გერმანელი პოლიტიკოსი: ნატო უნდა დაიშალოს

გერმანიის ბუნდესტაგში მემარცხენე პარტიის ფრაქციის მეთაური სარა ვაგენკნეხტი ნატო-ს გაუქმებისა და ევროპაში ახალი თავდაცვითი ალიანსის შეამნის ინიციატივით გამოვიდა, რომელშიც რუსეთიც მიიღებს მონაწილეობას.

ასეთი იყო გერმანელი პოლიტიკოსის რეაქცია აშშ-ის არჩეული პრეზიდენტის დონალდ ტრამპის განცხადებაზე იმის შესახებ, რომ ჩრდილოატლანტიკური ალიანსი “მოძველდა”.

“აუცილებელია ნატო დაიშალოს და უსაფრთხოების კოლექტიური სისტემით შეიცვალოს, რომელშიც რუსეთიც შევიდოდა”,  – განაცხადა ვაგენკნეხტმა. დოიჩე ველეს ცნობით, მან გერმანიის მთავრობა “შეცდომებსა და წარუმატებლობაში” ამხილა.

გერმანიის მემარცხენე პარტია ხშირად აკრიტიკებს გერმანიისა და ევროკავშირის პოლიტიკას რუსეთის მიმართ და აცხადებს, რომ მოსკოვის წინააღდეგ სანქციების შემოღება საშიშია.

გერმანული გამოცემა “ბილდისთვის” და ბრიტანიული “თაიმსისთვის” მიცემულ ინტერვიუში ტრამპმა ნატო მოძველებულ ორგანიზაციად გამოაცხადა და აღნიშნა, რომ არასწორია, როდესაც ალიანსის ქვეყნების უმრავლესობა თავდაცვისთვის აუცილებელ თანხებს არ იხდის და ეს ხარჯები ძირითადად აშშ-ის კისერზეა. თუმცა, “სხვა მხრივ ნატო ჩემთვის ძალიან მნიშვნელოვანია,” – განაცხადა აშშ-ის არჩეულმა პრეზიდენტმა.