კომენტარი: რა გამოდის? თუ თვით ბიძინამ ვერ აირიდა სანქციები, რა ეშველება მისი გარემოცვის ხალხს?
დავით ზურაბიშვილის კომენტარი
პოლიტიკური მიმომხილველი დავით ზურაბიშვილი საქართველოს არაფორმალური მმართველის, ბიძინა ივანიშვილის აშშ-ს ხაზინის მიერ დასანქცირებას ეხმაურება და წერს, რომ ეს ფაქტი პირადად ივანიშვილზე იმდენად არ იმოქმედებს, რამდენადაც მის მიერ “წლობით ნაგებ-ნაშენებ” ძალაუფლების ვერტიკალზე.
აშშ-მა ბიძინა ივანიშვილს ფინანსური სანქციები დაუწესა. მისი სახელი OFAC-ის სიაში თბილისის დროით 20:00-ზე გამოჩნდა. OFAC-ის სიის თანახმად, ივანიშვილის სანქცირება რუსეთის წინააღმდეგ დაწესებული სანქციების პაკეტის ნაწილია.
როგორც ცნობილია, ივანიშვილის მთელი ქონება, რომელიც შეერთებულ შტატებში და აშშ-ის მოქალაქეების მფლობელობაში ან კონტროლშია, დაიბლოკება.
დავით ზურაბიშვილი:
“არ ვიცი რამდენად მზად იყო ბიძინა ივანიშვილი ამერიკის ხაზინის სანქციებისთვის (მე მაინც მგონია, რომ უფრო არ იყო მზად, ვიდრე იყო, თუმცა თავს ვერ დავდებ), მაგრამ ეს ფაქტი პირადად მასზე იმდენად არ იმოქმედებს, რამდენადაც მის მიერ წლობით ნაგებ-ნაშენებ ძალაუფლების ვერტიკალზე.
ბიძინა ივანიშვილი არ არის ტიპიური ავტორიტარი. გარდა იმისა, რომ ის არ ფლობს უმაღლეს სახელმწიფო თანამდებობას, მას ასევე არ ჰყავს განკარგულებაში სიკვდილის ესკადრონების ან ისლამის რევოლუციის გუშაგების მსგავსი ძალოვანი სტრუქტურა, რომელიც ყველა სხვა ძალოვანზე მაღლა დგას; ის არც რაიმე გავლენიანი წრის ან დაჯგუფების წარმომადგენელია, როგორც მაგალითად მადურო (ნარკომაფია, მენავთობეები) ან თუნდაც პუტინი (კაგებე).
ბიძინას ძალაუფლება დღემდე იდგა სახელმწიფო ინსტიტუტებით მანიპულირებაზე, რასაც ამაგრებდა და ადუღაბებდა მისი ყოვლისშემძლეობის რწმენა. რწმენა იმისა, რომ ბიძინა ყველაზე მაგარია, ყველაფერი გათვლილი აქვს, ყველაფერს დაალაგებს, ყველას მოუგებს და ყველას ბეჭებზე დადებს
ამერიკული სანქციები კი სერიოზულად არყევს სწორედ ამ რწმენას. ივანიშვილი ხომ მთელ მის გარემოცვას არწმუნებდა, არავითარი სანქციები არ იქნება, აგერ მოვა ტრამპი, შეწყდება ომი უკრაინაში და ყველაფერი დალაგდებაო. თავის წინასაარჩევნო გამოსვლებშიც ის საკმაოდ ღიად ამბობდა, რომ გიჟი კი არაა ასეთ ნაბიჯებს რომ დგამს, მას ყველაფერი დათვლილი აქვს და დაანგარიშებული.
ახლა კი რა გამოდის? თუ თვით ბიძინამ ვერ აირიდა სანქციები, რა ეშველება მისი გარემოცვის ხალხს? ვის იმედზე უნდა იყვნენ ისინი? გამოდის, რომ მიენდნენ ადამიანს, რომელსაც საკუთარი თავისთვის ვერ უშველია და მათ დაიცავს? არადა დასაკარგი ბევრი აქვთ.
აი, ასეთი განწყობები კი უკვე სერიოზული საფრთხე შეიძლება გახდეს მისი ძალაუფლების ვერტიკალისთვის და უმოკლეს ხანში ჩამოშალოს ის სისტემა, რის აშენებასაც წლები მოანდომა.
თუმცა, ვფიქრობ ჯერჯერობით ბიძინა შეეცდება ყველაფერი ბაიდენს შეტენოს და ტრამპის ინაუგურაციის ხავსს ჩაებღაუჭოს, მაგრამ მისი და ყოველთა ქოცთა სამწუხაროდ მინდა ვთქვა, რომ ტრამპის მოსვლის შემდეგ ამ სანქციებს კიდევ უარესი თუ დაემატება რამე, თორემ მოკლებით არაფერი მოაკლდება, თუ რა თქმა უნდა, ბიძინამ რაღაც სასწაულით საღ აზრს არ მოუხმო, არჩევნები არ დანიშნა და თავად კი პოლიტიკას სრულიად არ განერიდა. ამ შემთხვევაში მისი სანქცირება კიდევ შეიძლება გადაიხედოს.”
