გადადგეს ირაკლი ღარიბაშვილი. როგორია სახალხო მოძრაობის გეგმა
ახალი სახალხო მოძრაობა “შინ ევროპისკენ” წევრებმა რუსთაველის გამზირზე შეკრებილ აქციის მონაწილეებს მათი პირობები, მოთხოვნები და გეგმები გააცნეს. მათ მთავრობისა და პირადად ბიძინა ივანიშვილის მისამართით ორი პირობა წამოაყენეს:
- გადადგეს ირაკლი ღარიბაშვილი;
- ეროვნული თანხმობით შეიქმნას მთავრობა, რომელიც ევროკავშირის მიერ მოცემულ 12-პუნქტიან რეკომენდაციებს შეასრულებს წლის ბოლომდე.
აქციის მონაწილეებმა ხელისუფლებას პირობის შესასრულებლად 1 კვირიანი ვადა მისცეს.
“ხელისუფლებას აქვს ერთი კვირა იმისათვის რომ გადააყენოს ხელისუფლება და შეასრულოს მეორე პირობაც. იმ შემთხვევაში თუ ხელისუფლება, ბიძინა ივანიშვილი პირადად ყურად არ იღებს ქართველი ხალხის ნებას, ჩვენ მოვალთ. კიდევ უფრო მეტნი ვიდრე ვართ დღეს, ვიდრე ვიყავით 20 ივნისს და დავანახებთ მათ ქართველი ხალხის რისხვას”, – განაცხადა მოძრაობის ერთერთმა ლიდერმა შოთა დიღმელაშვილმა.
აქციის მონაწილეებმა სცენიდან მოქალაქეებს მიმართეს და აღნიშნეს, რომ ისინი ჩავლენ საქართველოს ყველა რეგიონში, ყველა ქალაქში და შეხვდებიან ქართველ ხალხს, აუხსნიან, თუ რატომ არის მნიშვნელოვანი ევროკავშირში საქართველოს ინტეგრაცია.
შემდეგი აქცია 3 ივლისს საღამოს 8 საათზე დაიგეგმა.
20 ივნისის მსგავსად, რომელიც უპრეცენდენტო იყო თავისი მასშტაბურობით საქართველოს ბოლო წლების ისტორიაში, 24 ივნისსაც, პარლამენტის გამზირზე, ათობით ათასი ადამიანი შეიკრიბა.
დედაქალაქის მთავარ გამზირზე ფრიალებდა საქართველოსა და ევროკავშირის დროშები, ისმოდა საქართველოს, უკრაინის, მოლდოვისა და ევროკავშირის ჰიმნები, ადამიანებს ჰქონდათ ბანერები წარწერებით: “We Are Europe”, “რეჟიმი დალპა – დეოლიგარქიზაცია”, “ეს ქვეყანა ჩვენია”, “შინ ევროპისკენ”, “ივანიშვილი = პუტინს”.
შეკრებილებს სცენიდან საზოგადოებისთვის ცნობილმა სახეებმა და ახალი სახალხო მოძრაობის დამფუძნებლებმა, ასევე უკრაინის პრეზიდენტმა ვოლოდიმირ ზელენსკიმ და უკრაინის რადას წევრმა დავით არახამიამ მიმართეს.
სამოქალაქო მოძრაობა „სირცხვილიას“ და სამოქალაქო ჯგუფების ინიციატივით, საქართველოში ახალი სახალხო მოძრაობა დაფუძნდა. ამ მოძრაობის მთავარი მიზანია ხელისუფლება აიძულოს ბოლომდე მიიყვანოს ევროკავშირში გაწევრიანების საქმე და დეკემბერში, საქართველომ ევროკავშირის კანდიდატი ქვეყნის სტატუსი მიიღოს.
