"ქართული ოცნება“ ისტერიკაშია" - ექსპერტები მმართველი პარტიის განცხადებას აფასებენ
ექსპერტები “ქართული ოცნების” განცხადებას აფასებენ
“ქართული ოცნება“ ისტერიკაშია – “ნაციონალური მოძრაობის“ ე.წ გასასამართლებლად 12 წელი ჰქონდათ, ახლა კი ხანდაზმულობის ვადა დიდი ხანია გასულია – არ მგონია, ვინმემ ეს სისულელე “შეჭამოს“ – ამბობს პოლიტოლოგი გია ხუხაშვილი საქართველოს მმართველი პარტიის პოლიტსაბჭოს 20 აგვისტოს განცხადების შესახებ.
ქართველ ექსპერტებს მიაჩნიათ, რომ “ქართული ოცნების” განცხადება პოპულიზმი და ფარისევლობაა, მათი თქმით, ეს ყველაფერი მმართველ გუნდს მხოლოდ წინასაარჩევნო პიარისთვის სჭირდება და მერე “აღარც გაახსენდებათ.”
მმართველი პარტია “ქართული ოცნების” პოლიტსაბჭო განცხადებას ავრცელებს და ამომრჩეველს მოუწოდებს, 26 ოქტომბერს გამოვიდეს “ქუდზე კაცი” და შექმნან “მყარი ფუნდამენტი” საქართველოს ეროვნული იდენტობის დასაცავად.
მმართველი პარტია წერს, რომ მათ საკონსტიტუციო უმრავლესობა სჭირდებათ იმისთვის, რათა “ნაციონალური მოძრაობა” და ყველა მისი “სატელიტი თუ მემკვიდრე პარტია” არაკონსტიტუციურად გამოაცხადონ.
ასევე, ქართული ოცნება აღნიშნავს, რომ საკონსტიტუციო უმრავლესობის მოპოვება საშუალებას მისცემთ მათ “ოჯახური ღირებულებებისა და არასრულწლოვანთა დაცვა” უმაღლეს ხარისხში განამტკიცონ.
გარდა ამისა, “ქართული ოცნების” თქმით, “მშვიდობიანი გზით საქართველოს ტერიტორიული მთლიანობის აღდგენის შემთხვევაში, აუცილებელი გახდება საქართველოს კონსტიტუციის ცვლილება, რათა საქართველოს მმართველობის სისტემა და ტერიტორიული სახელმწიფოებრივი მოწყობა ახალ რეალობასთან მოვიდეს შესაბამისობაში”.
მმართველი პარტიის მტკიცებით, ოპოზიცია “გარე დავალებას შეასრულებს” და ტერიტორიული მთლიანობის აღდგენისთვის აუცილებელ საკონსტიტუციო ცვლილებებს აუცილებლად წინ აღუდგება.
როგორ აფასებენ ექსპერტები მმართველი პარტიის განცხადებას
გია ხუხაშვილი, პოლიტოლოგი: “როდესაც 12 წელი ხელისუფლებაში ხარ, სულ ამ თემაზე ლაპარაკობ და 12 წლის თავზე ასეთ განცხადებას ავრცელებ, არასერიოზული და მეტსაც გეტყვით, სასაცილოა. არ მგონია, ვინმემ ეს სისულელე „შეჭამოს“.
მეორე თემაა განსაკუთრებით დამაფიქრებელი მათი აზროვნების სიჯანსაღესთან დაკავშირებით – როდესაც ისინი ლაპარაკობენ „ნაციონალური მოძრაობა“ და მის სატელიტებიო, ფაქტობრივად, სატელიტებად აცხადებენ ყველა პოლიტიკურ ოპონენტს.
ისინი ნებისმიერ პარტიას, ნებისმიერ მოქალაქეს, რომელიც ხელისუფლების მიმართ კრიტიკულად არის განწყობილი „ნაცს“ ეძახიან. შესაბამისად, ეს არის განაცხადი ერთპარტიული სისტემის ჩამოყალიბებაზე. როდესაც ნებისმიერი სხვაგვარად აზროვნება იქნება შეფასებული, როგორც დამნაშავე პარტიის მომსახურება. ეს „თეთრი ძაფით არის ნაკერი.
