ტელეკომპანია “ფორმულას” დამფუძნებლის, დავით კეზერაშვილის საქმეზე სააპელაციო სასამართლომ პირველი ინსტანციის გადაწყვეტილება ძალაში დატოვა და მას თავდაცვის სამინისტროსთვის ზიანის ანაზღაურებისთვის 5 060 000 ევრო დააკისრა.
დავით კეზერაშვილის ადვოკატის, გიორგი მშვენიერაძის განცხადებით, სააპელაციო სასამართლოს გადაწყვეტილება პოლიტიკურია და მისი მიზანი ტელეკომპანია “ფორმულასთვის” პრობლემების შექმნაა.
“ძალიან ვწუხვარ, რომ დღეს თემიდა თვალახვეულის ნაცვლად, ყურდახშობილი აღმოჩნდა და ჩვენი კანონიერი მოთხოვნა სასამართლოსადმი, რაც ეხებოდა პირველი ინსტანციის უკანონო გადაწყვეტილების გაუქმებას, სასამართლომ არ გაითვალისწინა. კიდევ ერთხელ რომ ავხსნათ ძალიან მარტივად, მთელი ეს სამართალწარმოება დაწყებულია იმ მიზნით, რომ პრობლემები შეექმნას ტელეკომპანია ფორმულას იმიტომ, რომ სხვა არანაირი ქონება დავით კეზერაშვილს, რომელზეც შესაძლებელია ამ გადაწყვეტილების აღსრულება, არ გააჩნია გარდა ტელეკომპანია ფორმულას მმართველი წილისა და შესაბამისად, მთელი ეს სამართალწარმოება წამოწყებულია სწორედ ამ მმართველი წილის წასართმევად, რათა ფორმულას სარედაქციო პოლიტიკაზე მოახდინოს ხელისუფლებამ გავლენა.” – ამბობს მშვენიერაძე.
მმართველი პარტიის თავმჯდომარის, ირაკლი კობახიძის თქმით, ტელევიზიის ფლობა ინდულგენცია ვერ იქნება:
“მისი ფული არის სისხლიანი ფული. ეს არის ძარცვითა და რეკეტით ნაშოვნი ფული. როდესაც მას 5 მილიონი ევროს სახელმწიფო ბიუჯეტში დაბრუნება უწევს, ეს არის ის მინიმალური სასჯელი, რომელიც, შეიძლება, მას ყველა იმ უბედურებისთვის დაეკისროს, რაც ამ ადამიანმა თავის დროზე ჩაიდინა. რა თქმა უნდა, ტელევიზიის ფლობა ვერავისთვის ინდულგენცია ვერ იქნება. წინააღმდეგ შემთხვევაში, ნებისმიერი ადამიანი ნებისმიერ დროს თავის ტელევიზიას შექმნის.”
გუშინ სახელმწიფო დეპარტამენტმა საქართველოში ადამიანის უფლებების მდგომარეობის შესახებ 2022 წლის ანგარიში გამოაქვეყნა. დოკუმენტში ფორმულას დამფუძნებლის, დავით კეზერაშვილის შესახებ ვკითხულობთ, რომ თავდაცვის სამინისტროს სარჩელი კეზერაშვილის წინააღმდეგ შეეხება ერთ-ერთ კრიტიკულ ტელეკომპანიასაც, რადგან “ფორმულა” კეზერაშვილის ერთადერთ აქტივს წარმოადგენს.
2022 წლის 29 მარტს თბილისის საქალაქო სასამართლომ ფორმულას დამფუძნებელს, დავით კეზერაშვილსა და ალექსანდრე ნინუას თავდაცვის სამინისტროს სასარგებლოდ 5 060 000 ევროს ანაზღაურება დააკისრა. ამ გადაწყვეტილებით სასამართლომ სრულად დააკმაყოფილა საქართველოს თავდაცვის სამინისტროს სარჩელი.
დავით კეზერაშვილსა და ალექსანდრე ნინუას გენერალური პროკურატურა სამსახურებრივი უფლებამოსილების ბოროტად გამოყენებისა და სახელმწიფოს დიდი ოდენობით ფულადი თანხების მითვისება/გაფლანგვას ედავებოდა.
პროკურატურის მტკიცებით, საქმე ეხებოდა ოფშორულ ზონაში რეგისტრირებული კომპანია GIRWOOD BUSINESS CORP- ის სასარგებლოდ გარკვეული მომსახურების გაწევის მიზნით დიდი ოდენობით თანხის გადარიცხვას, თუმცა სამინისტროს ეს მომსახურება (წვრთნები) არ მიუღია. თუმცა კეზერაშვილის ადვოკატების მტკიცებულებები წვრთნების ჩატარებას ადასტურებს – არსებობს ვიდეო მასალები და მოწმეთა ჩვენებები.
უზენაესმა სასამართლომ დავით კეზერაშვილის საქმის განხილვა 2021 წლის საპარლამენტო არჩევნებამდე 2 დღით ადრე დაიწყო. ამას წინ უძღოდა ირაკლი ღარიბაშვილის მუქარა – “მე რაც წავედი, მერე გაამართლეთ თქვენ ის. ახლა მიხედავენ, როგორც ჩანს”.
საქართველოს თავდაცვის სამინისტრომ მიყენებული ზიანის ანაზღაურებას მოითხოვა იმ საქმეზე, რომელზეც უზენაესმა სასამართლომ რამდენიმე კვირით ადრე გამამტყუნებელი განაჩენი გამოიტანა, კეზერაშვილს 5-წლიანი პატიმრობა მიუსაჯა და ამით შეცვალა წინა ორი ინსტანციის სასამართლოს გამამართლებელი განაჩენი.
მაშინ როცა საქმის განხილვა დაიწყო, გენერალური პროკურორი შალვა თადუმაძე იყო, დღეს კი იგი უზენაესი სასამართლოს მოსამართლეა. სწორედ მან განიხილა დავით კეზერაშვილის საქმე კიდევ ორ მოსამართლესთან, ლევან თევზაძესთან და მერაბ გაბინაშვილთან ერთად.
5-წლიან სასჯელს განაჩენს გამოეხმაურა თავად “ფორმულას” მფლობელიც. მისი თქმით, ეს არის სამარცხვინო გადაწყვეტილება, რომლის “უშუალო ინიციატორი და ორგანიზატორი ივანიშვილის ხელის ბიჭი ირაკლი ღარიბაშვილია”. დავით კეზერაშვილი აცხადებს, რომ ამ საქმის მიზანია მისი და მის მიერ მხარდაჭერილი ტელევიზიის დაშანტაჟება.
არასამთავრობო ორგანიზაციების შეფასებით, ფორმულას დამფუძნებლის, დავით კეზერაშვილის წინააღმდეგ წარმოებული დავა ფორმულაზე ზეგავლენის მოხდენას ისახავს მიზნად.
თავად ყოფილი თავდაცვის მინისტრი, 2012 წლის შემდეგ, საქართველოში არ იმყოფება.
