"უნგრელ ხალხს ძალიან გაუმართლა, რომ ასეთი ბრძენი ლიდერი ჰყავს" - ღარიბაშვილის გამოსვლა ბუდაპეშტში

ღარიბაშვილის გამოსვლა ბუდაპეშტში

საქართველოს პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.

“როგორ ცდილობენ ძალები, რომლებიც თავისუფლებას, სიმართლეს უპირისპირდებიან, საკუთარი მიზნების მიღწევას? სწორედ ტრადიციული, ოჯახური ფასეულობების ნგრევითა და ყალბი თავისუფლების თავს მოხვევით – მაგალითად, ლგბტ პროპაგანდით, არასრულწლოვანი ბავშვებისათვის მშობლების გვერდის ავლით სქესის შეცვლის დაკანონების მცდელობით. ასეთი ე.წ. სიახლეების იძულებით, რომლებიც ადამიანს საკუთარ ფესვებს, ოჯახს, საკუთარ ტრადიციას, კულტურას, ისტორიას მოწყვეტს. ასეთი ადამიანის მართვა, რომელმაც დაივიწყა საკუთარი ისტორია, რწმენა, ადვილია. ამიტომ, ასეთ რთულ დროში ჩვენი უმთავრესი იარაღი და დასაყრდენი სწორედ ტრადიციული, ქრისტიანული, ოჯახური, კონსერვატიული ფასეულობებია.” – ამბობს პრემიერი.

მისივე განმარტებით, საქართველო ყველაფერს აკეთებს მშვიდობისთვის:

“იესო ქრისტე ამბობს სახარებაში – ნეტარ არიან მშვიდობისმყოფელნი, ვინაიდან ისინი ღმრთის ძეებად იწოდებიან. ამ ურთულეს დროში, მიუხედავად არაერთი პროვოკაციისა და დესტაბილიზაციის მცდელობისა, ჩვენ შევძელით მშვიდობის უზრუნველყოფა ჩვენს ქვეყანაში.”

როგორც ღარიბაშვილი ხაზს უსვამს, არავის ინტერესები არ უნდა შეიზღუდოს სხვათა ინტერესების გამო – “ჩვენ პატივს ვცემთ ჩვენი თითოეული მოქალაქის” უფლებებს და ამას საქმით ვამტკიცებთ. 

“2014 წელს, ერთის მხრივ, ევროკავშირის ვიზალიბერალიზაციის სამოქმედო გეგმის მოთხოვნის შესაბამისად და საკუთარი მოქალაქეობრივი პასუხისმგებლობის გრძნობით  მივიღეთ ანტიდისკრიმინაციული კანონი, რომელიც განუყრელად იცავს თითოეული მოქალაქის კონსტიტუციით გარანტირებულ უფლებებს, მაგრამ ასევე ვიცავთ უმრავლესობის უფლებებს, რომელთათვის ოჯახი ქალისა და მამაკაცის ერთობაა. დედა- ქალია, მამა კი კაცი.”  – განაცხადა ღარიბაშვილმა.

მისი თქმით, საქართველოს საზოგადოების უდიდესი უმრავლესობა ტრადიციულ, კონსერვატიულ ოჯახურ ღირებულებებს იზიარებს და ეს ფასეულობები მხოლოდ წარსული მემკვიდრეობა არ არის. ღარიბაშვილის განმარტებით, იგი ცოცხალი დღევანდელობაა – გარემო, რომელშიც “ჩვენ გავიზარდეთ და გვსურს ჩვენი შვილები” აღვზარდოთ:

“მე ოთხი შვილის მამა გახლავართ და ქართველი მშობლების უმრავლესობასთან ერთად მსურს ჩემი მომავალი თაობები ქრისტიანობაზე დაფუძნებულ უნიკალურ ღირებულებებზე აღვზარდოთ, ისე როგორც აღგვზარდეს ჩვენმა მშობლებმა.  ამიტომ დავიცავთ ყველას უფლებს. მაგრამ როგორც არ დავუშვებთ უმცირესობაზე ძალადობას, ისევე არ დავუშვებთ უმცირესობის ძალადობას უმრავლესობაზე.”

