ეროვნულ გამოცდებზე აბიტურიენტებისთვის პირბადის გაკეთება სავალდებულო აღარ იქნება

ერთიან ეროვნულ გამოცდებზე აბიტურიენტებს პირბადის გაკეთება აღარ დასჭირდებათ. პირბადის ტარება აუცილებელია რეგისტრაციის გავლის დროს, მანამდე, სანამ აბიტურიენტი მერხამდე მივა, უშუალოდ გამოცდის მსვლელობის დროს კი პირბადის გაკეთება სავალდებულო აღარ იქნება. დაავადებათა კონტროლის ეროვნული ცენტრის იმ რეკომენდაციით, რომელიც მთავრობამ 6 ივნისს გამოაქვეყნა, აბიტურიენტისთვის უშუალოდ გამოცდის დროს პირბადის ტარება სავალდებულო იყო. ეს იყო საკითხი, რომელიც ბევრ აბიტურიენტს და მშობელს აწუხებდა, რადგან ზაფხულის სიცხეში პირბადის ტარება ბევრ ადამიანს უჭირს. 

პრემიერ-მინისტრის განმარტებით, აბიტურიენტებისთვის გამოცდებზე კომფორტული გარემოს შექმნის მიზნით ჯანდაცვის სისტემის ექსპერტებთან და ეპიდემიოლოგებთან ერთად ახალი წესები შეიმუშავეს. 

• პირბადე, დამცავი ფარი და უკონდიციონერობა. 6 ივლისს საქართველოში ეროვნული გამოცდები იწყება

აქამდე არსებულ რეკომენდაციებში კიდევ ერთი ცვლილებაა – როგორც პრემიერ-მინისტრმა, გიორგი გახარიამ განაცხადა, იმ შემთხვევაში, თუ ოთახში ტემპერატურა 30 გრადუსს ასცდება, ნებადართული იქნება კონდინციონერის ჩართვაც.

ერთიანი ეროვნული გამოცდები საქართველოში 6 ივლისს, ხოლო სამაგისტრო გამოცდები პირველ აგვისტოს დაიწყება.  

ერთიანი ეროვნული გამოცდები ქვეყნის მასშტაბით 24 საგამოცდო ცენტრში ჩატარდება.

საგამოცდო ცენტრები გაიხსნება: თბილისში, ბათუმში, ხულოში, ზუგდიდში, ოზურგეთში, ფოთში, ქუთაისში, ახალციხეში, თელავში, გორსა და რუსთავში. 

● საგამოცდო ცენტრის შესასვლელშივე გაივლიან თერმოსკრინინგს.

● დაავადებათა კონტროლის ეროვნული ცენტრის რეკომენდაციების შესაბამისად, საგამოცდო ცენტრის ერთ სექტორში წელს 10-ზე მეტი აბიტურიენტი არ დაიშვება. 

● ყოველი სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით; 

● მაგიდებს შორის სიგანეში დაშორება იქნება 2 მეტრი, ერთმანეთის მიმდევრობით განლაგებულ მაგიდებს შორის მანძილი კი  – 1 მეტრი.

ერთიან ეროვნულ გამოცდებზე წელს 39 300 აბიტურიენტი, ხოლო სამაგისტრო გამოცდებზე 3 600 სტუდენტია დარეგისტრირებული.