რა წერია ევროკავშირის საბჭოს გაფართოების ანგარიშში. მთავარი
ევროკავშირის საბჭოს გაფართოების ანგარიში
ევროკავშირის საბჭო გაფართოების შესახებ ანგარიშს აქვეყნებს, რომელშიც ვკითხულობთ, რომ ევროკავშირი მზად არის, მხარი დაუჭიროს ქართველ ხალხს მათ ევროპულ გზაზე, ამავდროულად საბჭო იმეორებს შეშფოთებას მთავრობის მიერ არჩეულ კურსთან დაკავშირებით.
დასკვნაში საუბარია 26 ოქტომბრის საპარლამენტო არჩევნებზეც და “სერიოზული შეშფოთებაა” აღნიშნული ეუთო/ოდირის წინასწარ დასკვნებზე, რომელიც მიუთითებს, რომ არჩევნები ხასიათდებოდა ხარვეზებით და დაძაბული/უაღრესად პოლარიზებული გარემოთი. საბჭო “მკაცრად მოუწოდებს” საარჩევნო დარღვევების განხილვასა და გამოძიებისკენ.
ანგარიშში საბჭო წუხილს გამოთქვამს, საქართველოს მთავრობის ბოლო გადაწყვეტილების – შეაჩეროს ქვეყნის ევროკავშირში გაწევრიანების პროცესი 2028 წლამდე გამო და მკაცრად გმობს მშვიდობიანი დემონსტრანტების, მედიის წარმომადგენლებისა და პოლიტიკოსების წინააღმდეგ ძალადობას.
დასკვნაში საუბარია ვიზალიბერალიზაციაზეც და მოწოდებაა, სასწრაფოდ შესრულდეს ვიზალიბერალიზაციის კრიტერიუმები, მათ შორის ევროკავშირის ვიზალიბერალიზაციის პოლიტიკასთან თანხვედრის ნაწილში.
რა წერია ანგარიშში. მოკლედ
● ევროკავშირის საბჭო იმეორებს ევროკავშირის სერიოზულ შეშფოთებას საქართველოს მთავრობის მიერ არჩეულ კურსთან დაკავშირებით, მათ შორის „უცხოური გავლენის გამჭვირვალობის შესახებ“ მიღებულ კანონზე, ისევე, როგორც სხვა კანონპროექტებზე, რომლებიც ეწინააღმდეგება ევროკავშირის საყრდენ ღირებულებებსა და პრინციპებს და რომლებიც უკუსვლას წარმოადგენს ევროკომისიის მიერ კანდიდატის სტატუსისთვის განსაზღვრულ ნაბიჯებში.
● საბჭო იხსენებს, რომ 2024 წლის ივნისსა და ოქტომბერში ევროპულმა საბჭომ აღნიშნა, რომ ქმედებების მსგავსი კურსი ძირს უთხრის საქართველოს ევროპულ გზას, რამას გაწევრიანების პროცესის დე ფაქტო გაჩერება გამოიწვია.
● საბჭო დამწუხრებულია საქართველოს მთავრობის ბოლო გადაწყვეტილებით შეაჩეროს ქვეყნის ევროკავშირში გაწევრიანების პროცესი 2028 წლამდე.
● საბჭო მკაცრად გმობს მშვიდობიანი დემონსტრანტების, მედიის წარმომადგენლებისა და პოლიტიკოსების წინააღმდეგ ძალადობას.
● საქართველოს ოფიციალურმა პირებმა პატივი უნდა სცენ შეკრებისა და გამოხატვის თავისუფლებებს და ძალის გამოყენებისგან შეიკავონ თავი. ძალადობის ყველა აქტი უნდა გამოიძიოს და პასუხისმგებელმა პირებმა პასუხი უნდა აგონ.
● საბჭო მოუწოდებს “ქართული ოცნების” წარმომადგენლებს, სასწრაფოდ დაუბრუნდნენ ევროკავშირის გზას და გაატარონ დემოკრატიული, ყოვლისმომცველი და მდგრადი რეფორმები, რომელიც შესაბამისობაში იქნება ევროინტეგრაციის ძირითად პრინციპებთან.
● საბჭო ღრმად შეშფოთებულია დემოკრატიის, კანონის უზენაესობისა და ფუნდამენტური უფლებების სფეროებში უკანდახევის გამო. საქართველომ უნდა უზრუნველყოს ფუნდამენტური უფლებების სრული პატივისცემა, მათ შორის გამოხატვისა და შეკრების თავისუფლების, მედიის თავისუფლების, დამოუკიდებლობისა და პლურალიზმის, ისევე როგორც ლგბტი პირების უფლებების.