როგორც პრემიერი ამბობს, ტრადიციების ერთგულება არ ნიშნავს, რომ უარი უნდა ვთქვათ განახლებაზე, “მაგრამ ჩვენ ვიცით, რომ ბოროტება ხშირად სწორედ განახლების სახელით მოდის.” მისი თქმით, ასე იყო ფაშიზმის შემთხვევაშიც და არა ერთხელ მთელ ისტორიაში.

“ჩვენმა პატრიარქმა ბრძანა, თავისუფლებას ცრუ თავისუფლების სახელით ებრძვიან – რაც მართლა ასეა, არავინ ებრძვის თავისუფლებას მონობის სახელით. არავინ უპირისპირდება სიმართლეს სიცრუის სახელით, არამედ ცრუ სიმართლის სახელით.” – განაცხადა საქართველოს პრემიერმა.

ღარიბაშვილმა ასევე მადლობა გადაუხადა ვიქტორ ორბანს:

“მინდა ვისარგებლო შემთხვევით, კიდევ ერთხელ გადავუხადო მადლობა პრემიერ ორბანს ამ ძალისხმევის დაფასებისა და მუდმივი თანადგომისათვის. 

პრემიერმა ორბანმა დალასში გამოსვლისას იხუმრა, რომ უნგრეთი ნამდვილად არ არის სუპერძალა, საქართველოს – კიდევ უფრო პატარა ქვეყანას, მით უმეტეს არასდროს ჰქონია ამის ამბიცია. მაგრამ მაინც ვფლობთ სუპერძალას – ეს ძალა არის რწმენა, ჩვენი ოჯახები და ჩვენი ტრადიციები – მარადიული და უნივერსალური ფასეულობები. სწორედ ერთიანობით ჩვენ შევძლებთ დავუპირისპირდეთ ყალბი თავისუფლების სახელით მოსულ ბოროტებას.”

● სახელმწიფო დეპარტამენტი: 5 ივლისის საქმეზე არც ერთი ორგანიზატორი არ დასჯილა
● როგორ იბრძვის ლგბტქ თემი საკუთარი უფლებებისთვის საქართველოში და რას მიაღწია?
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა

ინფორმაცია იმის შესახებ, რომ საქართველოს პრემიერმინისტრი, ირაკლი ღარიბაშვილი უნგრეთში დაგეგმილ, ანტი LGBTQ კონსერვატიულ კონფერენციაზე სიტყვით გამომსვლელებს შორის იყო, ოფიციალურ საიტზე 27 აპრილს გამოქვეყნდა.

Associated Press-ის ცნობით, ამერიკული კონსერვატორთა კონფერენცია ევროპაში მეორედ გაიმართება და წელს მისი დევიზი იქნება “ერთად ძლიერები ვართ”. როგორც ორგანიზაცია აღნიშნავს, კონფერენცია ფოკუსირებული იქნება “ლიბერალების კოშმარზე: ეროვნული ძალების საერთაშორისო გაერთიანებაზე”.

როგორც გამოცემა იანვარში წერდა, როცა უნგრეთი მემარჯვენე პოპულისტური მთავრობის გამო ევროპაში დიდწილად იზოლირებულია, ისინი თანამოაზრე მოძრაობებს ქვეყნის გარეთ ეძებენ.

“ამერიკელ კონსერვატორთა კავშირის” ორგანიზებული “კონსერვატიული პოლიტიკური მოქმედების კონფერენცია” (CPAC) პირველად 1974 წელს გაიმართა. ეს ყოველწლიური ღონისძიება სხვადასხვა ქვეყნებშიც იმართება. უნგრეთი კონფერენციას უკვე მეორე წელია რაც მასპინძლობს.

ევროკავშირის ყველაზე პრორუსულ და პოპულისტურ მთავრობად მიჩნეული უნგრეთის ხელისუფლება და საქართველოს მთავრობა ერთმანეთის პოლიტიკის მიმართ სიმპათიებს არ მალავენ. 2022 წლის ოქტომბერში, ვიქტორ ორბანმა ქართველ კოლეგას, ირაკლი ღარიბაშვილს უწოდა “დიდებული პოლიტიკოსი იმ მცირეთა შორის”, რომელიც “დაბრუნდა”, საქართველოს პრემიერმა კი აღნიშნა, რომ საქართველოს მთავრობამ უნგრეთისგან ბევრი მაგალითი გადმოიღო და მათი წარმატებული რეფორმები გაიზიარა.