ენმ-მ "ოლიგარქიული მმართველობის წინააღმდეგ" საკუთარი ვერსია წარადგინა

ენმ-მ საკუთარი ვერსია წარადგინა

“ერთიანმა ნაციონალურმა მოძრაობამ” პარლამენტს დეოლიგარქიზაციის შესახებ ევროკომისიის რეკომენდაციის შესრულების საკუთარი ვერსია წარუდგინა, რომლის ავტორი დეპუტატი ლევან ბეჟაშვილია.

კანონპროექტში განმარტებულია, რომ “ოლიგარქიული მმართველობა” წარმოადგენს სახელმწიფოს დემოკრატიული მმართველობის საფუძვლების, ქვეყნის ეროვნულ უსაფრთხოებისა და საქართველოს კონსტიტუციით აღიარებულ ხელისუფლების დანაწილებისა და დაბალანსების პრინციპების, ასევე ევროატლანტიკური ღირებულებების რეალიზაციის მთავარ საფრთხეს; ხელყოფს მოქალაქეთა თავისუფალ, სამართლიან და თანასწორ პოლიტიკურ და ეკონომიკურ შესაძლებლობებს.

კანონპროექტის მიხედვით, ოლიგარქი არის პირი, რომელიც აკმაყოფილებს შემდეგ პირობებს:

• ა) პირდაპირ ან ირიბად ახორციელებს პოლიტიკურ საქმიანობას;
• ბ) მისი ოჯახის წევრები ან დაკავშირებული პირები, მის მფლობელობაში არსებულ იურიდიულ სუბიექტებში დასაქმებული პირები იკავებენ სახელმწიფო-პოლიტიკურ, პოლიტიკურ ანდა სახელმწიფო თანამდებობებს;
• გ) პირდაპირ ან ირიბად (მათ შორის მისი გავლენის ქვეშ მყოფი ორგანიზაციის მეშვეობით) ახორციელებს მნიშვნელოვან ზეგავლენას მედია მომსახურების საშუალებებზე;
• დ) წარმოადგენს საბოლოო ბენეფიციარ მესაკუთრეს სამეწარმეო საქმიანობის სუბიექტის, რომელიც ამ კანონის ამოქმედების მომენტისთვის არის ბუნებრივი მონოპოლიების სუბიექტი ან უკავია დომინანტური (მონოპოლიური) მდგომარეობა ბაზარზე კონკურენციის შესახებ კანონმდებლობის შესაბამისად;
• ე) პირის ანდა სამეწარმეო საქმიანობის სუბიექტის მფლობელი პირის დადასტურებული აქტივები აღემატება ქვეყნის მთლიანი შიდა პროდუქტის 0,35%, ანდა მას, მისი ოჯახის წევრებს და დაკავშირებულ პირებს საკუთრებაში აქვთ საქართველოს მიწის რესურსის 7 % ზე მეტი.
• ვ) სანქცირებულია ჩრდილოატლანტიკური ხელშეკრულების ორგანიზაციის და ევროპის კავშირის წევრი სახელმწიფოს, ამ სახელმწიფოთა თანამეგობრობის ან საერთაშორისო ორგანიზაციების მიერ.

● ვინ არის ოლიგარქი საქართველოში?
● “დაუწესდეს სანქციები ივანიშვილს, გათავისუფლდნენ სააკაშვილი და გვარამია” – EPP-ის რეზოლუცია
● “კატასტროფაა”, “ჩვენთვის უინტერესოა” – როგორ გამოეხმაურა ოპოზიცია და მმართველი პარტია აშშ-ის სენატის სხდომას

კანონპროექტის თანახმად, პირის ოლიგარქად ცნობის გადაწყვეტილებას, პარლამენტის წევრთა არანაკლებ ერთი მეხუთედის სარჩელის საფუძველზე, იღებს საკონსტიტუციო სასამართლო.

