ჟურნალისტი მარიამ ნიკურაძე ამბობს, რომ დაუდასტურებელი ინფორმაციით "დასაკავებელთა სიაშია"

მარიამ ნიკურაძე დასაკავებელთა სიაშია

OC Media-ს თანადამფუძნებელი, რედაქტორი, ჟურნალისტი და ფოტორეპორტიორი, მარიამ ნიკურაძე ამბობს, რომ შესაძლოა, შინაგან საქმეთა სამინისტროს წარმომადგენლები მის დაკავებას გეგმავდნენ.

“მეგობრებო, ვრცელდება ინფორმაცია, რომ ჩემ დაკავებაზე აქვთ ბრძანება, იცოდეთ. გადაუმოწმებელია, 100 პროცენტით არ ვიცი, მაგრამ პრევენციულად იცოდეთ”, – ეს ინფორმაცია ნიკურაძემ სოციალურ ქსელში დაწერა.

• ცრემლსადენი გაზი, წყლის ჭავლი, 48 დაკავებული – პროტესტის მეცხრე დღე
• სისტემური და ძალადობრივი რეპრესიები ადამიანურობის წინააღმდეგ ჩადენილ დანაშაულად უნდა შეფასდეს – საია
• პროევროპული პროტესტის 300-ზე მეტი მონაწილე ნაცემი და დაკავებულია. აქ მათ ისტორიებს ვაგროვებთ. განახლებადი

ინფორმაცია სიის შესახებ, სადაც 48 ადამიანის სახელი და მათი პირადი ნომრებია OC Media-ს სანდო წყარომ მიაწოდა. მედიასაშუალების წყაროს ცნობით, ინფორმაციის გადამოწმება მათ ვერ მოახერხეს, თუმცა ამავე სიაში არიან უკვე დაკავებული პირები, მათ შორის, მსახიობი ანდრო ჭიჭინაძე, რომლის წინააღმდეგ სისხლის სამართლის საქმეა აღძრული.

გამოცემა “პუბლიკამაც” გაავრცელა ინფორმაცია, რომ დამოუკიდებელი წყაროს ცნობით, მარიამ ნიკურაძე სავარაუდო დასაკავებელ პირთა სიაშია.

მარიამ ნიკურაძე ბოლო წლების განმავლობაში საქართველოში გამართულ თითქმის ყველა საპროტესტო აქციას აქტიურად აშუქებს, მათ შორის, აშუქებს პროევროპულ დემონსტრაციებს. ბოლო დღეების განმავლობაში პოლიცია მასაც ისევე უშლიდა ხელს მუშაობაში, როგორც მედიის სხვა წარმომადგენლებს. ის ერთერთი აქციის გაშუქებისას შინაგან საქმეთა სამინისტროს თანამშრომელმა ძირს ხელის კვრით დააგდო. ნიკურაძეს აქციების დარბევისას დაუმტვრიეს ორი ფოტოკამერა.