ხელისუფლებას ესმის, რომ პოზიტიური დღის წესრიგით არ შეუძლიათ საარჩევნო შედეგის მიღება და ამიტომ, მისდევენ იმ მატრიცას, რაც რუსეთში ძალიან კარგად არის აპრობირებული. თუ გადახედავთ ამ განცხადების პათოსს, მის პუნქტებს, ეს ყველაფერი რუსეთმა და ბელარუსმა გაიარა. მცდელობა იყო უკრაინაში, რომ იგივე გაეკეთებინათ, მაგრამ არ გამოუვიდათ. თითქოს ყალბი ტრადიციების დაცვა, ურაპატრიოტიზმი, ფსევდორელიგიური გზავნილები, ეს ყველაფერი ამ განცხადებაში აღმოჩნდა.
ფაქტობრივად, დააანონსეს, თუ რაზე აიგება მათი საარჩევნო კამპანია. ახლა ოპოზიციაზეა დამოკიდებული, რამდენად მოახერხებს ამ ფარსის ლუსტრირებას, იმის წარმოჩენას, რომ რაც ამ განცხადებაში წერია, არის სიყალბე. არანაირი კავშირი მათ გეგმებს არც მშვიდობასთან, არც სამოქალაქო ერთობასთან არ აქვს, პირიქით, საზოგადოების კიდევ ერთხელ გახლეჩასა და სამოქალაქო დაპირისპირების ზღვარზე მიყვანამდეა ორიენტირებული, რომ კიდევ ერთხელ გაყონ და შეაძულონ ერთმანეთს ქართველები.
ომის ყველაზე ცუდი ფორმა არის სამოქალაქო ომი, ზუსტად აქეთ უბიძგებს „ქართული ოცნება“ ამ განცხადებით ქართულ საზოგადოებას, რაც ძალიან სამწუხაროა.
ეს ყველაფერი წინასაარჩევნო მიზნებს ისახავს. დამერწმუნეთ, არჩევნების შემდეგ საერთოდ დაავიწყდებათ, ამ განცხადებაში საერთოდ რაზეა საუბარი. ტვინების გამორეცხვის კიდევ ერთი მცდელობაა. დიდი იმედი მაქვს, ჩვენი საზოგადოების სიბრძნის, რომ „ამ საკენკს კიდევ ერთხელ არ აკენკავენ“, როგორც დღემდე არაერთხელ მომხდარა.
ახლა ამაზე საუბარი არასერიოზული და სასაცილოა. ეს იმას ნიშნავს, რომ ამ განცხადების მიზანი და ამოცანა არის მხოლოდ ქართული საზოგადოების მოტყუება და ხარკის გადახდა იმ ფანატიკოსების ძალიან მცირე ჯგუფისთვის, რომელსაც დღესაც „ნაცების სისხლი სწყურია.
რეალურად, „ქართული ოცნება“ მშვიდობის პარტია კი არ არის, პირიქით, ომის პარტიაა, ომის ყველაზე საზიზღარი ფორმის, სამოქალაქო დაპირისპირების.
ამ პროპაგანდისტულ შტურმზე მხოლოდ კონტრპროპაგანდა საკმარისი არ არის. ოპოზიციას სჭირდება საზოგადოებასთან დიალოგში შესვლა, რათა ხალხისთვის გასაგებ ენაზე აუხსნან, რომ ეს ყველაფერი არის სიყალბე და ფარსი. ამას ბევრი მუშაობა სჭირდება. ის, რასაც დღეს ოპოზიცია აკეთებს, საკმარისი არ არის. მეტი მუშაობა სჭირდებათ და რაც მთავარია, ინტერაქციულ რეჟიმში.
ხალხს კითხვები უჩნდება, რომელზეც პასუხები უნდა გასცენ არა მაღალფარდოვან პოლიტიკურ ენაზე, არამედ ადამიანებისთვის გასაგებ ენაზე. საბოლოოდ, ამ განცხადებაში იგრძნობა, რომ „ქართული ოცნება“ არის ისტერიკაში. ის ფსონებს მაქსიმალურად ზრდის. ერთგვარ „ვა ბანკზე“ მიდის. „ ვა ბანკზე“ როდის მიდის ადამიანი? როდესაც არის შეშინებული, დამფრთხალი და საქციელწამხდარი. შესაბამისად, ეს განცხადება „ქართული ოცნების“ სისუსტეა, ვიდრე ძალის დემონსტრირება.“
ვახტანგ ძაბირაძე, ექსპერტი: “დღეს „ქართულ ოცნებას“ მოსახლეობასთან სალაპარაკო, გარდა იმისა, რომ „ნაციონალური მოძრაობით“ დააფრთხოს და შეაშინოს, სხვა არაფერი აქვს, რითაც ის შეეცდება საარჩევნო კამპანიის საშუალებით ხმები მიიღოს. ამიტომ „ქართული ოცნება“ რადიკალურ განცხადებებზე წავიდა, კერძოდ იმაზე, რომ არაკონსტიტუციურად გამოაცხადებს, გაასამართლებს და ა.შ. 12 წელი გავიდა.
