დიმიტრი ლორთქიფანიძის "პრიმაკოვის ფონდს" TBC ბანკმა სავარაუდოდ ანგარიშები დაუხურა

პრიმაკოვის ფონდის ქართველი დირექტორი დიმიტრი ლორთქიფანიძე

“პრიმაკოვის ქართულ-რუსულ საზოგადოებრივ ცენტრს”, რომელსაც საქართველოს პარლამენტის ყოფილი დეპუტატი დიმიტრი ლორთქიფანიძე ხელმძღვანელობს, თიბისი ბანკმა სავარაუდოდ ანგარიშები დაუხურა და განმარტა, რომ ბანკი განუხრელად იცავს საერთაშორისო სანქციებს და შესაბამისად ინიცირება გაუკეთა იმ იურიდიული პირის/ორგანიზაციის ანგარიშის დახურვას, რომლის დამფუძნებელიც სანქცირებული იურიდიული პირია.

ნინო ბურჯანაძის პარტია “გაერთიანებული დემოკრატების” ყოფილმა წევრმა და “პრიმაკოვის სახელობის ქართულ-რუსული ფონდის” დირექტორმა დიმიტრი ლორთქიფანიძემ 9 სექტემბერს განაცხადა, რომ TBC ბანკმა მას სანქციები დაადო.

„TBC ბანკმა სანქცია დამადო და ანგარიშები დამიხურა! დაიწყო საბანკო ტერორი!!!“ – წერს ლორთქიფანიძე.

ამავე ფეისბუქ პოსტის კომენტარებში ლორთქიფანიძემ გამოაქვეყნა ანგარიშების დახურვის შესახებ TBC ბანკის განმარტებაც, სადაც წერია, რომ ანგარიშების დახურვა ბანკის შიდა პოლიტიკის გათვალისწინებით გადაწყვიტეს.

TBC-ის თქმით, მათ კანონმდებლობით აქვთ უფლება, ყოველგვარი დასაბუთების გარეშე უარი თქვან ანგარიშის გახსნაზე ან მომსახურების გაწევაზე.

ბანკის ცნობით, მათ ფიზიკური პირის, დიმიტრი ლორთქიფანიძის ანგარიში არ დაუხურავთ და ფაქტი, რომ იურიდიული ორგანიზაციის დამფუძნებელი ორგანიზაცია სანქცირებულთა სიაშია, ანგარიშის დასახურად უკვე საკმარისი საფუძველია.

TBC მომხმარებლის კონფიდენციალურობის მიზნით, არ ასახელებს იმ ორგანიზაციის სახელს, რომლის ანგარიშიც სანქცირებულ ორგანიზაციასთან კავშირის გამო დახურა, თუმცა ეს ორგანიზაცია სავარაუდოდ “პრიმაკოვის ფონდია”, რომელიც ევროკავშირის მიერ სანქცირებული “გორჩაკოვის ფონდის” მიერაა შექმნილი. დიმიტრი ლორთქიფანიძე “პრიმაკოვის სახელობის ქართულ-რუსული ფონდის” დირექტორი 2018 წლიდანაა. 

ცენტრი რუსეთის პრეზიდენტის, ვლადიმირ პუტინის ბრძანების საფუძველზე შეიქმნა და რუსული ენის კურსებს და სხვა ღონისძიებებს აფინანსებს.

● როგორია სამყარო, რომელსაც პუტინი აშენებს
● უკრაინიდან რუსეთის გავლით – უკრაინელი ლტოლვილების ბედი საქართველოში
● The Washington Post: თუ ივანიშვილი პუტინის მხარდაჭერას განაგრძობს, დასანქცირდება

“ალექსნდრ გორჩაკოვის საჯარო დიპლომატიის ფონდი” ევროკავშირის სანქცირებულ ორგანიზაციათა სიაში 2022 წლის 21 ივლისიდანაა. ის ერთ-ერთია იმ ორგანიზაციებს შორის, ვინც ევროკავშირის განმარტებით, უკრაინაში რუსეთის აგრესიას უჭერს მხარს.

ევროკავშირის ოფიციალურ დოკუმენტში ვკითხულობთ, რომ ორგანიზაცია 2010 წელს დმიტრი მედვედევის ინიციატივით შეიქმნა და მისი დამაარსებელი რუსეთის საგარეო საქმეთა სამინისტროა, სერგეი ლავროვი კი სამეურვეო საბჭოს ხელმძღვანელი.

ევროკავშირის სანქცირებულ პირთა და ორგანიზაციათა შესახებ დოკუმენტში ასევე ვკითხულობთ, რომ რუსეთის საგარეო საქმეთა სამინისტრო აფინანსებს გორჩაკოვის ფონდს, რომელიც სანაცვლოდ სახელმწიფოს მიერ შექმნილ სხვადასხვა არასამთავრობო ორგანიზაციებსა და ანალიტიკურ ცენტრებს აფინანსებს.

„გორჩაკოვის ფონდი შექმნილია იმისთვის, რომ მხარი დაუჭიროს რუსეთის კომპატრიოტებს პოსტ-საბჭოთა სივრცეში, რომლებიც კრემლის იდეოლოგიურ ობიექტებს წარმოადგენენ. გორჩაკოვის ფონდის მიერ ორგანიზებული პროექტები რუსეთის საგარეო პოლიტიკის დისკურსის მნიშვნელოვან ელემენტებს შეიცავს“ – აცხადებს ევროკავშირი.