კომენტარი: ილუზია, რომ კიდევ შესაძლებელია ოცნებამ გამოასწოროს ურთიერთობები პარტნიორებთან, კონგრესში განხილვამ სრულიად გაფანტა

განხილვა აშშ-ის კონგრესში

“სტრატეგიული ანალიზის ცენტრის“ დამფუძნებელმა, ვალერი ჩეჩელაშვილმა აშშ-ის კონგრესში საქართველოს შესახებ გამართულ მოსმენაზე კომენტარისას განაცხადა, რომ ილუზია, თითქოს კიდევ შესაძლებელია, “ქართულმა ოცნებამ“ გამოასწოროს ურთიერთობები პარტნიორებთან, “კონგრესში განხილვამ” სრულიად გაფანტა.

როგორც ვალერი ჩეჩელაშვილმა “პალიტრანიუსის” ეთერში აღნიშნა, კონგრესმენების ასეთი მკვეთრი შეფასებები ნათლად აჩვენებს, რომ პრობლემა არის არა “ომში ან მშვიდობაში“, არამედ იმაში, რომ “ქართული ოცნების“, პარტიის ფასეულობათა სისტემა განსხვავდება დასავლური პოლიტიკური კლასის ფასეულობათა სისტემისგან.

მისივე თქმით, შექმნილია პოლიტიკური ვითარება, როცა ერთ მხარეს დგას პრემიერმინისტრი ირაკლი კობახიძე, ხოლო მეორე მხარეს 15-20 ევროპული დედაქალაქი და ვაშინგტონი.

საქართველო დასავლური სამხედრო დახმარების გარეშე რჩება. რას ნიშნავს ეს ქვეყნისთვის?

აშშ, ევროკავშირი, ნატო ერთმანეთის მიყოლებით აჩერებენ საქართველოსთვის გამოყოფილ ფინანსურ დახმარებას

აშშ-ის კონგრესის საგარეო ურთიერთობათა კომიტეტში საქართველოსა და მოლდოვაში 2024 წელს ჩანიშნული არჩევნების და აშშ-ს პოლიტიკის შესახებ მოსმენა გაიმართა.

მოსმენაზე სახელმწიფო მდივნის მოადგილემ ჯოშუა ჰაკმა საქართველოში მიღებულ რუსულ კანონზე ისაუბრა და უპასუხა დეზინფორმაციის კამპანიას იმის შესახებ, რომ უცხოეთის გავლენის შესახებ კანონი აშშ-ს უცხოეთის აგენტების რეგისტრაციის აქტის (FARA) მსგავსია. 

რესპუბლიკელმა კონგრესმენმა ტომ კინმა განაცხადა, რომ “ქართული ოცნების” ლიდერის მუქარა კარგად შეესაბამებოდა უხეირო დიქტატორს და არა აშშ-ის ახლო პარტნიორს. მისივე თქმით, “მოუთმენლად ელის”, როგორ უპასუხებს ქართველი ხალხი მთავრობის ქმედებებს ოქტომბრის “კრიტიკულად მნიშვნელოვან” საპარლამენტო არჩევნებზე.

ვალერი ჩეჩელაშვილი: “ასეთი ხისტი განცხადებები ადრე არ გვინახავს: „უხეირო დიქტატორი“, „პრორუსული ქართული ოცნება“ – ასეთ შეფასებებს პოლიტიკოსები ძალიან იშვიათად აკეთებენ. განსაკუთრებით აშშ-სა და ევროპაში, სადაც პოლიტიკური კულტურის სტანდარტები მაღალია.

“უცხოური გავლენის გამჭვირვალობის შესახებ“ კანონის დაცვის გამო „ქართული ოცნება“ ანტიდასავლური ნარატივების კალაპოტში გადავარდა. სხვათა შორის, ბატონი ჯოშუა ჰაკი პირდაპირ ამბობს, რომ ეს კანონი პირდაპირ მიმართულია იმისკენ, რომ მოახდინონ სამოქალაქო საზოგადოების დემონიზება და დეზინფორმაციული და ყალბი შეტევა განახორციელონ დასავლეთსა და აშშ-ზე.

ასეთი მკვეთრი შეფასებები ნათლად აჩვენებს, რომ პრობლემა არის არა ომში ან მშვიდობაში, არამედ იმაში, რომ „ქართული ოცნების“, როგორც მმართველი პარტიის ფასეულობათა სისტემა არის აბსოლუტურად განსხვავებული იმ ფასეულობებთან, რომლითაც ხელმძღვანელობს ამერიკის და ევროპის პოლიტიკური კლასი.

ვისთანაც “ქართულ ოცნებას“ თითქოს ურთიერთობების გამოსწორება უნდა, ის ქვეყნები ეუბნებიან, რომ არ გამოვა ეს ასე, იმიტომ, რომ თქვენ გაქვთ დაშვებული ძალიან მნიშვნელოვანი შეცდომები, ამ შეცდომების გამოსწორების გარეშე, ეს არ გამოვა.

ამას ეუბნება აბსოლუტურად ყველა ერთი-ორი ადამიანის გამოკლებით. ეს ერთი-ორი ადამიანი არის ვიქტორ ორბანი და თეორიულად შეიძლება იყოს ფიცო. ორბანის გარდა, აბსოლუტურად ყველა დედაქალაქი ერთი და იგივე სინქრონულ გზავნილს აცნობს „ქართულ ოცნებას“ და ეს დამაფიქრებელია.

ერთ მხარეს არის ბატონი ირაკლი კობახიძე და მეორე მხარეს 15-20 ევროპული დედაქალაქი და ვაშინგტონი.