ არაფორმალური მმართველი, ოლიგარქი, რომელმაც ჯერ ჯარი, ბიზნესი გაძარცვა და ახლა ევროპელი პენსიონერები, როგორ აძლევთ საკუთარ თავს იმის უფლებას, რომ აქეთ გადმოხვიდეთ შეტევაზე? ეს არის ჩვეულებრივი საბოტაჟი. ეს იყო შეთქმულება და ამაზე ვისაუბრეთ“, – განუცხადა ღარიბაშვილმა ვაშაძეს.
რუსეთის წინააღმდეგ სანქციებზე:
● აგვისტოს ომის შემდეგ სააკაშვილი პირადად ხვდებოდა საზღვარზე რუს ტურისტებს და შემოსვლას ეხვეწებოდა, მერაბიშვილი კი ამბობდა, „მერე რა მოხდა, რუსულ ფულს სუნი არ აქვსო“ – ამის მერე რა უფლებით გველაპარაკებიან სანქციებზე?
ევროკავშირის რეკომენდაციებზე და სტატუსზე:
● ჩვენ მუხლჩაუხრელად ვმუშაობთ, რომ ყველა რეკომენდაცია შესრულდეს და თქვენ [ოპოზიცია] რას აკეთებთ?
● როგორ წარმოგიდგენიათ ქვეყნის მომავალი ქვეყნის გაერთოანების გარეშე? 24 საათი ლაპარაკობთ სტატუსზე სტატუსზე. გასაგებია, გავიგეთ. წლები დასჭირდება იმისთვის რომ ჩვენი ქვეყანა გახდეს ევროკავშირის წევრი. ამას სჭირდება მომზადება. ამას არ სჭირდება ფარისევლობა და ტყუილი, რომ გამოდიხართ და ატყუებთ ხალხს, თითქოს რაღაც სასწაული მოხდება და დაინგრევა ქვეყანა, თუ არ მივიღეთ სტატუსი. გეთახმებით, რომ სტატუსი არის მნიშვნელოვანი. მაგრამ მინდა ჩვენს თანამოქალაქეებს ვუთხრა, რომ კანდიდატის სტატუსი ძალიან ბევრ ქვეყანას აქვს მიღებული და მას შემდეგ ისინი წლებია ელოდებიან წევრობასაც, არაფერი განსაკუთრებული არ მომხდარა მათ შემთხვევაში.
“ხალხის ძალაზე”:
● „ამ ადამიანებმა, ძვირფასმა დეპუტატებმა გადაწყვიტეს, რომ შექმნან ცალკე დამოუკიდებელი მოძრაობა და პარტიაც, ალბათ. ეს მათი არჩევანია… როგორ შეიძლება დეპუტატებს ვიღაცამ თავისუფალი აზრის გამოხატვის უფლება შეუზღუდოს. მე მინდა ყველას წარმატება ვუსურვო, ჩვენ არავის საქმეში არ ვერევით”
კელი დეგნანის წინააღმდეგ გაკეთებულ განცხადებებზე:
პირადად ჩემთვის მიუღებელია და ვარჩევდი, რომ უფრო მეტად ზომიერი განცხადებები გაკეთდეს აშშ-ს ელჩის მისამართით. თუ კითხვები არსებობს, კი ბატონო, კითხვები დავსვათ, მაგრამ არ შეიძლება ზომიერება დავარღვიოთ.
ომში საქართველოს “ჩათრევაზე”:
● უკრაინელმა მაღალჩინოსნებმა პირდაპირ თქვეს – საქართველოს ეს მთავრობა ომისთვის მზად არ არის და სააკაშვილი რომ ყოფილიყო ხელისუფლებაში, ომი იქნებოდა. ამაზე მეტი მტკიცებულება რა გინდათ?
● მთხოვდნენ [ოპოზიცია], რომ მიგვეღო ჩარტერული თვითმფრინავები და აქედან გაეგზავნათ მოხალისეები საბრძოლველად. ამაზე ნებართვა უნდა გაეცა სახელმწიფოს. ეს იყო პირდაპირ ომში ჩართვის მცდელობა და გათვლილი იყო იმაზე, რომ რუსეთს შესაბამისი რეაქცია ექნებოდა და გაიხსნებოდა მეორე ფრონტი, როგორც ეს მათ უკრაინელ პარტნიორებთან ერთად დააანონსეს.
● ეს ადამიანები [ნაციონალური მოძრაობა] რომ დღეს ხელისუფლებაში ყოფილიყვნენ… პოლიგონად გადააქცევდნენ ჩვენს ქვეყანას.
