პენსიონერი მშობლების მორიგი საჩუქარი საქართველოს პრემიერს - 180 ათასი ლარი. ღარიბაშვილმა დეკლარაცია შეავსო

ღარიბაშვილის დეკლარაცია

საქართველოს პრემიერ-მინისტრმა ირაკლი ღარიბაშვილმა ქონებრივი დეკლარაცია შეავსო, რომელიც გასული წლის შემოსავლებსა და ხარჯებს ასახავს.

დოკუმენტის თანახმად ირკვევა, რომ გასულ წელს პრემიერმა მშობლებისგან საჩუქრად 180 ათასი ლარი მიიღო.

ეს პირველი შემთხვევა არ არის, როდესაც პრემიერს პენსიონერი მშობლები დიდ თანხას ჩუქნიან. 2020 და 2021 წლების დეკლარაციების მიხედვით, ამ წლებში ღარიბაშვილს მშობლებმა 150-150 ათასი ლარი აჩუქეს.

ჯამში გამოდის, რომ მხოლოდ ბოლო სამი წლის განმავლობაში ქვეყნის პრემიერ-მინისტრმა ირაკლი ღარიბაშვილმა მშობლებისგან 480 ათასი ლარი მიიღო საჩუქრად.

● “რა სკანდალი ნახეთ?” – აშშ-დან დაბრუნების შემდეგ, პრემიერის პირველი კომენტარები ბოლო დროს განვითარებულ მოვლენებზე
● TI: სავარაუდო კორუფციის 144 შემთხვევაში, 160-ზე მეტი თანამდებობის პირი მონაწილეობს
● სახელმწიფო დაცვის სამსახურის უფროსი: ღარიბაშვილის ჩარტერის ფული პრემიერის მამამ გადაიხადა

ვინ არის პრემიერის მამა და საიდან მას ამდენი ფული

პრეზიდენტის მამა, ტარიელ ღარიბაშვილი უმუშევარი პენსიონერია, რომელიც ოფიციალურად არანაირ ბიზნესს არ ფლობს, თუმცა მშობლიურ მუნიციპალიტეტში – დედოფლისწყაროში აქვს უზარმაზარი სახლი და ჯამში 4.5 ჰექტარი მიწის ფართობი.

რეესტრიდანვე ირკვევა, რომ ტარიელ ღარიბაშვილმა მიწების შესყიდვა 2014 წლიდან დაიწყო, მას შემდეგ, რაც მისი შვილი პრემიერი გახდა. მანამდე, 2012 წლამდე, ღარიბაშვილის მამა ერთ-ერთი სოფლის რწმუნებულის პოზიციას იკავებდა და მხოლოდ საგვარეულო სახლსა და მიწის ნაკვეთს ფლობდა, ნათქვამია ტელეკომპანია “მთავარის” გამოძიებაში.

ერთადერთი ბიზნესი, რომელიც დღეს ღარიბაშვილის მამის სახელზე ფიქსირდება, შპს “ქართული ფესვების“ 50%-იანი წილია. საჯარო რეესტრის ამონაწერებიდან ირკვევა, ღვინის მწარმოებელი ამ კომპანიის წილი ტარიელ ღარიბაშვილმა 2023 წლის 7 თებერვალს 200 ათას ლარად შეისყიდა. ანუ მანამდე, იმ წლებში, როდესაც ტარიელ ღარიბაშვილმა შვილს 300 ათასი ლარი აჩუქა, ის ოფიციალურად არანაირ ბიზნესს არ ფლობდა.

ტარიელ ღარიბაშვილი შვილს დიდი თანხების გარდა სხვა ტიპის საჩუქრებითაც ანებივრებს. ყოველ შემთხვევაში, ასეთია ოფიციალური ვერსია. სექტემბრის დასაწყისში ჟურნალისტებმა გაარკვიეს, რომ პრემიერმა პირადი მიზნებისთვის გამოიყენა სამთავრობო ბორტი – საკუთარი ოჯახის ტრანსპორტირებისთვის.