თუ თვლიდნენ, რომ „ნაციონალური მოძრაობა“ ასეთი ტიპის პარტია იყო, მათ შეეძლოთ აქამდე გაეკეთებინათ, მაგრამ მაშინ ეს არ სჭირდებოდათ. დღეს პიარისთვის მათ სჭირდებათ იმიტომ, რომ სხვა რით შეიძლება მოიზიდო ამომრჩეველი?
არის გარკვეული საზოგადოების ნაწილი, რომელიც „ნაციონალური მოძრაობისადმი“ მკვეთრად ნეგატიურად არის განწყობილი, ამიტომაც ცდილობენ ეს ამომრჩეველი ისევ უკან წამოიყვანონ, თუმცა იმ ფონზე, რომ გაჩნდა „ლელო“, „საქართველოსთვის“ – აი, აქ უკვე პრობლემები ექმნებათ. ამიტომ აძლიერებენ ამ თემას.
ეს განცხადებები დღესდღეობით არის იმის დასტური, რომ „ქართულ ოცნებას“ სხვა თემა ამომრჩეველთან სალაპარაკოდ არ აქვს. გარდა იმისა, რომ იგი ლაპარაკობს ისევ „ნაციონალურ მოძრაობაზე“, მის ხელისუფლებაში დაბრუნებაზე, ხიფათზე და ა.შ.
კარგი, გაასამართლებენ. ჯერ ერთი მაღალი რანგის თითქმის ყველა პირი „ნაციონალური მოძრაობისა“ – მიხეილ სააკაშვილიდან დაწყებული, დღემდე ციხეებში ჰყავთ. ახლა კიდევ ვინ უნდა დაუმატონ, უბრალოდ, არ ვიცი. აკრძალავენ „ნაციონალურ მოძრაობას“, როგორც ასეთს, შეიქმნება სხვა პარტია და ეს ხალხი, ვინც „ნაციონალური მოძრაობის“ ელექტორალური მხარდამჭერია, ახალი პარტიის მხარდამჭერი გახდება. ამით რას მოიგებენ? ეს ყველაფერი ხომ ზღაპარია!
თუ „ქართული ოცნება“ მიდის იქითკენ, რომ საერთოდ პარტიები აკრძალოს. კი ბატონო, ეს შეიძლება, მაგრამ ეს უკვე დიქტატურაა. დემოკრატიაზე და ღირსებაზე ლაპარაკი გამორიცხულია.
დღეს „ქართული ოცნება“ უბრალოდ ცდილობს რაღაც თემები დაახვავოს და ყველაფერზე ილაპარაკოს. საკონსტიტუციო უმრავლესობაზე ლაპარაკობენ არა იმიტომ, რომ მართლა საკონსტიტუციო უმრავლესობას აიღებენ. საზოგადოების და ჩვენი პარტნიორების მხრიდან უმრავლესობის მოპოვება რომ არ დადგეს კითხვის ნიშნის ქვეშ, ამიტომ ლაპარაკობენ საკონსტიტუციო უმრავლესობაზე. „გაღმა გაედავეს“ პრინციპს ამუშავებენ.“
გამორიცხულია. საკონსტიტუციო უმრავლესობა კი არა, „ქართულ ოცნებას“ დღეს უმრავლესობის მოპოვების პრობლემა აქვს. 76 მანდატის მოპოვების პრობლემა აქვს. რა საკონსტიტუციო უმრავლესობაზეა ლაპარაკი!
