კომენტარი: ივანიშვილი რუსეთის აგენტობისთვის დასანქცირდა, რაც ნიშნავს, რომ აშშ-ს ინფორმაცია აქვს

დენიელ ფრიდის კომენტარი

აშშ-ს სახელმწიფო დეპარტამენტის სანქციების პოლიტიკის ყოფილი კოორდინატორი, დენიელ ფრიდი “ამერიკის ხმასთან” შეერთებული შტატების მხრიდან ბიძინა ივანიშვილის დასანქცირების მნიშვნელობაზე საუბრობს და აღნიშნავს, რომ ივანიშვილი რუსეთის აგენტობისთვის დასანქცირდა, რაც ნიშნავს, რომ აშშ-ს ინფორმაცია აქვს.

დენიელ ფრიდმა ასევე საქართველოს მე-5 პრეზიდენტის, სალომე ზურაბიშვილის შესახებაც ისაუბრა და განაცხადა, რომ მისი აზრით დასავლეთისთვის ის საქართველოს ლეგიტიმურ ლიდერად დარჩება.

პირველად ისტორიაში, საქართველოს ჰყავს დასანქცირებული ხელისუფლება. აქ შევკრიბეთ ყველა სანქცია, 2023 წლიდან დღემდე

აქ ნახავთ დასანქცირებული პირების სიას და განმარტებებს, რომელი სანქცია რას ითვალისწინებს

დენიელ ფრიდი:

“ძალიან საინტერესოა, რომ შეერთებულმა შტატებმა ივანიშვილს სანქციები დაუწესა რუსეთის აგენტად მოქმედების, ან რუსეთის ინტერესების სასარგებლოდ ქმედებისთვის. სანქციები დაწესდა კონკრეტული აღმასრულებელი ბრძანებით, რომელიც მიზანში იღებს რუს აგენტებს და იმ აგენტებს, ვინც რუსული ინტერესების დაწინაურებისთვის მოქმედებენ. ეს საკმაოდ საინტერესოა, რადგან ეს ნიშნავს, რომ შეერთებულ შტატებს აქვს ინფორმაცია ივანიშვილის კრემლისთვის მოქმედების შესახებ.

ასევე შეხედეთ სიტყვებს, რომელიც გამოყენებულია სანქციის ტექსტში. ამერიკას შეეძლო, ივანიშვილისთვის სანქციები ადამიანის უფლებების დარღვევის გამო, “მაგნიტსკის გლობალური აქტით” დაეწესებინა. ამის ნაცვლად, მათ სანქციები რუსეთის სასარგებლოდ ქმედებისთვის დააწესეს. ეს ძალიან საინტერესოა, განსაკუთრებით იმის გამო, რომ რუსეთი საქართველოს წინააღმდეგ აგრესიულადაა განწყობილი, განსაკუთრებით კი 2008 წლის შემდეგ.

სრული ბლოკირების სანქციები ძალიან მნიშვნელოვანი რამაა. ის გულისხმობს, რომ გარდა იმ შემთხვევისა, თუ რაიმე გამონაკლისია დაწესებული, სანქციების სამიზნე პირთან ყველა ფინანსური ტრანზაქცია აკრძალულია, [რადგან დამრღვევებიც] თავად სანქციების საფრთხის ქვეშ დგებიან. ასევე აკრძალულია ყველა ფინანსური ურთიერთობა კომპანიებთან, რომელთა 50%, ან მეტი ამ პირს ეკუთვნის.

მაშინ, როდესაც ხაზინამ სრული ბლოკირების სანქცია დააწესა, მან ასევე გასცა ლიცენზია გარკვეული ეკონომიკური ტენდენციების, ქმედებების გაგრძელებაზე

ჩემი ინფორმაციით ეს მოხდა, რადგან ამერიკის მთავრობას არ სურდა ზიანი მიეყენებინა საქართველოს ეკონომიკის, ან ქართველ ხალხისთვის. ამიტომაც, არ წავიდნენ იმ კომპანიების წინააღმდეგ, რომლებიც მართალია ივანიშვილის საკუთრებაა, მაგრამ მათ სანქცირებამ, შეიძლება ზიანი მიაყენოს საქართველოს ეკონომიკასა და ქართველ ხალხს. ასე რომ, მიუხედავად ამ ლიცენზიების გაცემისა, ეს ძალიან მნიშვნელოვანი გადაწყვეტილებაა. ეს არ არის სავიზო შეზღუდვა, გაცილებით უფრო სერიოზული ნაბიჯია.

მას ახლა ბევრად უფრო გაუჭირდება ბიზნესის წარმართვა. ეს საკმაოდ დიდი საქმეა. რა თქმა უნდა, ამას [სანქციებს] დიდი გავლენა არ ექნება მის ბიზნესზე რუსეთში, მაგრამ ამას მაინც მნიშვნელოვან ნაბიჯად ვთვლი. ეს სანქციები ვერც საქართველოს დემოკრატიას გადაარჩენს, ეს საბოლოოდ, ქართველი ხალხის გასაკეთებელია. მაგრამ ახლა ცხადია, რომ შეერთებულმა შტატებმა გადადგა მნიშვნელოვანი ნაბიჯი საქართველოს ავტოკრატიული მიმართულების მხარდამჭერი წამყვანი ძალის წინააღმდეგ.

რას გულისხმობს აშშ-ს სანქციების რეჟიმი, რომელიც ბიძინა ივანიშვილს დაუწესეს?

ვის ეკისრება ამ აკტეგორიის სანქციები, რისთვისდა როგორ?

[სალომე ზურაბიშვილს] მიიღებენ, არა როგორც დე-ფაქტო პრეზიდენტს, არამედ, როგორც ლეგიტიმურ სიმბოლოს ქართული საზოგადოებისა და ლეგიტიმურ ლიდერს ქართული პოლიტიკისა. მას უზარმაზარი გამბედაობა და პრინციპები აქვს და მან პატივისცემა მოიპოვა მთელ დემოკრატიულ სამყაროში”, – აღნიშნავს ფრიდი და ამატებს, რომ ძალიან მნიშვნელოვანია, რომ ზურაბიშვილი ჰელსინკის კომისიის თავმჯდომარემ და რესპუბლიკელმა კონგრესმენმა ჯო უილსონმა, აშშ-ის არჩეული პრეზიდენტის, დონალდ ტრამპის ინაუგურაციაზე მიიწვია.

რაც შეეხება ივანიშვილის წარმომადგენელ მიხეილ ყაველაშვილს, დენიელ ფრიდი ამბობს, რომ “იმაზე დაყრდნობით, რა ნაბიჯებიც მან, როგორც მოქმედმა პრეზიდენტმა გადადგა, ჩანს, რომ ის ქართული ოცნების პრეზიდენტია და არა საქართველოსი. ეს კი სულ სხვადასხვა რამაა.”