ირაკლი ღარიბაშვილის მგზავრობა აგვისტოში, სახელმწიფოს კუთვნილი თვითმფრინავით თბილისიდან მიუნხენამდე და მიუნხენიდან თბილისამდე 34 ათასი ევრო დაჯდა. ოფიციალური ვერსიით, აღნიშნული თანხა პრემიერ-მინისტრის მამამ, ტარიელ ღარიბაშვილმა გადაიხადა.

მაშინ პრემიერმა ჟურნალისტებთან განმარტა, რომ ის შეძლებული ოჯახიდან იყო, რომელსაც არასოდეს უჭირდა.

თუმცა, ინტერნეტში იძებნება ტარიელ ღარიბაშვილის 2013 წლის ინტერვიუ, რომელიც მან საკუთარი შვილის გაპრემიერების შემდეგ ambebi.ge-ს მისცა. ამ ინტერვიუში ტარიელ ღარიბაშვილი იხსენებდა, რომ შვილი სასწავლებლად საფრანგეთში მეგობრების შეგროვებული ფულით გაუშვა, საფრანგეთში მყოფი ირაკლი ღარიბაშვილი კი მიმტანად მუშაობისას ოჯახს ფინანსურად ეხმარებოდა.

იმავეს ამბობს ტარიელ ღარიბაშვილი ცხრა წლის წინ ნინო ჯღარკავასთვის მიცემულ ინტერვიუშიც.

“მთავარის” სიუჟეტიდან ვიგებთ, რომ პენსიონერი ტარიელ ღარიბაშვილის საკარმიდამოს ფართობი მშობლიურ სოფელ ხორნაბუჯაში წლიდან წლამდე მატულობს. დოკუმენტების მიხედვით, ერთი წლის წინ პრემიერის მამამ მეზობლის სახლიც შეიძინა და იქ ახალ შენობას აშენებს.

“სავარაუდო თანხა, რომელიც ღარიბაშვილების ოჯახს ჯამში სახლების, ეზოს და აუზის მოწყობა დაუჯდა, გაცილებით აღემატება არა მარტო ტარიელ ღარიბაშვილის პენსიას, არამედ იმ შემოსავალსაც, რასაც პრემიერმინისტრი წლიდან წლამდე ხელფასის სახით იღებს.” – აღნიშნულია ჟურნალისტურ გამოძიებაში.

● ოპოზიციური პარტიები და NGO-ები ღარიბაშვილის წინააღმდეგ იმპიჩმენტის პროცედურების და გამოძიების დაწყებას აპირებენ
● ზურაბ ბატიაშვილის მოსაზრება: საქართველო, რომელიც თავის დროზე რეფორმების მედროშე იყო, ახლა ყველაზე ჩამორჩენილ ჯგუფშია

ღარიბაშვილის სხვა ქონება მიმდინარე დეკლარაციის მიხედვით

რაც შეეხება პრემიერ-მინისტრის სხვა ქონებას, რომელიც დეკლარაციაში ასახული:

ირკვევა, რომ ხელფასის სახით, გასულ წელს, ღარიბაშვილმა 41 ათასი ლარის შემოსავალი მიიღო. შედარებისთვის ეს თითქმის ორჯერ ნაკლებია იმ ანაზღაურებაზე, რასაც რიგითი მინისტრები იღებენ.

დეკლარაციაში პრემიერ-მინისტრი უთითებს, რომ აქვს დანაზოგი ნაღდი ფულის სახით – 40 ათასი ლარი. ასევე, საბანკო ანგარიშებზე მას 23 ათასი ლარი აქვს განთავსებული. პრემიერის მეუღლეს, ნუნუ თამაზაშვილს კი საბანკო ანგარიშებზე 100 ათას ლარამდე აქვს განთავსებული.

პრემიერ-მინისტრის ოჯახი გასულ წელს ახალი ქონებით გამდიდრდა – ღარიბაშვილებმა ბორჯომის მუნიციპალიტეტში 1,530 კვადრატული მეტრის მიწის ნაკვეთი და მასზე განთავსებული 402 კვადრატული მეტრის სახლი შეიძინეს, რაშიც 76,500 დოლარი გადაიხადეს.

პრემიერის ოჯახმა 58 ათასი ლარის დანახარჯი გასწია შვილების განათლებაზე, ხოლო მოგზაურობის ხარჯად ირაკლი ღარიბაშვილი 8 ათას 868 დოლარს უთითებს.