ეს ყველაფერი ხომ „ბლეფია“? კონსტიტუციაში დევს ის პრინციპი, რომ როცა ტერიტორიული მთლიანობა აღდგება, რომ მეორე პალატა შეიქმნას (ანუ ზედა და ქვედა პალატა) და ა.შ. ასე რომ, ეს თემაც გავლილია. უბრალოდ, ჯერ აღადგინონ ტერიტორიული მთლიანობა და როგორ აპირებენ ამას? – ესეც ძალიან საინტერესოა. გაჩნდა ახალი მითი, რომ „ქართული ოცნება“ შეძლებს ტერიტორიული მთლიანობის აღდგენას. შეძლებს კი? ეს პრობლემა „ქართულ ოცნებას“ აქვს, არ ვიცი, ახლა რამდენად დამაჯერებელია მათი ამგვარი განცხადება.“
გურამ იმნაძე, იურისტი: “რა გავიგეთ ქართული ოცნების დღევანდელი ვრცელი განცხადებიდან:
1) თავადაც არ სჯერათ “გორბის” რეიტინგების რომ თითქოს არჩევნებში იმარჯვებენ და ახლა ხალხს ომის შიშით და ბუნდოვანი დაპირებებით ეხვეწებიან ხმებს;
2) თავადაც აღიარებენ, რომ მთელი ეს პერიოდი ქვეყანაში სრულყოფილი, ჯანსაღი არჩევნები არ გვქონია;
3) გავიგეთ, რომ ხელისუფლებაში ყოფნის 12 წლის თავზე, ისევ წინა ხელისუფლება ჰგონიათ მათი მთავარი პრობლემა. თუმცა ამ წინა ხელისუფლების დამფინანსებლები, მათი მოსამართლეები, მართული პროკურატურა და პოლიცია შესანიშნავად შეისისხლხორცეს.
სამაგიეროდ, რა ვერ გავიგეთ ამ განცხადებიდან:
1) როგორ აპირებენ ჩვენი მოსახლეობის სოციო-ეკონომიკური პრობლემების მოგვარებას; გაზრდილი ფასების და ინფლაციის პრობლემის მოგვარებას;
2) რას აპირებენ განათლების და ჯანდაცვის სფეროებში, რომ ქვეყანაში უცხოური განათლება პრივილეგიად აღარ ითვლებოდეს, ხოლო საზღვარგარეთ სამკურნალოდ წასვლა აქაური ჯანდაცვის სექტორისგან ხსნად;
3) ვერ გავიგეთ, როგორ აპირებენ კორუფციასთან ბრძოლას და ხალხის ხარჯზე დამდიდრებულ ფეოდალებთან გამკლავებას;
4) როგორ აპირებენ ქვეყნის ევროინტეგრაციას, რაც ისევ ჩვენი დემოკრატიის და ეკონომიკური წინსვლის საწინდარი უნდა იყოს.
რეალურად კი, ეს განცხადება სხვას არაფერს ემსახურება, გარდა იმისა, რომ კიდევ დახლიჩონ ჩვენი საზოგადოება, უფრო მეტად გადაკიდონ თანასოფლელები, თანაქალაქელები, ოჯახის წევრები ერთმანეთს და ამის ხარჯზე საკუთარი ეკონომიკური და პოლიტიკური კეთილდღეობა გაიხანგრძლივონ.
ზიზღის და სიცრუის ამ ტალღებს დიდი წერტილი უნდა დაესვას ოქტომბერში, რომ ვერასდროს ვერც ერთმა პოლიტიკოსმა ვეღარ გაბედოს მშვიდობით, ტრადიციებით, ჩვენი ემოციებით ასე მანიპულირება.”
ვახუშტი მენაბდე, კონსტიტუციონალისტი: “ქართული ოცნება” განცხადებას აქვეყნებს სადაც წერს რისთვის სჭირდება საკონსტიტუციო უმრავლესობა. სამ მიზეზს ასახელებს, მაგრამ სამივეს გაკეთება შეუძლია 76 დეპუტატითაც.
შინაარსის ანალიზის გარეშე ვთქვათ:
1. კოლექტიური “ნაცმოძრაობის” არაკონსტიტუციურად გამოცხადება – ხელისუფლება ახლაც სრულად აკონტროლებს საკონსტიტუციო სასამართლოს და უმარტივესად შეუძლია ეს დაავალოს;
2. “ოჯახური ღირებულებების” კონსტიტუციური კანონის მიღება – მანდ რაც უწერია ყველაფერი ჩვეულებრივი კანონითაც რომ მიიღოს საკონსტიტუციო სასამართლო მაინც არ გაუუქმებს;
3. ტერიტორიული მთლიანობის აღდგენის შემდეგ კონსტიტუციის შეცვლა – გასაგებია, რომ ეს გამოგონილი მიზეზია.
არის მეოთხეც მაგრამ არ ვიცით რაა. რა შეიძლება იყოს თქვენი აზრით?”
