„გამოვიდეთ ქართული ეკლესიიდან“ - აფხაზეთის მართლმადიდებელი ეკლესია რუსეთისგან სტატუსს ითხოვს
აფხაზეთში, მართლმადიდებლურ ეკლესიებში ღვთისმსახურება შეჩერებულია – იმ დრომდე, სანამ რუსეთის მართლმადიდებელი ეკლესია არ გადაჭრის აფხაზეთის მართლმადიდებელი ეკლესიის სტატუსის საკითხს. ამის შესახებ, 22 თებერვალს, ტელეეთერში განაცხადა ეკლესიის ხელმძღვანელმა, მღვდელმა ბესარიონ აპლიამ.
აფხაზეთის მართლმადიდებელი ეკლესიის ინფორმაციით, მან დამოუკიდებელი არსებობა 1795 წელს შეწყვიტა და მას შემდეგ, ოფიციალურად საქართველოს მართლმადიდებელი ეკლესიის ნაწილს წარმოადგენს. 1990-იანი წლების დასაწყისში, აფხაზეთის ომის შემდეგ, მათ შორის კონტაქტები შეწყდა. როგორც აპლია ამბობს, „კონფლიქტის შედეგების შედეგად, აფხაზეთის ტერიტორია უკვე თითქმის ოცდაათი წელია საეკლესიო საზრდოს გარეშეა დარჩენილი“.
![Иерей Виссарион Аплиа. В Абхазии приостановлено богослужение в православных храмах - до тех пор, пока Российская православная церковь не решит вопрос статуса Абхазской православной церкви](https://jam-news.net/app/uploads/2020/04/Vissarionjpg-300x244.jpg)
მამა ბესარიონი ამბობს, რომ მან არაერთხელ სთხოვა მოსკოვის, საქართველოსა და სხვა მართლმადიდებლური ქვეყნების პატრიარქებს აფხაზეთის მართლმადიდებელი ეკლესიის აღდგენა.
თუმცა, პრიმატებმა მას უარი უთხრეს.
2009 წელს, აფხაზეთის მართლმადიდებელი ეკლესია დარეგისტრირდა თავად აფხაზეთში, თვითგამოცხადებული ავტონომიური სტატუსით. ეს 2008 წლის აგვისტოში, საქართველო-რუსეთის „ხუთდღიანი ომის“ შემდეგ მოხდა, როდესაც რუსეთმა ოფიციალურად აღიარა აფხაზეთისა და სამხრეთ ოსეთის დამოუკიდებლობა. საქართველო და საერთაშორისო თანამეგობრობის დიდი ნაწილი ამ რეგიონებს საქართველოს ტერიტორიად მიიჩნევს.
„რუსი სასულიერო პირები თავიანთ ეპარქიებში წავიდნენ. დაე, მათ დაუსვან კითხვა საკუთარ ეპისკოპოსებს, რომ შემდეგ უკვე მათ დააყენონ საკითხი მისი უწმინდესობის, პატრიარქ კირილის წინაშე: რა უნდა გავაკეთოთ შემდეგ?
ჩვენ არ შეგვიძლია ვიყოთ ქართული ეკლესიის ნაწილი, ჩვენ (ადრეც) არ ვიყავით ქართული ეკლესიის ნაწილი და არც ვიქნებით. ოცდაათი წელია ასეთ სიტუაციაში ვართ – ეს შეუძლებელია. მე შევაჩერე მსახურება ეკლესიებში იძულებითი ღონისძიების სახით“, – განაცხადა ბესარიონ აპლიამ.
მამა ბესარიონმა მორატორიუმიდან გამონაკლისი მხოლოდ სოხუმის მთავარი კათედრალური ტაძრისთვის დაუშვა, სადაც ის თავად აგრძელებს მსახურებას.
ორი ეკლესია აფხაზეთში განსხვავებული მოთხოვნებით
აფხაზეთის მართლმადიდებელი ეკლესიის გარდა, აფხაზეთში მოქმედებს კიდევ ერთი არაღიარებული მართლმადიდებელი ეკლესია. მას ეწოდება აფხაზეთის წმინდა მეტროპოლია და მას არქიმანდრიტი დოროფეი დბარი ხელმძღვანელობს.
![Архимандрит Дорофей (Дбар). В Абхазии приостановлено богослужение в православных храмах - до тех пор, пока Российская православная церковь не решит вопрос статуса Абхазской православной церкви](https://jam-news.net/app/uploads/2020/04/Dorophei-Abkhazia-300x300.jpg)
მამა ბესარიონი ორიენტირებულია რუსეთის მართლმადიდებელ ეკლესიაზე.
არქიმადრიტ დოროფეის კი მიაჩნია, რომ აფხაზეთის ეკლესიის სტატუსთან დაკავშირებით გადაწყვეტილება შეუძლია მიიღოს მსოფლიო პატრიარქმა, ბართოლომეოს პირველმა.
სწორედ კონსტანტინოპოლის პატრიარქი არის სტატუსით თანასწორთა შორის პირველი მსოფლიოში, ამბობს მამა დოროფეი.
ის არ შეუერთდა მორატორიუმს და მისი იურისდიქციის ქვეშ მყოფი ახალი ათონის მონასტერში ღვთისმსახურება ჩვეულებრივ რეჟიმში მიმდინარეობს.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო