ევროკავშირის წარმომადგენლობა: მოვუწოდებთ პარლამენტის წევრებს გამოიყენონ მინიჭებული მანდატები

მოვუწოდებთ პარლამენტის წევრებს გამოიყენონ საქართველოს მოქალაქეების მიერ მათთვის მინიჭებული მანდატები – წერია საქართველოში ევროკავშირის წარმომადგენლობის განცხადებაში, რომელიც 2020 წლის არჩევნებს ეხება.

“რათა განიხილონ მოუგვარებელი პოლიტიკური საკითხები და შექმნან უკეთესი საფუძველი მომავალი არჩევნებისთვის, ამბიციური საარჩევნო და სასამართლო რეფორმების გზით”, – აღნიშნულია განცხადებაში.

● “ქართული ოცნების” 17-ვე კანდიდატმა მოიგო მეორე ტურში, სადაც ოპოზიცია არ მონაწილეობდა

● საზოგადოების სხვადასხვა სფეროს წარმომადგენლებმა “შეურიგებლობის მანიფესტს” მოაწერეს ხელი

განცხადებაში ასევე ნათქვამია, რომ საქართველოს სჭირდება ქმედითი პარლამენტი, როგორც ცენტრალური ფორუმი პოლიტიკური დებატებისთვის, “სადაც ასოცირების შეთანხმებით გათვალისწინებული ჩვენი საერთო ვალდებულებების შესაბამისად – ყველა პარტია რეფორმების გასატარებლად ერთად იმუშავებს”.

● სახელმწიფო დეპარტამენტი: მოვუწოდებთ ოპოზიციას, შევიდნენ პარლამენტში

ევროკავშირის წარმომადგენლობის ანგარიშში გამოხატულია წუხილი პოლიტიკური პარტიების გადაწყვეტილებასთან დაკავშირებით, რომელიც პარლამენტში მათ არშესვლასთან არის დაკავშირებული:

“წუხილს გამოვთქვამთ იმ უნდობლობასთან დაკავშირებით, რომელმაც საარჩევნო პროცესზე ზეგავლენა მოახდინა, ასევე, იმის გამო, რომ მეორე ტურში ოპოზიციის კანდიდატებმა საპარლამენტო ადგილებისთვის ბრძოლაში მონაწილეობა არ მიიღეს”.

აქვე აღნიშნულია, რომ აქვთ მოლოდინი, ყველა პოლიტიკური პარტია შეძლებს მათ შორის არსებული განსხვავებების გადალახვას, რათა პარლამენტის ყველა არჩეულმა წევრმა, მიუხედავად მათი მხრიდან საარჩევნო პროცესის განსხვავებულად შეფასებისა, პარლამენტში თავისი ადგილი დაიკავოს.

“იმედი გვაქვს და მოველით, რომ ყველა პოლიტიკური პარტია შეძლებს მათ შორის არსებული განსხვავებების გადალახვას, რომ პარლამენტის ყველა არჩეულმა წევრმა, მიუხედავად მათი მხრიდან საარჩევნო პროცესის განსხვავებულად შეფასებისა, პარლამენტში თავისი ადგილი დაიკავოს”.

ევროკავშირი გამოთქვამს მზაობას, დაეხმაროს როგორც უმრავლესობას, ისე უმცირესობას, რათა მათ გამონახონ საერთო ენა საერთო მიზნის მისაღწევად:

“დღეს დიდი პასუხისმგებლობა ეკისრება როგორც უმრავლესობის, ისე ოპოზიციური პარტიების პოლიტიკურ ლიდერებს, რომ გამონახონ საერთო ენა საერთო მიზნის მისაღწევად, რაც საქართველოს შესაძლებლობას მისცემს ეფექტიანად გააგრძელოს დემოკრატიული გზით სვლა.

ევროკავშირი კვლავ მზად არის დაეხმაროს საქართველოს ამ ძალისხმევაში“, – ნათქვამია განცხადებაში.