ლევან ბეჟაშვილის თქმით, კანონპროექტის მიხედვით, მთავარი და ამოსავალი ოლიგარქის სტატუსის მინიჭებისთვის არის ის, რომ ის უნდა აკმაყოფილებდეს მათ მიერ განსაზღვრულ სამ კრიტერიუმს მაინც და აუცილებლად ზეგავლენას უნდა ახორციელებდეს სახელისუფლებო ორგანოების გადაწყვეტილებებზე და თანამდებობის პირებზე:

“ვის დაცვას ვახორციელებთ, იქნება ეს კეზერაშვილი, მანამდე ჯაფარიძე-ხაზარაძის გვარიც მოიხსენიებოდა, აქ ამ შემთხვევაში განმსაზღვრელი არ უნდა იყოს. მთავარი არის კონცეფცია, ის თუ ვის მივიჩნევთ ჩვენ ოლიგარქად. შეიძლება, მდიდარი ადამიანი არსებობდეს, მაგრამ მის ჭკუაზე, მის სურვილებზე სამთავრობო დაწესებულებები ქვეყნის მართვა არ ხორციელდებოდეს.”– ამბობს ბეჟაშვილი.

● გადაწყვეტილება მიღებულია: უკრაინას და მოლდოვას კანდიდატის სტატუსი მისცეს. საქართველოს – მხოლოდ პერსპექტივა
●ადამ კიზინგერი: რუსული პროპაგანდაა, როცა მესმის, რომ აშშ საქართველოს ომში ჩათრევას ცდილობს

საქართველოს პარლამენტმა 76 ხმით 6-ის წინააღმდეგ მეორე მოსმენით მიიღო კანონპროექტი “დეოლიგარქიზაციის შესახებ”. “დეოლიგარქიზაცია” ერთ-ერთი პირობაა იმ 12 პუნქციანი გეგმის, რომლებიც საქართველომ უნდა შეასრულოს ევროკავშირის კანდიდატის სტატუსის მისაღებად.

ოპოზიციის არ უჭერს მხარს კანონის იმ ვერსიას, რომელიც “ქართული ოცნების“ მიერ არის ინიციირებული. ამ ვერსიის თანახმად, ოლიგარქების სიაში არ მოხვდება ბიძინა ივანიშვილი, სამაგიეროდ, იქ აღმოჩნდებიან ბიზნესმენები, რომლებსაც კავშირი აქვთ ოპოზიციასთან.

შესაბამისად, არსებობს ალბათობა, რომ “დეოლიგარქიზაციის შესახებ კანონი” რეალური დეოლიგარქიზაციის ნაცვლად, კიდევ უფრო გაამყარებს ივანიშვილის არაფორმალურ მმართველობას და ოპოზიციის წინააღმდეგ ბრძოლის იარაღად იქცევა.

“ქართული ოცნების” მიერ მომზადებული „დეოლიგარქიზაციის შესახებ“ კანონპროექტი ამავე შინაარსის უკრაინული კანონის ანალოგია. უკრაინული კანონის თანახმად, ოლიგარქი არის ადამიანი, რომელიც ქვემოთ ჩამოთვლილი ოთხი კრიტერიუმიდან მინიმუმ სამს აკმაყოფილებს:

1. მონაწილეობს პოლიტიკურ ცხოვრებაში;
2. აქვს გავლენა მედიაზე;
3. სულ მცირე ბოლო ერთი წლის განმავლობაში აქვს ბაზარზე დომინანტური ბიზნესი ან ბიზნესები;
4. ფლობს საარსებო მინიმუმზე მილიონჯერ მეტ ფულს. ​[საქართველოში საარსებო მინიმუმი 250 ლარია, შესაბამისად, 250 მილიონი ლარი გამოდის].

ოპოზიცია კანონს აკრიტიკებს და ითხოვს კანონპროექტის ვენეციის კომისიაში გაგზავნას. თუმცა, მმართველმა გუნდმა ეს თხოვნა არ გაითვალისწინა.

ქართული პოლიტიკური სპექტრის დიდი ნაწილი, ასევე ექსპერტები და სამოქალაქო სექტორი თანხმდებიან იმაზე, რომ საქართველოში დღეს ერთადერთ ადამიანს შეიძლება უწოდო ოლიგარქი – ეს არის ბიძინა ივანიშვილი.