ენტონი ბლინკენი: ვემზადებით ხელთ არსებული ინსტრუმენტების გამოსაყენებლად, მათ შორის სანქციებისთვის
ენტონი ბლინკენი სანქციებზე
ქართულ თემაზე მომუშავე ჟურნალისტი ალექს რაუფოღლუ, აშშ-ს სახელმწიფო მდივნის, ენტონი ბლინკენის კომენტარს ავრცელებს, რომელშიც ვკითხულობთ, რომ შეერთებული შტატები ემზადება მათ ხელთ არსებული ინსტრუმენტების გამოსაყენებლად, მათ შორის სანქციებისთვის.
რას წერს ენტონი ბლინკენი
“32 წელზე მეტია ამერიკის შეერთებული შტატები საქართველოსა და ქართველი ხალხის პარტნიორია. ჩვენი პარტნიორობა დაფუძნებულია ჩვენს საერთო სიყვარულზე თავისუფლებისა და დემოკრატიის მიმართ და სურვილზე, ვნახოთ საქართველო ევროატლანტიკურ ოჯახში.
ჩვენ მჭიდროდ ვიმუშავეთ თანმიმდევრულად საქართველოს მთავრობებთან და ქართველ ხალხთან ერთად, რათა განვითარებულიყო საქართველოს ეკონომიკა, გაუმჯობესებულიყო განათლების სისტემა, გაძლიერებულიყო თავდაცვის შესაძლებლობები და გაფართოებულიყო ჯანდაცვისა და სოფლის მეურნეობის სექტორები.
აშშ მტკიცედ უჭერდა მხარს საქართველოს სუვერენიტეტსა და ტერიტორიულ მთლიანობას და ჩვენი ერთგულება საქართველოს მამაცი ხალხისა და მათი ევროატლანტიკური მისწრაფების მიმართ ურყევია
ამერიკის შეერთებული შტატები მკაცრად გმობს პარტია “ქართული ოცნების” სასტიკ და გაუმართლებელ ძალადობას საქართველოს მოქალაქეების, პროტესტის მონაწილეების, მედიისა და ოპოზიციის წარმომადგენლების წინააღმდეგ.
ჩვენ მოვუწოდებთ “ქართულ ოცნებას”, შეწყვიტოს ეს რეპრესიული ტაქტიკა, მათ შორის თვითნებური დაკავებისა და ფიზიკური ძალადობის გამოყენება, კრიტიკოსების გაჩუმების მცდელობის მიზნით. ჩვენ განსაკუთრებით ვართ შეშფოთებულები სამართალდამცავი ორგანოების მიერ ადამიანებისთვის მიყენებული სერიოზული დაზიანებების შესახებ ცნობებით.
მშვიდობიანი შეკრებისა და გამოხატვის თავისუფლების უფლების რეალიზაციისთვის დაპატიმრებული პირები დაუყოვნებლივ უნდა გათავისუფლდნენ, ძალის უკანონო გამოყენებაზე პასუხისმგებელმა პირებმა კი სრულად უნდა აგონ პასუხი
აშშ სოლიდარულია ქართველი ხალხისა და მათი დემოკრატიული მისწრაფების მიმართ. ისინი, ვინც ძირს უთხრიან საქართველოში დემოკრატიულ პროცეს ან ინსტიტუტებს – მათ შორის, ვინც ახშობს საქართველოს მოქალაქეების უფლებას მშვიდობიანი შეკრებისა და გამოხატვის თავისუფლებაზე – პასუხისგებაში უნდა მიეცენ.
გარდა იმისა, რომ გრძელდება ადრე გამოცხადებული ორმხრივი ურთიერთობის ყოვლისმომცველი გადახედვა, ამერიკის შეერთებული შტატები ახლა ემზადება გამოიყენოს ჩვენს ხელთ არსებული ინსტრუმენტები, მათ შორის დამატებითი სანქციები.” – ნათქვამია ენტონი ბლინკენის განცხადებაში.
მანამდე საქართველოში მიმდინარე პოლიტიკურ მოვლენებთან დაკავშირებით, ამერიკის შეერთებული შტატების ჰელსინკის კომისიის თავმჯდომარემ, ჯო უილსონმა საგანგებო განცხადება გაავრცელა.
ჯო უილსონი სახელმწიფო დეპარტამენტს და ევროპულ მოკავშირეებს მოუწოდებს, თბილისის მერს, შინაგან საქმეთა მინისტრსა და “რეპრესიების ორგანიზებაზე პასუხისმგებელ ყველა პირს” პერსონალური სანქციები დაუწესონ.
“აშშ-ის სახელმწიფო დეპარტამენტმა უნდა დაუწესოს პერსონალური სანქციები თბილისის მერს, შინაგან საქმეთა მინისტრს და ყველა სხვა ოფიციალურ პირს, ვინც პასუხისმგებელია ამ [აქციის დაშლის] ორგანიზებაზე. მოვუწოდებ ევროპელ მოკავშირეებს, იგივე გააკეთონ.” – ამბობს უილსონი.
